ភ្នំពេញ៖ស្រីស្រស់ឆឹង ច័ន្ទមុនីរស្មី កំពុងតែលេចត្រដែតនូវអាជីពសម្ដែង ម៉ូដែល និងស្ពតមួយចំនួន ខណៈដែលថ្មីៗនេះនាងបានចាប់ដៃលោកឧកញ៉ាព្រាប សុវត្ថិ ជាលើកដំបូងដោយនាងថែមទាំងសរសើរតារាGalaxy ថាស្រួលធ្វើការជាមួយរៀមច្បងរូបនេះទៀតផង បើទោះជាច័ន្ទមុនីរស្មី មានអាយុប្អូនលោកសុវត្ថិ ដល់ទៅ ២៥ឆ្នាំក្ដី។
កញ្ញាឆឹង ច័ន្ទមុនីរស្មី វាចាថា”ខ្ញុំហៅគាត់(ឧកញ៉ាសុវត្ថិ)ថា បងៗហើយគាត់ជើងចាស់អីចឹង លេងអត់អៀនទេ គឺលះៗ និយាយទៅបងសុវត្ថិ យើងស្រួលធ្វើការជាមួយគាត់…”។
តារាសម្ដែងរូបស្រស់ច័ន្ទមុនីរស្មី ថានាងទើបតែជួបលោកឧកញ៉ាសុវត្ថិ ជាលើកដំបូងក្នុងបទញាក់មួយបទនោះ ហើយទោះជានាងមានបទពិសោធន៍ និងអាយុតិចជាងលោកឧកញ៉ាក្ដី តែការសម្ដែងដោយរលូន ខណៈដែលមុននេះនាងធ្លាប់ថតMV បទរបស់លោកឆាយ វីរៈយុទ្ធ ,ម៉ៅ ហាជី គូម៉ា និងសុគន្ធ ថេរ៉ាយុ ជាដើម។នាងថាក្រៅពីចេញសម្ដែងខារ៉ាអូខេនោះថ្មីៗនេះនាងក៍ទើបតែថតស្ពតឲ្យធនាគារមួយចំនួនផងដែរ។
ឆឹង ច័ន្ទមុនីរស្មី មានអាយុ២៣ឆ្នាំ កម្ពស់១,៦៥ ម៉ែត្រ និងទម្ងន់៤៨ គ.ក្រ ។អតីតFreshie កាលពីឆ្នាំ២០១៦ រូបនេះផ្ដើមអាជីពសិល្បៈដំបូងកាលពីឆ្នាំ២០១៤ ដែលកាលនោះនាងជាអ្នករាំ ក្រោយមកក៍វិវត្តន៍មកជាតារាម៉ូដែល និងសម្ដែងតែម្ដង។ប្រភពបានឲ្យដឹងថាច័ន្ទមុនីរស្មី ទំនងមិនមែននៅបេះដូងទំនេរនោះទេ ព្រោះកន្លងមកគេធ្លាប់ឃើញនាងស្និតស្នាលជាមួយប្រុសក្មេងម្នាក់ដូចគូស្នេហ៍ ខណៈដែលខ្លះសង្ស័យថានាងជាកូនកាត់បរទេសទើបសម្រស់ស្រដៀងតារាប្រទេសជិតខាង។
កញ្ញាឆឹង ច័ន្ទមុនីរស្មី អះអាងថានាងគ្មានសង្សារឡើយ ពោលគឺបេះដូងនៅទំនេរ អត់ទាន់មានម្ចាស់ចិត្តនោះទេ ។ដោយឡែករឿងគេសង្ស័យថានាងជាកូនកាត់បរទេសនោះនាងឆ្លើយថាNo និងថារូបនាងជាកូនខ្មែរសុទ្ធសាធ អត់មានកាត់ទៅខាងណានោះទេ។
ក្រៅពីផ្ដោតទៅលើអាជីពសម្ដែងភាពយន្ដនោះកញ្ញាឆឹង ច័ន្ទមុនីរស្មី ក៍ដាក់គោលដៅធំមួយទៀតនោះគឺការធ្វើជាពិធីការិនីអាជីពដូចរៀមច្បងមួយចំនួនដែលផ្ដើមសិល្បៈចេញពីFreshie ឬតារាសម្ដែងដែរ តែនាងថាពេលនេះមិនទាន់អាចទៅរួចដោយសារតែបទពិសោធន៍នាងនៅស្ទើ។តារាសម្ដែងគូរឲ្យក្នក់ក្នាញ់រូបនេះ និយាយថា”ខ្ញុំចង់ធ្វើជាពិធីការិនីមួយរូបនាពេលអនាគត តែពេលនេះអត់ទាន់ចេះនិយាយបានល្អនៅឡើយ ហេតុនេះនៅត្រូវការពេលវេលាបន្ថែមទៀត…”។
អតីតFreshie ច័ន្ទមុនីរស្មី ក៍ធ្លាប់ថតភាពយន្ដលក្ខណៈបែប Short Film ផងដែរ ហើយតាមរយៈរូបសម្រសដ៍ផូផង់និងទេពកោសល្យសម្ដែងរបស់នាងគេជឿរថានឹងមានផលិតករជាច្រើនចាប់អារម្មណ៍ និងផ្ដល់តំណែងតួឯកឲ្យនាងជាមិនខាននាពេលខាងមុខនេះ ព្រោះថាស្រីស្អាតរូបនេះមានអំណោយផលខាងអាជីពសិល្បៈទាំងព្រម។ប៉ុន្ដែការថ្លែងថាបេះដូងអត់ទាន់មានម្ចាស់របស់នាងច័ន្ទមុនីរស្មី នាពេលនេះមិនសូវមានគេជឿរជាក់ឡើយ ព្រោះថានាងស្អាតប៉ុណ្ណឹងដែររឿងអីទុកបេះដូងឲ្យនៅទំនេរ?តាមព័តមានថាស្រីក្មេងច័ន្ទមុនីរស្មី ស្នេហាតែប្រុសក្មេងរូបសង្ហារ តែអ្នកតាមញ៉ែនាងភាគច្រើនជាប្រុសវ័យចំណាស់ទើបធ្វើឲ្យនាងឆុងគ្នាបែបនេះតែម្ដង ដោយសារតែពិបាកសម្រេចចិត្តជ្រើសរើសទើបចេះតែថានៅទំនេរទៅៗ។
ទស្សនិកជនសង្កេតឃើញថាក្រោយតារាសម្ដែងស្រីល្បីៗឈ្មោះភាគច្រើនមានស្វាមីអស់បច្ចុប្បន្នតារាសម្ដែងដែលកំពុងទទួលបានការចាប់អារម្មណ៍មានដូចជាកញ្ញាសឹម ស្រីនិច្ច,ជី ហ្ស័ន និងឆឹង ច័ន្ទមុនីរស្មី ជាដើមនេះឯង ខណៈដែលតារាខ្លះរះហើយក៍លេចទៅវិញ។សម្រាប់នាងច័ន្ទមុនីរស្មី វិញបានប្រឡូកសិល្បៈអស់រយៈពេល៩ឆ្នាំ មកហើយនិងទើបតែលេចធ្លោថតសម្ដែងMV ជាមួយតារាចម្រៀងល្បីៗជាបន្ដបន្ទាប់នារយៈពេលចុងក្រោយនេះ ខណៈដែលអាជីពMC ដែលនាងចង់ចាប់ជាអាជីពឲ្យស្មើសម្ដែងដែរនោះ អត់ទាន់បានសមេ្រចនៅឡើយ៕
