ភ្នំពេញ៖ស្រីស្អាតប៉ាច គីមមួយ ពេលនេះបានជ្រើសរើសយកអនាគតស្វាមីរបស់នាងលោកសយ រតនៈ ធ្វើជាដៃគូចម្រៀងតែម្ដង ក្រោយពីពួកគេបានក្លាយទៅជាគូដណ្ដឹងគ្នាអស់រយៈពេលជាង១ឆ្នាំមកដែលទាំងការចាប់ដៃគ្នានៅលើឆាកនិងក្រៅឆាកត្រូវបានFan សរសើរថាគូស្នេហ៍តារា១គូនេះសាកសមគ្នាខ្លាំង ។ប៉ុន្ដែគេសង្កេតឃើញថានាងគីមមួយ លែងសូវមានសន្ទុះល្អក្រោយនាងអត់ជំនួយលោកឧកញ៉ាព្រាប សុវត្ថិ រយៈពេល៣ឆ្នាំនេះ បើទោះជានាងមិនមែនជាដៃគូរបស់លោកសុវត្ថិ យ៉ាងសកម្មអំឡុងរួមរស់ក្រោមដំបូលហង្សមាសជាមួយគ្នាក្ដី តែគីមមួយ ពិតជាទទួលបានការចាប់អារម្មណ៍ច្រើន នៅពេលដែលនាងថតសម្ដែងនិងរាំជាមួយលោកឧកញ៉ាវ័យ៤៨ឆ្នាំ នោះបទ”មាន់ស្រែ បន្លែស្រស់” និងសម្ដែងហើយច្រៀងតគ្នាបទ”កាឌឹបៗដាក់”។យ៉ាងណាគីមមួយ ហាក់មិនក្វល់ច្រើនពីលែងមានជំនួយពីឧកញ៉ានោះទេ ព្រោះថាពេលនេះនាងចង់ជួបដៃគូពិតទាំងក្នុងនិងក្រៅឆាកនោះគឺប្រុសក្មេងរូបសង្ហារលោកសយ រតនៈ បើទោះជាការប្រជែងទីផ្សារចម្រៀងនៅហង្សមាសស្រីស្រស់ហាក់មិនសូវមានយ៊ីអ៊ុនល្អ ព្រោះថាឱក សុគន្ធកញ្ញា ,ពេជ្រ សោភា និងរ៉េត ស៊ូហ្សាណា ជាដើមនៅតែមានប្រៀងជាងនាងក្ដី។
ប៉ាច គីមមួយ ត្រូវបានគេចាត់ទុកថានាងជាស្រីស្អាតម្នាក់នៅហង្សមាស តែនាងបែជាគ្មានឱកាសក្ដាប់បានស្ពតធំៗនោះទេ ហេតុនេះហើយបានជានាងងាកមករកស៊ីតាមOnline ដោយLive លក់សម្លៀកបំពាក់រួមគ្នាជាមួយគូស្នេហ៍ ដើម្បីសន្សំលុយរៀបការធំនៅឆ្នាំ២០២៤ ខាងមុខនេះ។ពិតណាស់ទោះជាការរៀបអាពាហ៍ ពិពាហ៍ នោះមិនត្រូវបាននាងគីមមួយ បញ្ជាក់ច្បាស់ថាធ្វើទ្រង់ទ្រាយយ៉ាងណាក្ដី ប៉ុន្ដែគេរអាចសន្និដ្ឋានបានថានាងនឹងធ្វើធំដុំមិនចាញ់តារាល្បីៗផ្សេងៗទៀតឡើយ ដោយសារតែក្រោយអ្នកទាំងពីរភ្ជាប់ពាក្យជាមួយគ្នារួចរយៈពេល២ឆ្នាំ ទើបដល់ថ្ងៃរៀបការនោះពួកគេមានពេលសន្សំប្រាក់រួមគ្នាដើម្បីថ្ងៃពិសេសរបស់គេនោះតាមគម្រោងការណ៍ដែលរៀបចំ។គីមមួយ ប្រាប់ថានាងនឹងរៀបការមិនឲ្យលើសពីអាយុ៣០ឆ្នាំ ឡើយ ខណៈដែលលោករតនៈ ថាកម្មវិធីពិសេសនោះមិនផុតពីឆ្នាំ២០២៤ នោះទេ ហើយតាមប្រភពថាពេលនេះពួកគេបានជ្រើសរើសយកទីតាំងប្រារពពិធីទៅហើយតែមិនទាន់ចង់បញ្ចេញដោយនាងគីមមួយ ថាមិនអាចនិយាយបានថាការនៅថ្ងៃខែ ណាជាមុននោះគឺដោយសារតែចង់ឲ្យFan Surprise ។
