ភ្នំពេញ៖តារាសម្ដែងលោករតនៈ វិសិដ្ឋ បានទៅកម្សាន្ដនៅអាមេរិកហើយកាលពីថ្ងៃទី២៦ កញ្ញា លោកបានទៅលេងដល់ផ្ទះអតីតតារាសម្ដែងអ្នកនាងអ៊ិន សុខលីដា ផ្ទាល់ទៀតផងដែលមើលទៅលីដា មានសម្រស់ប្រែប្រួលជាងមុនច្រើនបើប្រៀបធៀបអំឡុងនាងប្រឡូកសិល្បៈជោគជាំកាលពីឆ្នាំ២០០០ ដល់២០០៥ នោះ ហើយនៅអាមេរិកនាងមិនបានចេញច្រៀងសម្ដែងតាមភោជនីយដ្ឋាន ឬការសម្ដែងសិល្បៈណាមួយដូចអតីតតារាដែលកំពុងរស់នៅទីនោះទេ តែនាងបានបង្កើតមុខរបរផ្ទាល់ខ្លួនលក់ផលិតផលCosmetic តាមOnline ។ប្រភពបានឲ្យដឹងថាតាំងពីចេញទៅរស់នៅអាមេរិកកាលពីឆ្នាំ២០១០ ពោលគឺរយៈពេល១៣ឆ្នាំមកនេះអ្នកនាងសុខលីដា ក៍ធ្លាប់ចុះមកខ្មែរដែរតែនាងមកជាលក្ខណៈស្ងប់ស្ងាត់មិនដែលបង្ហាញខ្លួនឲ្យគេដឹងជាសាធារណៈនោះទេ ទើបមិត្តភក្ដិដែលស្និតនាងខ្លះមិនបានដឹងថានាងមកខ្មែរទៀតផង។ចំណែកកាលពីឆ្នាំ២០២១ សុខលីដា បានសម្រាលកូនស្រីដំបូងរបស់នាងដោយដាក់ឈ្មោះថា”Jenna “ ប៉ុន្ដែគេមិនបានដឹងថាស្វាមីរបស់នាងធ្វើការងារអ្វីនៅទីនោះទេ គឺគ្រាន់តែមានការបង្ហើបថាប្ដីលីដា មិនប្រកាន់រឿងអតីតកាលរបស់នាងឡើយ។
គូររំលឹកថាអ៊ិន សុខលីដា អតីតបវរកញ្ញាទេសចរណ៍ឆ្នាំ២០០២ បានដកខ្លួនចេញពីអាជីពសិល្បៈរយៈពេល១៧ឆ្នាំ(២០០៦-២០២៣)មកហើយ និងបានចេញទៅរស់នៅអាមេរិកកាលពីឆ្នាំ២០០៦ ក្រោយមានរឿងអាស្រូវស្នេហាភេទដូចគ្នាជាមួយលោកស្រីជា រដ្ឋា ទាំងចម្រូងចម្រាស។នៅពេលនេះនាងបានសាងជីវិតថ្មីលើដីអាមេរិកនិងមានក្ដីសុខលែងមានការរំខានឬគំរាមពីអតីតគូស្នេហ៍ដូចកាលនាងរស់នៅស្រុកខ្មែរទៀតហើយ ។ដោយឡែកសម្រាប់លោករតនៈ វិសិដ្ឋ វិញលោកមិនបានបង្ហាញលម្អិតពីការរស់នៅរបស់អ៊ិន សុខលីដា លើទឹកដីអាមេរិកនោះទេ ដែលទំនងអាចជាការសុំមិនឲ្យបង្ហាញពីជីវិតឯកជនរបស់នាងពីសំណាក់លីដា ហើយមានតែតារាជិតដិតប៉ុណ្ណោះដែលអាចទៅលេងនៅផ្ទះរបស់នាងបាន ព្រោះមើលទៅអតីតតារាសម្ដែងរូបនេះមិនដែលបង្ហាញពីការដែលនាងទៅមើលតារាខ្មែរទៅសម្ដែងនៅទីនោះដូចអ្នកសិល្បៈផ្សេងៗទៀតនោះទេ ពោលគឺរក្សារភាពស្ងៀមស្ងាត់។ប៉ុន្ដែតាមព័តមានថាអតិថិជនដែលទិញផលិតផលពីនាងនោះភាគច្រើនគឺជាអ្នករស់នៅខ្មែរ មានទាំងមិត្តភក្ដិធ្លាប់រួមអាជីព និងអ្នកស្រលាញ់គាំទ្រនាងពីមុនជាដើមហើយនាងផ្ញើរទំនិញពីអាមេរិកមកខ្មែរ។
