ព្រៃវែង ៖ បុរស៣នាក់ បានជួបជុំគ្នាផឹកស៊ី និងច្រៀងលេងកម្សាន្តសប្បាយទ្រហឹងពេញភូមិ លុះក្រោយពី ស្រវឹងធ្លាក់ភ្នែករៀងខ្លួន កើតមានជម្លោះពាក្យសម្តី ពីរឿងច្រៀងមិនស្មើភាពគ្នា ដោយបុរសម្នាក់ច្រៀងតែឯង លុះដៃគូផឹកស៊ីចង់ច្រៀងដែរ បែរជាហាមឃាត់ ទើបធ្វើឱ្យភាគីដែលមិនបានច្រៀង ផ្ទុះកំហឹង ទាញកាំបិត កាប់ចំនួន៣កាំបិត បណ្តាលឱ្យរងរបួសធ្ងន់ និងត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ចំណែកជន ដៃដល់ ត្រូវសមត្ថកិច្ចចាប់ឃាត់ខ្លួន នាំយកទៅចាត់ការតាមច្បាប់។
ករណីអំពើហិង្សានេះ បានកើតឡើង កាលពីវេលាម៉ោង ៥និង១៥នាទីល្ងាច ថ្ងៃទី២៣ ខែសីហា ឆ្នាំ២០២៣ នៅ ចំណុចផ្ទះឈ្មោះឥត ឃ្លី ស្ថិតក្នុងភូមិសាមគ្គី ឃុំស្វាយភ្លោះ ស្រុកពាមជរ។ជនសង្ស័យដែលកាប់គូទំនាស់ ៣កាំ បិត និងត្រូវសមត្ថកិច្ចចាប់ឃាត់ខ្លួន មានឈ្មោះឡុង ឈីត ភេទប្រុស អាយុ២៥ឆ្នាំ មានលំនៅក្នុង ភូមិ-ឃុំ កើត ហេតុខាងលើ។ ចំណែកជនរងគ្រោះ មានឈ្មោះពៅ វីរៈ ភេទប្រុស អាយុ២៧ឆ្នាំ មានលំនៅក្នុងភូមិ កើត ហេតុ ខាងលើជាមួយគ្នា (របួស៣កន្លែង ត្រង់ក្បាល ស្មា និងត្រចៀក)។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ គេឃើញឈ្មោះឡុង ឈីត (ជនសង្ស័យ) ឈ្មោះ ពៅ វីរៈ (ជនរងគ្រោះ) និងឈ្មោះឥត ឃ្លី (ជាម្ចាស់ផ្ទះ) បានជួបជុំគ្នាផឹកស៊ី និងច្រៀងលេងកម្សាន្ត ដោយយក ទូរស័ព្ទរបស់ឈ្មោះឡុង ឈីត (ជនសង្ស័យ) មកចាក់ច្រៀង។ លុះក្រោយមក ខណៈដែលស្រវឹងជោករៀងខ្លួន ស្រាប់តែជនរងគ្រោះឈ្មោះពៅ វីរៈ ចេះតែច្រៀងម្នាក់ឯង ១បទហើយ ១បទទៀត មិនឱ្យគេច្រៀងសោះលុះ ពេលជនសង្ស័យឈ្មោះឡុង ឈីត សុំច្រៀងម្តង ជនរងគ្រោះមិនព្រមឱ្យច្រៀង ជាហេតុធ្វើឱ្យអ្នកទាំងពីរបាន កើតមានជម្លោះពាក្យសម្តីនឹងគ្នា។ បន្ទាប់មក ជនសង្ស័យបានយកទូរស័ព្ទខ្លួនវិញ រួចដើរចេញទៅផ្ទះបាត់ទៅ លុះបន្តិចក្រោយមក ក៏ត្រឡប់មកវិញ ដោយកាន់កាំបិតមកជាមួយផង រួចក៏ស្ទុះទៅកាប់ជនរងគ្រោះចំនួន ៣កាំបិត បណ្តាលឱ្យរងរបួស ៣កន្លែង ត្រង់ក្បាល ស្មា និងត្រចៀក យ៉ាងធ្ងន់តែម្តង។
ក្រោយពីទទួលបានព័ត៌មានខាងលើភ្លាម កម្លាំងនគរបាល នៃអធិការដ្ឋាននគរបាលស្រុកពាមជរ បានចុះ អន្តរាគមន៍ និងចាប់ឃាត់ខ្លួនជនសង្ស័យ យកមកសាកសួរនៅអធិការដ្ឋាននគរបាលស្រុកពាមជរ។ ចំណែក ជនរងគ្រោះ ត្រូវបានបញ្ជូនទៅព្យាបាលនៅមន្ទីរពេទ្យឯកជន មួយកន្លែង។
ជនសង្ស័យ ត្រូវបានកម្លាំងនគរបាលបញ្ជូនទៅអធិការដ្ឋាននគរបាលស្រុកពាមជរ ដើម្បីសាកសួរ និងកសាង សំណុំរឿង ចាត់ការបន្តតាមនីតិវិធី៕