ភ្នំពេញ៖តារាវ័យ២៦ឆ្នាំនាងតន់ ច័ន្ទសីម៉ា តែងតែថ្ងូរដូចព្រាបថាអត់សង្សារ បណ្ដើរដូចគេឬគ្មានអ្នកយល់ចិត្ត…។តែការវាចារបស់ស្រីស្រស់បែបនេះនាងបានដឹងខ្លួនឯងទៅហើយថាមិនមានអ្នកជឿរជាក់ច្រើនលើនាងទេ។យ៉ាងណាសីម៉ា នៅតែអត់ព្រមបញ្ចេញមុខគូស្នេហ៍ឲ្យគេបានស្គាល់ដដែល ខណៈដែលតាមព័តមានថាការដែលនាងសីម៉ា ថាអត់បណ្ដូលចិត្តនោះគឺគ្រាន់តែនាងចង់សាកចិត្តFan ប៉ុណ្ណោះថារូបនាងសម្រស់ប៉ុណ្ណឹងដែរហើយល្បីទៀតអីចឹងបើនិយាយថានៅទំនេរមានគេព្រមជឿរ ឬអត់ តែទីបំផុតអត់មានអ្នកជឿរជាក់លើនាងទេពោលគឺដូចការស្មានរបស់នាងតាំងពីដំបូងម្លេះ។
ទោះជាយ៉ាងណាក្រៅពីនាងតន់ ច័ន្ទសីម៉ា តារាផ្នែកយុវវ័យមួយចំនួនទៀតមានដូចជានាងរ៉េត ស៊ូហ្សាណា និងយូរី ជាដើមពេលនេះពួកគេសុទ្ធតែជ្រើសផ្លូវសាងស្នេហ៍ដោយមិនបើកចំហដូចគ្នា ខណៈដែលនាងសីម៉ា វិញពេលនេះក៍មានម្ដាយតាមការពារជាប្រចាំផងដែរ ហេតុនេះហើយបុរសដែលចង់ញ៉ែនាងបែបឆក់កណ្ដៀតនោះប្រាកដជាមិនអាចទៅរួចនោះទេ។ប្រភពបានឲ្យដឹងថានាងតន់ ច័ន្ទសីម៉ា ត្រូវបានលោកឧកញ៉ាពោះម៉ាយម្នាក់តាមស្នេហាតែនាងបែជាមិនអើពើរនឹងតំណែងជំទាវនោះឡើយ ទើបពេលនេះលោកឧកញ៉ាលែងព្យាយាមរាយអន្ទាក់ស្នេហ៍លើនាងទៀត ហេតុនេះហើយបានជាតារារួមអាជីពបានលើកឡើងថាសីម៉ា ថ្ងូរអត់សង្សារនោះការពិតមកពីនាងមិនយក មិនមែនគ្មានប្រុសស្រលាញ់ទេ …។
តន់ ច័ន្ទសីម៉ា បានសម្រុកចេញវាយលុកទីផ្សារចម្រៀង១ប្រាវទៀតនៅរដូវបុណ្យភ្ជុំបិណ្ឌនេះ ស្របពេលដែលតារាប្រុសទាំង៣លំដាប់ជូរមុខមានលោកព្រាប សុវត្ថិ ,ខេមរៈ សិរីមន្ដ និងខេម នៅតែជាដៃគូរបស់នាងតែម្នាក់ដដែល បើទោះជាការមកដល់របស់ហ៊ិន លីដា ដែលមានសម្ថភាពមិនចាញ់នាងនោះត្រូវបានគេរំពឹងថានឹងធ្វើឲ្យមានការប្រជែងទីផ្សារចម្រៀងពីនាងបានខ្លះៗក្ដី តែនៅទីបំផុតGalaxy នៅតែទុកចិត្តលើនាងជាងគេដដែល ស្របពេលដែលដំណឹងផលិតកម្មថ្មី ហ៊ានចាយលុយធំនេះគ្រោងទិញពេជ្រ សោភា និងមាស សុខសោភា ទៅចាប់ដៃគូជាមួយតារាប្រុសរបស់ខ្លួនកុំឲ្យច្រៀងតែជាមួយដៃគូដដែលៗនាំឲ្យទស្សនិកជនធុញទ្រាន់នោះពេលនេះបានស្ងប់ស្ងាត់ទៅវិញ ទើបសីម៉ា នៅតែជាតួឯកតទៅទៀត។ប្រភពបានឲ្យដឹងថានាងច័ន្ទសីម៉ា ដែលមានការគាំទ្រហាក់ចុះខ្សោយជាងមុន នៅដើមឆ្នាំ២០២៣ ព្រោះតែនាងចេញមុខការពារថៅកែស្ទួនៗនោះអាចនឹងឡើងខ្លាំងជាថ្មីម្ដងទៀតនៅពេលបុណ្យភ្ជុំបិណ្ឌខាងមុខនេះប្រសិនបើចម្រៀងរបស់នាងធ្វើត្រូវដូចមុន។ប៉ុន្ដែនាងសីម៉ា ក្រោយអត់ពីលោកឧកញ៉ាយឹម តាស្រង់ និពន្ធឲ្យច្រៀងដូចមុនទៀតនោះ ពេលនេះចម្រៀងរបស់នាងលែងសូវមានបទផ្ទុះដូចមុនទៀតហើយ ពោលគឺហាក់ពិបាកមានបទផ្ទុះ ទោះជាស្រីស្រស់ត្រូវបានគេចាត់ទុកថានាងមានដៃគូចម្រៀងល្អបំផុតនៅឆ្នាំ២០២៣ ដែលគ្មានតារាស្រីរូបណាអាចធ្វើបានដូចនាងក៍ដោយ។
អ្នកជំនាញសិល្បៈបានលើកឡើងថាថៅកែGalaxy នៅតែពេញចិត្តសីម៉ា ព្រោះនាងច្រៀងបានច្រើនទម្រង់ហើយបើសិនជានាងមិនខ្លាំងទេ ម្លេះព្រា សុវត្ថិ ,ខេមរៈ សិរីមន្ដ និងខេម នឹងមិនព្រមធ្វើជាដៃគូចម្រៀងរបស់នាងតែម្នាក់បែបនេះឡើយ។ប៉ុន្ដែប្រសិនបើGalaxy ពិតជានៅរក្សារដាក់គោលដៅទិញទិញមាស សុខសោភា និងពេជ្រ សោភា មកច្រៀងជាមួយតារាប្រុសល្បីៗរបស់ខ្លួនមែន នោះសន្ទុះរបស់នាងច័ន្ទសីម៉ា នឹងមានការប្រែប្រួលពោលគឺការគាំទ្រប្រាកដជាមានការបែកខ្ញែកជាមិនខាន។ប្រភពបានឲ្យដឹងថាGalaxy នឹងមិនអាចធ្វើឲ្យទស្សនិកជនធុញទ្រាន់ក្នុងការយកតារាប្រុសល្បីទាំង៣របស់ខ្លួនមកច្រៀងតែជាមួយតារាស្រីតែម្នាក់ជារៀងរហូតនោះទេ ហេតុនេះហើយមិនយូឡើយនាងសីម៉ា នឹងមានដៃគូពិតប្រជែងនៅទ្រនុំតែមួយជាមិនខានដែលពេលនោះតំណែងរបស់នាងក៍មានការប្រែប្រួលភ្លាមៗដែរ។តែនាងសីម៉ា បានដឹងខ្លួនរួចជាស្រេចទៅហើយថាលើលោកនេះគ្មានអ្វីថិតថេរទេ និងពេលខ្លះនាងថា១០ឆ្នាំទៀតមិនដឹងថាមានរឿងអ្វីកើតឡើងឡើយ ព្រោះគ្មានអ្នកណាដឹងមុន។
តន់ ច័ន្ទសីម៉ា បានកែប្រែវាសនាដូចមេឃនិងដីព្រោះពីមុននាងច្រៀងនៅតាមហាង១យប់បានតម្លៃតែជាង១០ដុល្លារ ឥឡូវច្រៀង១កម្មវិធីពី៥ទៅ៦បទ ស៊ីថ្លៃ៥ពាន់ដុល្លារ ហើយប្ដូរពីជិះម៉ូតូមកជិះរថយន្ដទំនើប និងធ្លាប់រស់នៅបន្ទប់ជួល១ខែ៦០ដុល្លារម្ដុំស្ដុបDN មកជាផ្ទះប្រណិតផ្ទាល់ខ្លួន។តែអំឡុងពេលសីម៉ា ចម្រៀងនាងធ្លាក់Views តែមិនព្រមទម្លាក់តម្លៃខ្លួននេះធ្វើឲ្យអ្នកដឹកនាំកម្មវិធីប្រគុំតន្រ្ដីជាច្រើនពិសេសនៅតាមស្ថានីយ៍ទូរទស្សន៍ឈឺក្បាលដោយសារតែនាងព្រោះពួកគេគ្មានលទ្ធភាពជួលនាងច្រៀងនាំឲ្យអតីតបេក្ខភាពThe Voice Cambodia រដូវកាលទី២នេះ បាត់មុខសឹងគ្រប់ស្ថានីយ៍តែម្ដងជាង២ឆ្នាំមកនេះលើកលែងតែកម្មវិធីនោះរៀបចំដោយថៅកែរបស់នាង៕
