ភ្នំពេញ៖បើទោះជាអ្នកនាងលី ម៉ារីណា និងលោកវីរសេនីយ៍ឯកទៀង ច័ន្ទសារ អធិការនគរបាលខណ្ឌដូនពេញ មិនទាន់មានដំណឹងអ្នកទាំងពីរបានភ្ជាប់ពាក្យ ឬគ្រោងដឹកដៃគ្នាចូលរោងការឲ្យជាក់លាក់ក្ដី ប៉ុន្ដែរយៈពេលជាង១ឆ្នាំមកនេះ ចំណងស្នេហាអ្នកទាំងពីរបានបើកជាចំហ ដោយមានសាច់ញាត្តិទាំងសងខាងបានដឹងឭហើយគាំទ្រ ទៀតផង។រូបភាពមួយចំនួនបង្ហាញថាកាលពីថ្ងៃទី៦ តុលា អ្នកនាងម៉ារីណា និងលោកច័ន្ទសារ បានដឹកដៃគ្នាទៅធ្វើបុណ្យភ្ជុំបិណ្យសន្សំកុសលរួមគ្នា នៅវត្តបទុមវត្តី ដោយអ្នកទាំងពីរក៍បានសុំពរជ័យពីព្រះសង្ឃផងដែរ ពោលគឺដូចប្ដីប្រពន្ធទើបរៀបការហើយថ្មោងថ្មីអីចឹង។អ្វីដែលគូរឲ្យកត់សម្គាល់នោះគេឃើញរូបភាពមួយសន្លឹកម៉ារីណា និងលោកអធិការ អង្គុយលើកៅអីមួយរួមគ្នា ហើយមានមន្រ្ដីក្រោមឱវាទមួយចំនួនរបស់លោកច័ន្ទសារ បានសំពះអ្នកទាំងពីរប្រៀបដូចចាត់ទុកម៉ារីណា ថាជាមេស្រីរបស់ពួកគេដែរ។រូបភាពទាំងនោះបង្ហាញពីឥទ្ធិពលរបស់ម៉ារីណា ថានាងពិតជាធម្មតា ព្រោះកូនចៅគូស្នេហ៍ថ្មីរបស់នាងគោរពតារាសម្ដែងម្នាក់នេះប្រៀបដូចជាចៅហ្វាយនាយរបស់ពួកគេដែរ។ប៉ុន្ដែរហូតមកដល់ពេលនេះនៅតែគ្មានដំណឹងមង្គលការរបស់ម៉ារីណា និងលោកអធិការលេចចេញជារូបរាងឡើងនោះទេ ខណៈដែលអ្នកយកព័តមានយើងព្យាយាមទាក់ទងទៅតារាសម្ដែងសាច់សខ្ចីរូបនេះជាច្រើនដងតែនាងនៅមិនទាន់ផ្ដល់ចម្លើយឡើយ ដោយម្ដងថាមិនទាន់អាចនិយាយរឿងនេះបាន និងជូនកាលថាកំពុងបើកឡានតាមផ្លូវពិបាកនិយាយគ្នា ។
គេកត់សម្គាល់ថាមុនលី ម៉ារីណា និងលោកអធិការចេញមុខធ្វើបុណ្យសន្សំកុសលរួមគ្នានេះអ្នកនាងក៍ទើបតែបានធ្វើខួបកំណើតគម្រប់អាយុ៤៣ ឆ្នាំ កាលពីថ្ងៃទី២៤ កញ្ញា ផងដែរ ដែលពិធីនោះគេជឿរថាលោកច័ន្ទសារ ជាអ្នកចេញថ្លៃការចំណាយលើកម្មវិធីទាំងមូលដូចខួបនាងកាលពីគម្រប់អាយុ៤២ឆ្នាំ ដែរ ។ប្រភពបានឲ្យដឹងថាម៉ារីណា ចង់រៀបការជាលើកទី៣ជាមួយលោកអធិការ បើទោះជានាងធ្លាប់បានរៀបការ២លើកមកហើយ គឺជាមួយលោកទឹត ថាវរិទ្ធ និងលោកសាត ចាន់ថន ដែលប្រេះឆាទាំងពីរលើកដូចគ្នាក្ដី ប៉ុន្ដែបុរសណាក៍ដោយឲ្យតែច្បាស់លាស់ជាមួយនាងនោះដាច់ខាតម៉ារីណា ប្រាប់ទៅប្រុសនោះថាទាល់តែចូលរោងការ មានខាន់ស្លារត្រឹមត្រូវទើបនាងព្រមធ្វើជាប្រពន្ធ។នេះបើតាមថៅកែហាងម្នាក់ដែលស្និតម៉ារីណា បង្ហើបប្រាប់អ្នកយកព័តមានយើងកាលពីពេលថ្មីៗនេះ។