ប៉ាច គីមមួយ ជាតារាចិត្តសៀងម្នាក់ដែលបដិសេធសំណើរសុំចិញ្ចឹមពីបុរសមានទ្រព្យមួយចំនួនបើទោះជានាងអាចក្លាយទៅជាសេដ្ឋីមួយរំពេចឲ្យតែហ៊ានលោតឆ័ត្រក្ដី តែតារាសាច់សខ្ចីរូបនេះថានាងមិនស្នេហាបុរសវ័យចំណាស់នោះទេ ព្រោះបុរសដែលមានវ័យចាប់ពី៤០ឆ្នាំឡើងមកសុំស្រលាញ់នាងគឺនាងអត់អារម្មណ៍ ដោយសារតែនាងស្នេហាតែប្រុសក្មេង។ពីដំបូងការវាចារបស់នាងគីមមួយ អាចមិនសូវមានអ្នកជឿរជាក់ ឬអ្នកខ្លះថានាងចេះតែនិយាយតែពេលលុយធំមកដល់នឹងបាត់ជំហ តែពេលអតីតបេក្ខភាពCell Card Star រូបនេះភ្ជាប់ពាក្យជាមួយលោកសយ រតនៈ កាលពីថ្ងៃទី១ ខែកក្កដា ឆ្នាំ២០២២ ទើបម្នាក់ៗជឿរថាគីមមួយ អត់ត្រូវការប្រុសចាស់ម្បូរលុយដុល្លារនោះទេ តែនាងចង់បានស្នេហាពិតពីបុរសម្នាក់ដែលយល់ច្បាស់ពីអាជីពសិល្បៈរបស់នាងដើម្បីរក្សារចំណងស្នេហាបានយូរអង្វែង។
ការសម្រេចចិត្តយកស្វាមីក្មេងជាតារាចម្រៀងរបស់នាងប៉ាច គីមមួយ ដោយមិនបារម្ភខ្លាចដើរតាមគន្លងចាស់សារជាថ្មីរបស់នាងគីមមួយ នេះនាំឲ្យនាងកប់ចោលស្រមោលស្នេហ៍អតីតកាលដែលធ្លាប់បរាជ័យស្នេហ៍១លើកក្រោយចែកផ្លូវជាមួយអតីតប្ដីដែលជាតារាចម្រៀងម្នាក់ដែរនាពេលអតីតកាលនោះ ហើយច្បាស់ណាស់ថាលោករតនៈ ពិតជាមានបេះដូងស្មោះនិងបង្ហាញភាពច្បាស់លាស់ជូននាងយ៉ាងកក់ក្ដៅនោះគឺការចូលចែចូវតាមផ្លូវច្បាប់ ខណៈដែលលោកក៍បានទាត់ចោលសំណើរស្នេហ៍ពីស្រ្ដីវ័យចំណាស់សម្បូរទ្រព្យមួយចំនួនផងដែរ មុនចាប់ដៃនាងគីមមួយ ជាអនាគតភរិយានេះ។ ក្រៅពីប៉ាច គីមមួយ តារាដែលយកប្ដីជាតារាដូចគ្នាដែរមានដូចជាអ្នកនាងគង់ សុជាតិ ,ខាត់ សុឃីម ,យក់ ថិតរដ្ឋា ,ទេព បូព្រឹក្ស ,ម៉ានីកា និងគង់ ច័ន្ទស្រីមុំ ជាដើម។អ្នកជំនាញសិល្បៈលោកគួច ខេវិន ធ្លាប់មានប្រសាសន៍ថាតារាដែលយកគ្រួសារជាអ្នកនៅក្នុងរង្វង់សិល្បៈដូចគ្នា គឺនឹងរក្សារចំណងស្នេហាបានយូអង្វែងជាងយកអ្នកនៅក្រៅពីអាជីពមួយនេះ។សម្រាប់តារាបានស្វាមីក្មេងជាងខ្លួនដូចគីមមួយ ដែរនោះមានអ្នកនាងគង់ សុជាតិ ,ខាត់ សុឃីម និងពេជ្រ សោភា នេះឯង៕
