ភ្នំពេញ៖ក្រុមតារាចម្រៀងរួមអាជីពឱក សុគន្ធកញ្ញា បានទិញបាច់ផ្កាជាបន្ដបន្ទាប់ដើម្បីជូនសុគន្ធកញ្ញា និងសា្វមីនៅថ្ងៃនាងឡើងផ្ទះថ្មីនិងសម្ពោធហាងលក់កាបូបរបស់នាងប្រេនASK ដែលធ្វើនៅផ្ទះជាន់ផ្ទាល់ដីបុរីជីពម៉ុង២៧១ ក្បែផ្សារទំនើបMega Mall ។តាមតារាដែលចូលរួម បង្ហើបថាផ្ទះរបស់សុគន្ធកញ្ញា នោះមានតម្លៃសែនដុល្លារព្រោះការឌីហ្សាញ ប្រណិតមាន បំពាក់ជណ្ដើរយន្ដទៀតផងដែលមើលទៅទាក់ទាញជាងផ្ទះផ្សេងៗទៀតនៅក្បែនោះ។នេះ ជាការទិញផ្ទះថ្មីថែម១ទៀត ខណៈដែលមុននេះនាងនិងស្វាមីរស់នៅផ្ទះវីឡារមួយនៅបុរីអ័រគីដេវីឡារ ផ្លូវ២០០៤ ។
គេកត់សម្គាល់ថាការពង្រីកអាជីវកម្មរបស់ឱក សុគន្ធកញ្ញា ថ្មីនេះបន្ទាប់ពីនាងធ្លាប់បើកហាងតែគុជកាលពីឆ្នាំមុន។ប៉ុន្ដែវាមិនចម្លែកនោះទេដែលនាងទិញផ្ទះប្រណិតៗកណ្ដាលទីក្រុងជាបន្ដបន្ទាប់នោះ ព្រោះថាទោះជាពេលនេះអាជីពចម្រៀងរបស់នាងលែងសូវខ្លាំងដូចមុនក្រោយមានស្វាមីនិងកូន១មែន តែនាងនៅតែមានតម្លៃខ្លួនខ្ពស់ និងក្ដាប់ស្ពតពាណិជ្ជកម្មធំៗក្នុងដៃពោលគឺអាចរកប្រាក់ចំណូលបានជាច្រើនម៉ឺនដុល្លារក្នុង១ឆ្នាំដដែល។ដោយឡែកស្វាមីនាងលោកអ៊ឹង សុខលី ជាអគ្គនាយកទូរទស្សន៍ហង្សមាសវិញក្នុង១រដូវក្ដៅលោកចំណេញប្រាក់ពីការរៀបចំធ្វើConcerts ទាំងក្នុងនិងក្រៅស្ទីឌីយូរាប់សែនដុល្លារ ហេតុនេះហើយទាំងកញ្ញា និងស្វាមីមានប្រាក់ចំណូលខ្ពស់ដូញគ្នាដែលធ្វើឲ្យពួកគេមានលទ្ធភាពទិញផ្ទះទិញផ្ទះបន្ថែមជាបន្ដបន្ទាប់ ហើយចង់ជិះរថយន្ដម៉ាកអីក៍បានដូចជាពេលនេះគេឃើញនាងជិះRange Rover និងAudi ជាដើម។
តារាភាពយន្ដជើងចាស់លោកស្រីឌី សាវ៉េត ធ្លាប់និយាយថាឱក សុគន្ធកញ្ញា មានសំណាងដែលក្លាយទៅជាប្អូនថ្លៃលោកថៅកែហង្សមាសដែលជាក្រុមហ៊ុនបណ្ដុំទៅដោយសិល្បៈ ហើយសម្ថភាពរបស់សុគន្ធកញ្ញា មិនត្រឹមតែជាតារាចម្រៀងល្បីទេ តែនាងអាចធ្វើតួឯកភាពយន្ដបានទៀតផង។ដោយឡែកសម្រាប់តារាខ្លះបានខ្សឹបខ្សៀវគ្នាមុនសុគន្ធកញ្ញា រៀបការជាមួយលោកអ៊ឹង សុខលី កាលពីថ្ងៃទី១៦ ឧសភា ឆ្នាំ២០១៩ ថានាងនឹងប្រឈមបង្ហូរទឹកភ្នែកដោយសម្អាងថាលោកសុខលី ធ្លាប់មានសង្សារជាស្រីស្អាតច្រើន