ភ្នំពេញ៖ពេជ្រ សោភា បាត់បង់ដៃគូពិសេសជាង៣ឆ្នាំទៅហើយនោះគឺលោកឧកញ៉ាព្រាប សុវត្ថិ ហើយពេលនេះនាងនៅតែមិនទាន់រកបានដៃគូថ្មីយល់ចិត្តនោះទេ ព្រោះដៃគូខ្លះចាប់ដៃគ្នាបានតែ១ប្រាវក៍បាត់ទៅវិញ។យ៉ាងណាថ្មីៗនេះគេឃើញសោភា បានងាកទៅចាប់ដៃគូជាមួយប្រុសសង្ហារដល់ទៅ២នាក់ក្នុងពេលតែមួយនោះគឺលោកកែ សុវណ្ណារ៉េត ហៅហ្សូណូ ខណៈដែលមុនលោកឆន សុវណ្ណារាជ ហោះទៅកាណាដាកាលពីដើមខែតុលា នោះនាងក៍ច្រៀងជាមួយបុរសរោមទ្រូងច្រើនជាញឹកញាប់ដែរ។សម្រាប់Fan សោភា និយាយថាដៃគូរបស់នាងនាពេលនេះនៅតែមិនអាចជាប់លាប់ឬច្រៀងជាយូអង្វែងនោះទេ ពោលគឺច្រៀងឆ្លងឆ្លើយគ្នាទៅតាមពេលវេលាប៉ុណ្ណោះ ហេតុនេះហើយគេអាចនិយាយបានថាតារាវ័យ៤០ឆ្នាំ រូបនេះនៅតែអត់ដៃគូដ៍សាកសមដដែល ។ប៉ុន្ដែសោភា ធ្លាប់ប្រាប់អ្នកយកព័តមានយើងថានាងអាចផលិតបទទោលតែម្នាក់ឯងច្រើនជាងផ្ដោតលើដៃគូ។
សូមបញ្ជាក់ថាពេជ្រ សោភា ធ្លាប់ជាដៃគូដ៍យល់ចិត្តបំផុតជាមួយលោកព្រាប សុវត្ថិ ហើយកន្លងមកនាងតែងតែនិយាយបែបដាក់ខ្លួនថាដើរដល់ចំណុចនេះដោយសារតែតោងកាលីពលោកឧកញ៉ាស្នាយ ច្រើនណាស់។ប៉ុន្ដែអ្នកជំនាញសិល្បៈមើលឃើញថាក្រៅពីព្រាប សុវត្ថិ នោះសោភា ជោគជ័យខ្លាំងនៅពេលដែលនាងនាងចាប់ដៃជាមួយងួន ចាន់ដេវីត ព្រោះច្រៀងរ៉េបជាមួយគ្នាបានយ៉ាងល្អ តែការចាប់ដៃជាមួយលោកStep មួយប្រាវមិនសូវលេចធ្លោខ្លាំងនោះទេ។តែសោភា ដែលជាតារាម្នាក់ចេះនិពន្ធទំនុកច្រៀងដោយខ្លួនឯងនោះនាងហាក់មានប្រៀបជាងមិត្តរួមក្រុមក្នុងការបចញ្ចេញបទចម្រៀងតាមខ្លួនឯងស្រលាញ់ ពោលគឺមិនពឹងទាំងស្រុងទៅលើអ្នកនិពន្ធហង្សមាសនោះទេ នារយៈពេលប៉ុន្មានឆ្នាំចុងក្រោយនេះ។នាងនិយាយថ្មីៗនេះថានៅពេលដែលមានអាយច្រើនជាងនេះនឹងធ្វើបទចម្រៀងឲ្យតារាវ័យក្មេងៗនៅហង្សមាសច្រៀង ហើយនាងជាអ្នកចាំស្ដាប់ពួកគេច្រៀងវិញម្ដង។
