ភ្នំពេញ៖ព្រាប សុវត្ថិ នឹងដឹកដៃកូនប្រុសរបស់លោកគឺកំលោះសង្ហារសុវត្ថិ មុនីវណ្ណ ទៅច្រៀងសម្ដែងនៅប្រទេសកូរ៉េ នាអំឡុងពិធីបុណ្យភ្ជុំបិណ្ឌនាពេលខាងមុខនេះហើយ។ប្រភពបានឲ្យដឹងថាលោកខេមរៈ សិរីមន្ដ រួមទាំងតារាចម្រៀងល្បីៗរបស់Galaxy មួយចំនួនទៀតក៍ត្រូវរួមតំណើរជាមួយផងដែរ។នេះមិនមែនជាលើកទីមួយនោះទេ សម្រាប់លោកព្រាប សុវត្ថិ ពោលគឺកមុនពេលចូលGalaxy លោកក៍ធ្លាប់ចេញទៅច្រៀងសម្ដែងនៅទីនោះតាមរយៈការរៀបចំរបស់ផលិតកម្មមួយនេះផងដែរ។
សូមបញ្ជាក់ថាព្រាប សុវត្ថិ តាំងពីចូលច្រៀងនៅGalaxy រយៈពេលជាង៣ឆ្នាំនេះលោកមិនដែលចេញទៅច្រៀងសម្ដែងនៅប៉ែកអ៊ឺរ៉ុបដូចឆ្នាំមុនៗនោះទេ ខណៈដែលការសម្ដែងក្នុងស្រុកក៍កាត់បន្ថយផងដែរតាំងពីលោកទទួលបានគោរម្យងារជាឧកញ៉ារយៈពេលជាង១ឆ្នាំមកនេះពោលគឺយូៗបានគេឃើញអតីតតារាហង្សមាសរូបនេះចេញច្រៀងនៅតាមក្លឹបកម្សាន្ដ និងConcerts ដែលរៀបចំដោយផលិតកម្មរបស់លោកម្ដងម្កាលប៉ុណ្ណោះ។ប៉ុន្ដែនៅចំពោះមុខអ្នកសារព័តមានកន្លងមកលោកសុវត្ថិ អះអាងថាទោះជាលោកក្លាយទៅជាអ្វីក៍មិនបោះបង់អាជីពចម្រៀងចោលដែរពោលគឺនៅបន្ដច្រៀងសម្ដែងស្មើគ្នាទៅនិងការធ្វើជំនួញ។
មជ្ឈដ្ឋានមហាជនមើលឃើញថាព្រាប សុវត្ថិ ទោះជាលែងមានបទចម្រៀងល្បីល្បាញដូចមុនក្ដី ប៉ុន្ដែGalaxy នៅតែចាត់ទុកលោកជាតួឯក ពោលគេមិនទាន់ឃើញផលិតកម្មនេះលើកតារាប្រុសរូបណាឲ្យវ៉ាលោកនោះទេក្នុងនោះមានទាំងខេមរៈ សិរីមន្ដ ផងដែរដែលកន្លងមកធ្លាប់លេចឭថាតារាទាំងពីរមិនសូវត្រូវគ្នា តែការប៉ៈគ្នាជាលើកទី២នេះគេឃើញទាំងលោកសុវត្ថិ និងសិរីមន្ដ ព្យាយាមបង្ហាញពីភាពចុះសម្រុងគ្នាតាមរយៈការស្និតស្នាលគ្នាជាបន្ដបន្ទាប់ បើទោះជាមិនទាន់មានបទចម្រៀងចេញរួមគ្នាតែ២នាក់ក្ដី។ដោយឡែកអ្នកជំនាញសិល្បៈលោកនូ ស៊ឹប បានអះអាងកាលពីពេលថ្មីៗនេះថាបច្ចុប្បន្នព្រាប សុវត្ថិ និងខេមរៈ សិរីមន្ដ ដូចគ្នា ពោលគឺលែងបុកច្រៀងដូចមុនទៀតហើយ ដែលរឿងនេះមូលហេតុមកពីលោកសុវត្ថិ និងសិរីមន្ដ ក្រោយឡើងឧកញ៉ាមិនពឹងលើសិល្បៈទាំងស្រុងទៀតទេ ពោលគឺងាកទៅធ្វើជំនួញច្រើនជាង ព្រោះពេលនេះមានលុយ ហើយការចេញច្រៀងទោះជាបានតម្លៃខ្លួនថ្លៃមែនក៍មិនមែនចំណូលនោះមកទាំងស្រុងដែរ។