លី ម៉ារីណា បានលែងលះទាំងចម្រូងចម្រាសជាមួយលោកសាត ចាន់ថន កាលពីដើមឆ្នាំ២០២២ បន្ទាប់ពីចាប់ដៃគ្នាបាន១០ឆ្នាំគត់ និងទទួលបានចំណងដៃកូនប្រុស១អាយុជិត១០ឆ្នាំ ។អ្នកមេម៉ាយកូន១ស្រួយដូចដូងដុតរូបនេះក្រោយចាប់ដៃពិសោធន៍ស្នេហ៍ជាមួយលោកអធិការបានជាង១ឆ្នាំនេះនាងងាកទៅរកស៊ីក្រៅពីអាជីពសិល្បៈជាបន្ដបន្ទាប់ដូចជាបើកហាងលក់នំបញ្ចុកខួរក្ដាម និងពង្រីកការលក់តាមOnline ជាដើម។ម៉ារីណា ក៍កំណត់ថាក្នុង១ឆ្នាំនាងទទួលថតភាពយន្ដតែមួយរឿងប៉ុណ្ណោះ ដែលការបន្ធូដៃពីការងារសិល្បៈបែបនេះគេជឿរថានាងចង់ចំណាយពេលវេលាធ្វើជំនួញនិងពិសោធន៍លើគូស្នេហ៍ថ្មីឲ្យបានច្រើនមុនឈានទៅរៀបអាពាហ៍ ពិពាហ៍ ។
ក្រៅពីលី ម៉ារីណា តារាដែលធ្លាក់ខ្លួនមេម៉ាយកូន១និងកំពុងលេចសញ្ញាស្នេហ៍ថ្មីនាពេលនេះមានដូចជាអ្នកនាងពេជ្រ សូលីកា ,សុខ សោម៉ាវត្តី និងឌុច សុភា ជាដើម តែតារាទាំង៣ខាងលើនេះនៅតែអត់ដំណឹងចូលរោងការជាថ្មីដូចគ្នា។មជ្ឈដ្ឋានមមាជនមើលឃើញថាតារាភាគច្រើនពិបាករក្សារចំណងស្នេហាឲ្យបានគង់វង្សយូរអង្វែងណាស់បើសិនជាជ្រើសគូស្នេហ៍ក្រៅរង្វង់អ្នកសិល្បៈ ។ប៉ុន្ដែសម្រាប់ម៉ារីណា វិញក្រោយបែកបាក់លោកចាន់ថន នាងធ្លាប់ប្រាប់អ្នកយកព័តមានយើងថានឹងមិនជ្រើសស្វាមីថ្មីជាបុរសអាណិកជនខ្មែរនៅបរទេសជាថ្មីម្ដងទៀតទេ ។ឥឡូវការតាំងចិត្តរបស់ម៉ារីណា បែបនេះដូចជាការគិតរបស់នាងមែន ព្រោះលោកអធិការខណ្ឌដូនពេញនៅក្បែកាយ៉ានាងសឹងគ្រប់ពេលដែលធ្វើឲ្យនាងមានកំដៅក្នុងបេះដូងជានិច្ច ។សម្រាប់Fan របស់ម៉ារីណា ចង់ឃើញនាងរក្សារស្នេហាថ្មីមួយនេះឲ្យនៅគង់វង្ស កុំដើរជាន់ដានចាស់ទៀត ប៉ុន្ដែអ្នកមេម៉ាយសាច់ចាំសម្រស់ក្មេងវ័យរូបនេះមិនដែលបង្ហាញទុក្ខសោកបេះដូងព្រោះស្នេហាម្ដងណាឡើយ ព្រោះនាងមានជម្រើសស្នេហ៍ច្រើន ហើយការដែលនាងបង្ហូរទឹកនេត្រាមុននេះក្រោយលែងប្ដីទី២ នោះព្រោះតែនាងឈឺចាប់លោកចាន់ថន ដែលនាងចោទថាបានលួចទ្រព្យជាគ្រឿងអលង្ការ ពីនាងដែលក្នុងនោះមានទាំងទ្រព្យម្ដាយនាងផងដែរ អស់ពីខ្លួនអស់រលីង ។តែលោកចាន់ថន ធ្លាប់ចេញសារបដិសេធនូវការចោទប្រកាន់របស់អតីតភរិយាលោកហើយនៅពេលដែលម៉ារីណា កំពុងផ្អែមល្ហែមស្នេហ៍ជាមួយលោកអធិការនេះលោកមិនដែលចេញសារឌឺដងណាមួយទេ បើទោះជាមានព័តមានថាលោកនៅតែស្ដាយអតីតប្រពន្ធក្ដី ៕