អាចនឹងបន្ថយការស្រលាញ់លើនាងក្រោយមានកូននោះ ពេលនេះអ្វីៗមិនដូចការសន្និដ្ឋានទាំងនោះឡើយ ព្រោះក្រោយកញ្ញា បង្កើតបានកូនប្រុសអាយុជាង៤ឆ្នាំនេះលោកសុខលី បានហៅនិងចាត់ទុកនាងថាជា”មាតាដៃ១០០ “,ឧត្តមរិយា “និង”beautiful wife “ជាដើម។ពាក្យពេជន៍ទាំងនេះធ្វើឲ្យសុគន្ធកញ្ញា មានភាពកក់ក្ដៅខ្លាំងណាស់ហើយពេលនេះនាងនិងស្វាមីបានទិញផ្ទះ ,បន្ទប់ខុនដូរប្រណិតៗនៅកណ្ដាលក្រុង និងពង្រីកហាងជាបន្ដបន្ទាប់មុនពេលដែលកញ្ញា ត្រូវសម្រាលកូនស្រីនៅដើមឆ្នាំ២០២៤ ខាងមុខនេះ។
គូរបញ្ជាក់ថាឱក សុគន្ធកញ្ញា បានធ្វើខួបកំណើតគម្រប់អាយុ៣៧ឆ្នាំកាលពីថ្ងៃទី១៤ កញ្ញា ហើយទោះជាវ័យច្រើបន្ដិចមែន ប៉ុន្ដែរាល់ការបង្ហាញខ្លួនធ្វើជាCoach កម្មវិធីThe Voice Cambodia រដូវកាលទី៣ នោះនាងលេងខ្លួនជាមួយឈុតរ៉ូបប្លែកៗនិងគ្រឿងអលង្ការមានតម្លៃ ព្រមទាំងចេះស្លៀកពាក់សឹងតែមិនដឹងថានាងកំពុងពពោះឡើយ។ក្រៅពីមមាញឹកការងារដែលស្វាមីនាងជាអ្នកដឹកនាំនោះសុគន្ធកញ្ញា ក៍នៅតែទទួលការច្រៀងសម្ដែងជាធម្មតាតាមបណ្ដារកម្មវិធីទាំងឡាយដូចមុនដែរ។
មុនសម្រាលកូនស្រីខាងមុខនេះឱក សុគន្ធកញ្ញា មិនអាចដឹកដៃកូនក្រុមនាងលើកពានThe Voice Cambodia រដូវកាលទី៣ បានទេ ក្រោយពីនាងធ្លាប់នាំលោកថែល ថៃ លើកពានម្ដងរួចទៅហើយនៅរដូវកាលទី២ ប៉ុន្ដែម្ដងនេះមិនអាចទៅរួចនោះទេ ព្រោះពេជ្រ សោភា បានជួយឲ្យកូនក្រុមនាងលឹម សេរីហាន់នីកា ឈ្នះពានThe Voice Cambodia រដូវកាលទី៣ រួចទៅហើយ។អ្នករៀបចំការប្រគុំតន្រ្ដីមួយចំនួនបាននិយាយថាសុគន្ធកញ្ញា នឹងមិនឡើងទៀតឡើយ ក្រោយមានកូន២ ហើយស្វាមីនាងនឹងងាកទៅឲ្យនាងរ៉ាប់រងការងារជាCoach និងJudge ថែមទៀតជាជាងការចេញចម្រៀង។ប៉ុន្ដែអ្នកជំនាញសិល្បៈលោកនូ ស៊ឹប អះអាងថាសុគន្ធកញ្ញា មានសម្ថភាពល្អ ហេតុនេះកុំថាឡើយមានកូន២ ទោះជាកូន៤ ឬ៥នាក់ក៍នៅតែល្បីដែរឲ្យតែមានបទចម្រៀងនៅចេញហើយធ្វើត្រូវ។ប្រភពបានឲ្យដឹងថាដើម្បីឲ្យសុភមង្គលក្នុងគ្រួសារកាន់តែកក់ក្ដៅថែមទៀតឱក សុគន្ធកញ្ញា រៀបគម្រោងយកកូនឲ្យបាន៣នាក់ ពោលគឺក្រោយសម្រាលកូនស្រីនឹងតាមយកកូនម្នាក់ទៀត ៕