ព្រាប សុវត្ថិ បាននាំកូនប្រុសច្បងសុវត្ថិ មុនីវណ្ណ ទៅតាមច្រៀងនៅGalaxy តាមខ្លួនហើយកាលពីដើមឆ្នាំ២០២៣ លោកបានឡង់សេកូនជាថ្មីតាមរយៈការច្រៀងជាដៃគូជាមួយគ្នាដូចកាលនៅហង្សមាស។ប៉ុន្ដែកូនប្រុស២រូបផ្សេងទៀតរបស់លោកគឺសុវត្ថិ មុនីនាគ និងសុវត្ថិ សិរីវុឌ្ឍ នៅមិនទាន់ចូលទៅច្រៀងជាមួយលោកនោះទេ ក្រោយពួកគេចាកចេញពីហង្សមាសហើយរឿងដែលោកយកកូន១ចូលGalaxy ទុកកូន២ឲ្យនៅខាងក្រៅនេះត្រូវបានលោកនូ ស៊ឹប អះអាងថានោះដោយសារតែលោកសុវត្ថិ ចង់រក្សារតម្លៃកូនៗរបស់លោកឲ្យបានល្អ។
ថ្វីត្បិតតែព្រាប សុវត្ថិ លែងសូវមានបទផ្ទុះដូចហង្សមាសមែនតែបើប្រៀបធៀបពេលវេលាដែលលោកច្រៀងនៅផលិតកម្មចាស់និងថ្មីក៍នៅខុសគ្នាឆ្ងាយណាស់ដែរ ព្រោះតារាវ័យ៤៨ឆ្នាំរូបនេះជ្រកនៅហង្សមាសបាន២៣ឆ្នាំ(១៩៩៧-២០២០) តែនៅGalaxy ទើបតែជាង៣ឆ្នាំប៉ុណ្ណោះហើយចំនួនកុងត្រារបស់លោកតំណាក់កាលដំបូងនៅសល់ជាង១ឆ្នាំ ។អ្វីដែលគ្រប់គ្នាមើលឃើញពេលនេះគឺលោកសុវត្ថិ ដែលធ្លាប់តែច្រៀងភាគច្រើនបទបកប្រែពីចិន និងថៃ នៅហង្សមាសនោះពេលនេះលោកមានបទ Original Songs ច្រើនជាងមុន។តែទាក់ទងតម្លៃខ្លួនវិញក្រោយឡើងឧកញ៉ានេះព្រាប សុវត្ថិ មិនបញ្ជាក់ទេថាតើលោកលោកតំឡើងដូចលោកប៊ុនថៃ ដែរ ឬយ៉ាងណាឡើយនោះទេ។ក្រៅពីអាជីពចម្រៀងព្រាប សុវត្ថិ ក៍មានជាមន្រ្ដីក្នុងជូររាជការមានក្របខណ្ឌនៅក្រសួងការពារជាតិដែលបច្ចុប្បន្នលោកមានឋានន្ដរស័ក្កជាជាវីរៈសេនីឯក និងជានាយរងការិយាល័យទី៥នៃកងទ័ព្ទជើងគោក ផងដែរ។
អ្នកជំនាញសិល្បៈបានលើកឡើងថាព្រាប សុវត្ថិ ទោះជាអាយុរាងជ្រេបន្ដិចមែន តែបើធ្វើបទត្រូវគឺលោកនៅល្បី ព្រោះសម្លេងលោកមិនទាន់ធ្លាក់ចុះទេ។តែការដែលលោកសុវត្ថិ ធ្លាប់មានដៃគូតារាស្រីជាច្រើននៅហង្សមាសហើយពេលនេះលោកច្រៀងតែជាមួយនាងតន់ ច័ន្ទសីម៉ា ម្នាក់នោះជាហេតុធ្វើឲ្យFan របស់លោកខ្លះមិនចង់ឃើញដដែលបែបនេះទេ ហើយគេជឿរថាដើម្បីឲ្យទីផ្សារចម្រៀងមានការប្រែប្រួលលោកឧកញ៉ារូបនេះនឹងរកបានដៃគូថ្មីបន្ថែមពីលើនាងសីម៉ា ក្នុងពេលឆាប់ៗនេះជាមិនខាន ៕