ក្រៅពីអ៊ិន សុខលីដា តារាស្រីដែលយកស្វាមីជាបុរសខ្មែរនៅអាមេរិកមានដូចជាអ្នកនាងអម្ពរ ទេវី ,គឹម លក្ខិណា ,វ៉េត រតនា ,សារ៉ាយ សក្ខណា និងខៀវ សុខារ៉ាវី ជាដើម។សម្រាប់សុខលីដា វិញក្រោយមានកូនស្រី១ជាង២ឆ្នាំនេះគេនៅមិនទាន់ដែលឃើញនាងបង្ហាញពីការរៀបអាពាហ៍ ពិពាហ៍ ជាមួយស្វាមីថ្មីនោះទេ តែអ្នកដែលស្និតនាងបង្ហើបថាកូនស្រីកាត់ទៅរកប្ដីនាងគឺដូចបេះដាក់តែម្ដង។
តារាដែលធ្លាប់រួមអាជីពជាមួយអ៊ិន សុខលីដា និយាយថាពេលនេះលីដា រស់នៅដោយសុវត្ថិភាព និងមានស្វាមីល្អដែលយល់ចិត្តនាង តែខុសពីតារាផ្សេងព្រោះនាងគ្មានគម្រោងចេញចូលមកខ្មែរឲ្យបានញឹកញាប់នោះទេ ពោលគឺនាងរស់នៅអាមេរិកជាអចិនត្រេយ៍។ចំណែកទាក់ទងដល់អាជីពចាស់វិញលីដា ដែលថតសម្ដែងបទល្បីៗជាច្រើនរបស់សាពួន មីដាដា នោះក៍មិនដែលចេញសារថានាងនៅនឹករលឹកចំពោះអាជីពមួយនេះដែរ ពោលគឺកាត់ផ្ដាច់ទាំងស្រុង និងគ្មានគម្រោងបកក្រោយឡើយ។សកម្មភាពបែបនេះគេអាចយល់បានថាលីដា ឆ្អែតចិត្តនិងអាជីពមួយនេះក្រោយនាងបានបោកបក់រឿងអាស្រូវស្នេហាដ៍ធ្ងន់ធ្ងកាលពី១៧ឆ្នាំមុន ដែលធ្វើឲ្យម្ដាយមីងនាងបានបាត់ជីវិតដោយឈឺចាប់បំផុត ដែលចំណុចនេះហើយទើបនាងអស់អាល័យនិងផ្ដាច់ទាំងស្រុងពីអាជីពដែលខ្លួនស្រលាញ់ ខណៈដែលអ្នកនាងអម្ពរ ទេវី និងសារ៉ាយ សក្ខណា ទោះជាចេញទៅរស់នៅអាមេរិកជាច្រើនឆ្នាំមែន តែពេលនេះអ្នកទាំងពីរកំពុងថតសម្ដែងសិល្បៈនៅខ្មែរព្រមគ្នាក្នុងរឿង”អប្សរាមហាអង្គរ” ។តែសម្រាប់សុខលីដា ដែលមានរបួសពីអតីតកាលទើបបានជាសះស្បើយនោះនាងព្យាយាមកប់ស្រមោលខ្មៅនាអតីតកាលនិងគ្មានផែនការណ៍វិលទៅថតសម្ដែងវិញជាថ្មីម្ដងទៀតឡើយ បើទោះជាអាជីពសិល្បៈបានធ្វើឲ្យនាងល្បី និងមានគេចងចាំនាងរហូតមកដល់ពេលនេះក្ដី ៕