គូរកត់សម្គាល់ថាពេជ្រ សោភា ទើបឡើងកូដមួយក្រឺតទៀតដោយសារតែកាលពីថ្ងៃទី១ តុលា នាងនាំកូនក្រុមលឹម សេរីហាន់នីកា លើកពានThe Voice Cambodia រដូវកាលទី៣ ដ៍គូរឲ្យភ្ញាក់ផ្អើលធ្វើឲ្យនាងក្លាយទៅជាCoach លេចធ្លោម្នាក់នាពេលបច្ចុប្បន្ន។តារាហង្សមាសរូបនេះក៍បានត្រៀមខ្លួនចេញទៅច្រៀងសម្ដែងនៅកម្មវិធីPhilippine Fair នៅថ្ងៃទី១៦ -១៨ ខែវិច្ឆិកា ឆ្នាំ២០២៣ ខាងមុខនេះដែរ តែនៅមិនទាន់ដឹងថាសោភា ត្រូវបានគូដណ្ដឹងនាងលោកឆឹម សក្កដា ជូនដំណើរទៅដែរ ឬអត់នោះទេ ស្របពេលដែលថ្មីៗនេះក្នុងពិធីបុណ្យភ្ជុំបិណ្ឌលោកសក្កដា ទៅវត្ត តែសោភា ដែលកាន់គ្រីស្ទាន ទៅព្រះវិហារ ។
នៅឆ្នាំ២០២៣ គេមើលឃើញដែរថាពេជ្រ សោភា នៅតែរក្សារទីផ្សារចម្រៀងបានដដែលទោះជាពេលនេះហង្សមាសមានតារាឡើងគជាន់ជើងគ្នាក្ដី ប៉ុន្ដែសោភា នៅតែជាតារាជូរមុខរបស់ផលិតកម្មនេះដូចគ្នាទៅនិងឱក សុគន្ធកញ្ញា ដែរ ថែមទាំងរក្សាបានរូបសម្រស់ក្មេងជាងវ័យបើទោះជាតាំងពីចូលសិល្បៈរហូតមកដល់ពេលនេះនាងមិនទាន់បានកែកុនផ្នែកណាមួយក៍ដោយ។សោភា ធ្លាប់ប្រាប់អ្នកយកព័តមានយើងថានៅពេលដែលនាងមានអាយុច្រើន ស្បែកជ្រីវជ្រួញ អាចពិចារណារឿងកែសម្រស់ដែរ តែគិតត្រឹមឆ្នាំ២០២៣ នេះនៅរក្សាររបស់ពីធម្មជាតិ១០០ % ។Fan របស់តារាចម្រៀងមកពីខេត្តព្រៃវែងរូបនេះសរសើរនូវការបង្ហាញភាពរឹងមាំរបស់សោភា ទោះជាពេលនេះជំងឺឈាមស ស៊ីឈាមក្រហមរបស់នាងនៅតែមានពេលខ្លះធ្វើទុក្ខនាងក្ដី តែនាងមិនដែលបោះបង់ការច្រៀងសម្ដែងដែលបានគ្រោងទុកឡើយ។ប៉ុន្ដែអ្នកគាំទ្រចង់ឃើញសោភា ជោគជ័យទាំងអាជីពចម្រៀងនិងស្នេហា នោះគឺភាពក្លាហានរបស់នាងដោយហ៊ានដឹកដៃលោកសក្កដា រៀបការជាចំហ ដើម្បីបិទបញ្ចប់រឿងដែលគេថានាងជោគជ័យតែច្រៀង តែស្នេហាមិនសូវកាក់កប។
ទស្សនិកជនរងចាំមើលថាតើពេជ្រ សោភា នឹងបន្ដចាប់ដៃជាមួយលោកហ្សូណូ និងឆន សុវណ្ណារាជ តទៅទៀត ឬមួយក៍នាងអាចនឹងបង្កើតដៃគូថ្មីដោយខ្លួនឯងនាពេលខាងមុខនេះ ក្រោយពីនាងបានជ្រើសផ្លូវបន្ដច្រៀងសម្ដែងឲ្យហង្សមាស បើទោះជាកាលពីខែកញ្ញា ឆ្នាំ២០២០ មានដំណឹងថាGalaxy ចង់ទិញនាងឲ្យទៅច្រៀងជាដៃគូជាមួយលោកព្រាប សុវត្ថិ ជាលលកទី២ក្ដី ៕
