ភ្នំពេញ៖តារាចម្រៀងដ៍មានអំណាចរបស់ហង្សមាសឱក សុគន្ធកញ្ញា បានចេញសារថ្លែងអំណរគុណចំពោះFan ទាំងឡាយដែលបានជូនពរនាងនៅថ្ងៃខួបកំណើតគម្រប់អាយុ៣៧ឆ្នាំកាលពីថ្ងៃទី១៤ កញ្ញា បើទោះជានាងមិនបានធ្វើពិធីជប់លៀងជួបជុំអ្នកគាំទ្រដោយផ្ទាល់ក្ដី។ប៉ុន្ដែសុគន្ធកញ្ញា ធ្វើខួបជាលក្ខណៈគ្រួសារហើយស្វាមីនាងលោកអ៊ឹង សុខលី បានចេញសារថា”Happy Birthday To My beautiful wife “។បើទោះជាលោកសុខលី មិនបានបង្ហាញឲ្យឃើញថាលោកបានជូនកាដូអ្វីខ្លះទៅភរិយាក្ដី ប៉ុន្ដែការសរសើរភរិយាបែបនេះពិតជាធ្វើឲ្យភរិយាលោកសប្បាយរីករាយចិត្តខ្លាំងណាស់។តែគេកត់សម្គាល់ថាសម្រាប់ខួបកំណើតឆ្នាំនេះសុគន្ធកញ្ញា បានជូនកាដូធំពិសេសទៅស្វាមីនាងរួចហើយនោះគឺការពពោះកូនស្រីបានដូចបំណងដែលធ្វើឲ្យលោកសុខលី លែងខកចិត្ដតដូចឆ្នាំមុនៗទៀតព្រោះឲ្យតែនៅថ្ងៃខួបអាពាហ៍ពិពាហ៍ របស់ពួកគេនៅថ្ងៃទី១៦ ឧសភា និងថ្ងៃខួបកំណើតនសុគន្ធកញ្ញា នៅថ្ងៃទី១៤ កញ្ញា នោះមានតារារួមអាជីពនិងFan ជាច្រើនបានចេញសារជូនពរកញ្ញា ឲ្យសម្រេចបំណងយកកូនទី២ឲ្យបានដូចចិត្តតែពាក្យនេះត្រូវរងចាំដល់ទៅ៣ឆ្នាំ ពោលគឺតាំងពីឆ្នាំ២០២០ រហូតដល់ឆ្នាំ២០២៣ ទើបប្អូនថ្លៃថៅកែហង្សមាសរូបនេះទទួលបានកូន១ទៀតដូចក្ដីប្រាថ្នា។ពិតណាស់បើតាមសកម្មភាពរបស់លោកសុខលី គឺលោកពិតជាស្រលាញ់និងថ្នាក់ថ្នមសុគន្ធកញ្ញា លើសដើមមែន ក្រោយនាងមានផ្ទៃពោះកូនទី២ នេះធ្វើឲ្យអ្នកខ្លះដែលព្យាករណ៍មុនកញ្ញា រៀបការជាមួយលោកសុខលី ថាតារាចម្រៀងរូបនេះនឹងប្រឈមទឹកភ្នែកព្រោះតែប្អូនថៅកែហង្សមាសរូបនេះមានស្រីស្នេហ៍ច្រើននោះពេលនេះអ្វីៗមិនដូចការគតិទុកនោះឡើយព្រោះតែលោកក៍មិនដែលលេចឭរឿងអាស្រូវមានស្នេហាជាមួយតារាណាទៀតដែររយៈពេលជាង៣ឆ្នាំមកនេះ។
គេកត់សម្គាល់ថានៅឆ្នាំមុនៗនៅថ្ងៃខួបកំណើតឱក សុគន្ធកញ្ញា និងស្វាមីច្រើនតែនាំនាង ទៅដើរកម្សាន្ដនៅបរទេសក្នុងនោះញឹកញាប់ជាងគេគឺប្រទេសអូស្រា្ដលីដោយសារតែម្ដាយនិងប្អូនប្រុសនាងកំពុងរស់នៅទីនោះ។ដោយឡែកឆ្នាំនេះសុគន្ធកញ្ញា និងប្ដីមិនចេញទៅក្រៅស្រុកទៀតទេ ព្រោះកាលពីខែមុននាងទើបតែបានវិលត្រឡប់មកពីដើរលេងអូស្រា្ដលី ម្យាងពេលនេះនាងជាប់ដៃធ្វើជាCoach កម្មវិធីThe Voice Cambodia