ខេត្តបន្ទាយមានជ័យ ៖ បុរសប្រកបរបររត់ម៉ូតូឌុបម្នាក់ បានចាញ់ការលួងលោមរបស់ ជនសង្ស័យម្នាក់ បោកបញ្ឆោតចូលច្រៀងខារ៉ាអូខេជាមួយគ្នា រួចលួចដាក់ថ្នាំសណ្តំក្នុងស្រាបៀរឱ្យសន្លប់លួចយកម៉ូតូស៊េរីទំនើប១គ្រឿង ទៅបាត់បង្កការភ្ញាក់ផ្អើលពេញហាងខារ៉ាអូខេមួយកន្លែង កាលពីម៉ោង២រសៀល ថ្ងៃទី២០ ខែមករា ឆ្នាំ២០១៧ ស្ថិតក្នុងបន្ទប់ខារ៉ាអូខេ លេខ១១១១ ហាងវិមានស្បូវ នៅក្នុងភូមិចក សង្កាត់ព្រះពន្លា ក្រុងសិរីសោភ័ណ។
ជនរងគ្រោះឈ្មោះប្រាក់ រ៉ា ភេទប្រុស អាយុ៤៩ឆ្នាំ រស់នៅភូមិកន្ទួត សង្កាត់កំពង់ស្វាយ ក្រុងសិរីសោភ័ណ។ ចំណែកម៉ូតូដែលជនល្មើស លួចដាក់ថ្នាំឱ្យម្ចាស់សន្លប់លួចទៅបាត់នោះ ម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ ខ្មៅ ពាក់ស្លាកលេខ បន្ទាយមានជ័យ 1M-8851។
លោកវរសេនីយ៍ត្រីភឿក ព្រហ្ម មេបញ្ជាការស្តីទីមូលដ្ឋានកងរាជអាវុធហត្ថក្រុងសិរីសោភ័ណ បានឱ្យដឹងថា មុនពេលកើតហេតុ ជន រងគ្រោះបានឌុបជនសង្ស័យម្នាក់ ចេញពីបេន ឡាន ដែលទើបតែចុះពីរថយន្តឈ្នួល។ ខណៈ កំពុងជិះម៉ូតូឌុបនោះ ជនសង្ស័យបានបបួល ជនរងគ្រោះឱ្យជូនចូលច្រៀងខារ៉ាអូខេ នៅ ហាងវិមានស្បូវ បន្ទប់លេខ១១១១។ ពេល ចូលដល់បន្ទប់ជនសង្ស័យមិនបានហៅស្រីអង្គុយ កំដរទេ បែរជាលួងលោមឱ្យជនរងគ្រោះចូលផឹកកំដរ។
លោកមេបញ្ជាការបន្តទៀតថា ដោយសារតែជនរងគ្រោះមិនទាន់បានទទួលលុយថ្លៃ ឌុបពីបេនឡានផង និងដោយជនសង្ស័យសន្យា ថា ឱ្យលុយសរុបពេលឌុបចេញពីហាងខារ៉ាអូខេ ឆ្ពោះទៅផ្ទះទៀត នោះទើបជនរងគ្រោះសុខ-ចិត្តចូលអង្គុយផឹកកំដរជនសង្ស័យក្នុងបន្ទប់ ខាងលើ។ ស្រាប់តែពេលជនរងគ្រោះចូលបន្ទប់ ទឹក ជនសង្ស័យឆ្លៀតបានឱកាសលួចដាក់ថ្នាំ សណ្តំក្នុងកែវស្រាបៀរ។ នៅពេលជនរងគ្រោះ ត្រឡប់មកពីបន្ទប់ទឹកលើកកែវស្រានោះផឹក ស្រាប់តែទន់ដៃជើងងងុយដេកសន្លប់លើសាឡុងរួចហើយជនសង្ស័យក៏ធ្វើសកម្មភាពយក កូនសោម៉ូតូជិះចេញបាត់ស្រមោល។
ចំណែកប្រភពព័ត៌មានពីនារីខារ៉ាអូខេ បានបំភ្លឺសមត្ថកិច្ចថា ដោយសារខ្លាចភ្ញៀវអស់ ទឹកកក និងត្រូវការកុម្មង់ម្ហូបក្លែមពួកនាងក៏ ដើរចូលក្នុងបន្ទប់នោះ ស្រាប់តែឃើញជនរងគ្រោះដេកសន្លប់ស្តូកលើសាឡុងតែម្នាក់ឯង បាត់ភ្ញៀវម្នាក់ទៀតក៏ផ្អើលឆោឡោប្តឹងអាវុធហត្ថ ប្រញាប់ចុះមកអន្តរាគមន៍ដឹកជនរងគ្រោះ ទៅព្យាបាលនៅគ្លីនិកឯកជនវិសាលសុខ ស្ថិត ក្នុងភូមិសុភី សង្កាត់កំពង់ស្វាយ ក្រុងសិរីសោភ័ណ ដើម្បីសង្គ្រោះជីវិត។
លោកមេបញ្ជាការអះអាងថា ករណីនេះ សមត្ថកិច្ចកំពុងតាមស្រាវជ្រាវកំណត់មុខសញ្ញា ជនសង្ស័យបានហើយតាមរយៈកាមេរ៉ាសុវត្ថិភាពក្នុងហាងខារ៉ាអូខេខាងលើ ពីព្រោះពេល ថ្ងៃមើលឃើញមុខច្បាស់ដើម្បីនាំមកផ្តន្ទាទោស តាមច្បាប់៕