ខេត្តកណ្តាល ៖ បុរសម្នាក់ បានចេញទៅរាយបង្កៃសន្ទូចតាមវាលស្រែរកត្រី យកមក ធ្វើម្ហូបតាមទម្លាប់ លុះបាត់យូរពេកមិនឃើញ ត្រឡប់មកផ្ទះ ប្រពន្ធក៏ចេញទៅតាមរក ស្រាប់ តែប្រទះឃើញប្តីដេកស្លាប់ផ្កាប់មុខកណ្តាលស្រែ ដោយសារតែដើរទាក់ខ្សែលួសដែលគេរាយឆក់ សត្វកណ្តុរ បណ្តាលឱ្យឆ្លងចរន្តឆក់ស្លាប់យ៉ាង អាណោចអាធ័ម កាលពីវេលាម៉ោង១០និង ១៥នាទីយប់ ថ្ងៃទី១៩ ខែមករា ឆ្នាំ២០១៧ នៅចំណុចវាលស្រែ ស្ថិតក្នុងភូមិលេខ៥ ឃុំ ប្រាសាទ ស្រុកស្អាង។
ជនរងគ្រោះដែលត្រូវខ្សែលួសឆក់កណ្តុរឆក់ស្លាប់នោះ មានឈ្មោះព្រុំ ដន ហៅហើម អាយុ៣០ឆ្នាំ មុខរបរកសិករ មានលំនៅក្នុង ភូមិកើតហេតុខាងលើ។
តាមសម្តីស្ត្រីជាប្រពន្ធជនរងគ្រោះ បាន រៀបរាប់ប្រាប់ថា នៅមុនពេលកើតហេតុ កាល ពីវេលាម៉ោង៥ល្ងាច ថ្ងៃទី១៩ ខែមករា ឆ្នាំ ២០១៧ ប្តីរបស់នាងបានចេញទៅចងសន្ទូចនៅ តាមវាលស្រែដូចសព្វមួយដង លុះដល់វេលា ម៉ោង៩យប់ថ្ងៃដដែល ដោយបាត់ប្តីមិនឃើញ ត្រឡប់មកផ្ទះវិញ ទើបនាងព្រួយបារម្ភ ក៏ពឹង អ្នកជិតខាងឱ្យចេញទៅជួយតាមរកប្តីជាមួយ នាង។ រហូតមកដល់វេលាម៉ោង១០និង១៥ នាទីយប់ថ្ងៃដដែល ខណៈដែលដើរទៅរកប្តី ដល់ចំណុចកើតហេតុខាងលើ ក៏ស្រាប់តែប្រទះ ឃើញប្តីរបស់នាងដេកផ្កាប់មុខស្លាប់កណ្តាល ស្រែយ៉ាងអាណោចអាធ័ម ដោយសារតែឆក់ ជាប់ខ្សែលួសឆក់កណ្តុរដែលអ្នកភូមិម្នាក់ ឈ្មោះ ខាត់ សម្បត្តិ រាយព័ទ្ធជុំវិញស្រែរបស់គេ ដើម្បី ការពារសត្វកណ្តុរ។
ក្រោយកើតហេតុ អ្នកភូមិរួមនិងប្រពន្ធ ជនរងគ្រោះបាននាំគ្នាសែងយកសពជនរងគ្រោះ ត្រឡប់មកលំនៅឋានវិញ លុះព្រឹកថ្ងៃទី២០ ខែមករា ឆ្នាំ២០១៧ ទើបរាយការណ៍ប្រាប់ មេភូមិ និងសមត្ថកិច្ចមូលដ្ឋានឱ្យចុះមកជួយ អន្តរាគមន៍។
ប្រភពពីសមត្ថកិច្ចមូលដ្ឋាន បានបញ្ជាក់ ថា ក្រោយទទួលបានសេចក្តីរាយការណ៍ពី ប្រជាពលរដ្ឋថា មានករណីមនុស្សដើរទាក់ខ្សែ លួសឆក់កណ្តុរស្លាប់ សមត្ថកិច្ចបានចុះពិនិត្យ និងធ្វើកោសល្យវិច័យសព រួចបញ្ជាក់ថា ជន រងគ្រោះពិតជាត្រូវខ្សែលួសឆក់សត្វកណ្តុរ ឆក់ ស្លាប់ប្រាកដមែន នៅគ្រាដែលជនរងគ្រោះដើរ ដាក់បង្កៃរកត្រីនៅតាមវាលស្រែ ដោយនៅលើ ខ្លួនប្រាណសព មានស្នាមត្រង់កំភួនដៃឆ្វេង ១កន្លែង និងក្លៀកខាងឆ្វេងមួយកន្លែង។ បន្ទាប់ មក សមត្ថកិច្ចបានចុះពិនិត្យដល់ទីតាំងកើត- ហេតុ និងដកហូតវត្ថុតាង រួមមានអាំងវិចទ័រ ចំនួន១គ្រឿង អាគុយម៉ាកប៉ាណាសូកា កម្លាំង ៥០អំពែរ ពណ៌ក្រហមលាយស ចំនួន១គ្រឿង ព្រមទាំងខ្សែលួសជាច្រើនម៉ែត្រទៀតផង។
សពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីរៀបចំធ្វើបុណ្យតាម ប្រពៃណី៕