រដូវកាលទី៣ វគ្គLive Show មិនអាចថតទុកដូចមុនបានទៀតទេ ទើបការចេញទៅបរទេសនិងវិលវិញឲ្យទាន់ការធ្វើជាគ្រូបង្វឹគទាំងប្រថុចញ៉ុចធ្វើឲ្យនាងពិបាកបានជាជ្រើសតំណើរកម្សាន្ដក្នុងស្រុក។អ្វីដែលគូរឲ្យចាប់អារម្មណ៍ទោះជាពេលនេះកញ្ញា មានផ្ទៃពោះក្ដីតែនាងទទួលច្រៀងសម្ដែងជាធម្មតាដូចជានៅថ្ងៃទី១ ខែ១០ ខាងមុខនេះនាងច្រៀងកម្មវិធីមង្គលការមួយដ៍ធំទៀតផងជាមួយតារាជាច្រើនដួងទៀតដែលរៀបចំដោយលោកអាឡិច ចាន់ត្រា ។
ក្រៅពីឱក សុគន្ធកញ្ញា តារាពពោះនៅឆ្នាំ២០២៣ (ឆ្នាំថោះ)នេះមានដូចជាគង់ ច័ន្ទរដ្ឋា និងស៊ឹម សូលីកា ជាដើម ខណៈដែលកញ្ញា នឹងត្រៀមសម្រាលនៅដើមឆ្នាំ២០២៤ ខាងមុខ។អ្វីដែលគូរឲ្យចាប់អារម្មណ៍នោះនៅពេលផ្ទៃពោះមិនទាន់ខ្ទាតធំនេះសុគន្ធកញ្ញា កាន់តែលេងឈុតពិសេសៗពេលធ្វើជាគ្រូបង្វឹកThe Voice Cambodia រដូវកាលទី៣នេះហើយនាងថែមទាំងមានវិធីនៃការតុបតែងខ្លួនមើលសឹងតែមិនដឹងថាមានកូនឡើយ។
អ្នកតាមដានបទចម្រៀងរបស់ឱក សុគន្ធកញ្ញា មួយចំនួនបានលើកឡើងថាអាជីពចម្រៀងរបស់សុគន្ធកញ្ញា ប្រឈមលែងស្ទុះឡើងទៀតហើយក្រោយនាងមានកូន២ នេះព្រោះនាងច្រៀងបទយុវវ័យស្នេហាខូចចិត្តលែងសូវត្រូវ។ប៉ុន្ដែលោកនូ ស៊ឹប បានអះអាងថាសុគន្ធកញ្ញា មានសម្ថភាពល្អ ហេតុនេះកុំថាឡើយត្រឹមមានកូន២ ទោះជាកូនដល់៤ ឬ៥នាក់ក៍នៅតែល្បីអីចឹងឲ្យតែនៅចេញបទចម្រៀងទៀត។ប្រភពបានឲ្យដឹងថាឱក សុគន្ធកញ្ញា ចង់សាងស្នាដៃថ្មីតាមរយៈការនាំកូនក្រុមរបស់ខ្លួនលើកពានThe Voice Cambodia រដូវកាលទី៣ មុននាងសម្រាលកូន តែនាងក៍ត្រូវជួបការប្រជែងយ៉ាងស្វិតស្វាញបំផុតពីសំណាក់កូនក្រុមរបស់ពេជ្រ សោភា ,ណុប បាយ៉ារិទ្ធ និងឆន សុវណ្ណារាជ ដែរបើទោះជាកញ្ញា ធ្លាប់នាំលោកថែល ថៃ លើកពានពីកម្មវិធីមួយនេះនៅរដូវកាលទី២ ម្ដងរួចទៅហើយក្ដី ។
ឱក សុគន្ធកញ្ញា ជាតារាមានឥទ្ធិពលបំផុតនៅហង្សមាសដែលពេលខ្លះតារារួមអាជីពចាត់ទុករូបនាងដូចជាថៅកែ ឬម្ចាស់ផលិតកម្មហង្សមាសទៀតផង បើទោះជានាងមិនដែលបង្ហាញកាយវិការប្រែប្រួលខ្លាំងក្រោយក្លាយទៅជាប្អូនថ្លៃលោកថៅកែហង្សមាសជាង៣ឆ្នាំនេះក៍ដោយ។តារាខ្លះថែមទាំងហៅកញ្ញា ថាជាលោកជំទាវៗ បើទោះគេមិនទាន់ឃើញមានព្រះរាជក្រឹត្យតែងតាំងស្វាមីនាងជាលោកឧកញ៉ា ជាផ្លូវការក្ដី ៕