ភ្នំពេញ៖ព្រាប សុវត្ថិ បានទៅដល់ទឹកដីអូស្រ្ដាលីកាលពីថ្ងៃទី១៩ តុលា ដើម្បីច្រៀងសម្ដែងតាមគម្រោងជាមួយកូនប្រុសទាំង៣របស់លោកដោយរួមដំណើរជាមួយក្រុមតន្រ្ដីករ(Band)ល្បីៗ ។ពិតណាស់ចាប់អាជីពចម្រៀងអស់រយៈពេល២៦ឆ្នាំ(១៩៩៧-២០២៣) ព្រាប សុវត្ថិ បានចេញច្រៀងសម្ដែងនៅក្រៅស្រុកជាច្រើនប្រទេស ហើយលោកត្រូវបានគេចាត់ទុកជាកំពូលតារាចម្រៀងម្នាក់ដែលដែលល្បីល្បាញបានយូឆ្នាំជាងគេ បើទោះជាពេលនេះលោកសុវត្ថិ មានវ័យ៤៨ឆ្នាំ ទៅហើយក្ដី ។ប៉ុន្ដែសម្រាប់ការចេញទៅអូស្រា្ដលីជើងនេះលោកព្រាប សុវត្ថិ ដែលត្រៀមចេញច្រៀងសម្ដែងជាលើកដំបូងបើកឆាកនៅថ្ងៃទី២១ តុលា នៅរដ្ឋវិចតូរី ដឹកនាំដោយលោកសុកាន រៀបចំនៅភូជនីយដ្ឋានមួយមានឈ្មោះថាPhnom Penh Mini Restaurant នោះមានអាណិកជនខ្មែរមួយចំនួនដែលរស់នៅទីនោះបានចេញសារតាមហ្វេសបុកដោយព្រមានធ្វើពហិការ មិនចូលរួមទស្សនាការច្រៀងសម្ដែងរបស់លោកទេ ខណៈដែលមួយចំនួនទៀតបានរក្សារភាពស្ងៀមស្ងាត់ហើយគេជឿរថាពួកគេអាចនឹងកំពុងតែស្ថិតក្នុងការពិចារណាថាគូទៅ ឬមិនទៅ ស្របពេលដែលShow ខ្លះថ្លៃសំបុត្រត្រូវបានគេដាក់លក់១ដល់ទៅតម្លៃ១៤០ដុល្លារ។ចំពោះអ្នកដែលប្ដេជា្ញថាមិនទៅចូលរួមទស្សនាការសម្ដែងរបស់លោកព្រាប សុវត្ថិ នោះដោយសារតែពួកគេនៅតែយល់ថាលោកបានចូលរួមបំផ្លាញបឹងតាមោគ ក្នុងខណ្ឌព្រែកព្នៅ ក្រោយលោកទទួលបានដី៣ហិកតា តាមអនុក្រិតចុះហត្ថលេខាដោយអតីតនាយករដ្នមន្រ្ដី កាលពីថ្ងៃទី១៣ ខែមេសា ឆ្នាំ២០២២ និងខ្លះទៀតចោទថាលោកជាតារាបម្រើឲ្យបក្សជាដើម។ប៉ុន្ដែអ្នកខ្លះទៀតថាគូរតែផ្ដល់ភាពយុត្តិធ័មដល់លោកព្រាប សុវត្ថិ ព្រោះលោកមិនបានទាមទារចង់បានយកដីនោះទេ តែបើរដ្ឋាភិបាលប្រគល់ឲ្យលោកទៅហើយ តើលោកហ៊ានប្រកែកដែរ ?
លោកជា យូហ៊ន ប្រធានសមាគមន៍ខ្មែរនៅទីក្រុងមែលប៊ន ដែលបានបានផ្វព្វផ្សាយពីការច្រៀងសម្ដែងរបស់លោកព្រាប សុវត្ថិ នោះបានប្រាប់អ្នកកាសែតថាព្រាប សុវត្ថិ រស់នៅក្រោមការដឹកនាំរបស់គណបក្សប្រជាជន ហេតុនេះចង់មិនចង់លោកត្រូវតែចូលរួមជាមួយគណបក្សនេះ ។
ថ្វីត្បិតតែអ្នកគាំទ្រលោកព្រាប សុវត្ថិ ហាក់មានគំនិតខ្វែងគ្នាលើការច្រៀងសម្ដែងរបស់លោកនៅអូស្រា្ដលីលើកនេះមែន ប៉ុន្ដែទាំងលោកនិងកូនទាំង៣គឺសុវត្ថិ មុនីវណ្ណ ,សុវត្ថិ មុនីនាគ និងសុវត្ថិ សិរីវុឌ្ឍ រួមទាំងក្រុមតន្រ្ដីទៅជាមួយនោះបង្ហាញការជឿរជាក់និងការត្រៀមខ្លួនរួចជាស្រេចចំពោះការច្រៀងសម្ដែងទៅតាមគម្រោងការណ៍។ទស្សនិកជននឹងបានឃើញច្បាស់ជាមិនខានថាលោកព្រាប សុវត្ថិ នឹងនៅតែមានការគាំទ្រ ដូចមុន ឬប្រែប្រួលនោះតាមរយៈសកម្មភាពរបស់លោកនៅថ្ងៃបើកឆាកដំបូង ខណៈដែលអំឡុងទៅច្រៀងសម្ដែងនៅកូរ៉េ កាលពីខែមុនមានព័តមានថាលោកសុវត្ថិ មិនសូវមានការគាំទ្រច្រើនដូចមុនទេ ។
សូមបញ្ជាក់ថាលោកព្រាប សុវត្ថិ បានច្រៀងសម្ដែងឲ្យហង្សមាសដល់ទៅរយៈពេល២៣ឆ្នាំ (១៩៩៧ -២០២៣ ) និងឈានទៅចូលរួមជាមួយGalaxy កាលពីចុងខែសីហា ឆ្នាំ២០២០ ពោលគឺរយៈពេលជាង៣ឆ្នាំ ហើយដែលលោកនៅជ្រកទ្រនុំថ្មី ប៉ុន្ដែអ្នកគាំទ្រលោកភាគច្រើននិយមស្ដាប់បទលោកនៅហង្សមាសជាងGalaxy បើទោះជាមានការលើកឡើងថាលោកសុវត្ថិ នៅផលិតកម្មចាស់ច្រៀងតែបទភាគច្រើនប្រែពីចិន និងថៃ ក្ដី។ប្រភពខ្លះថាការច្រៀងសម្ដែងរបស់លោកសុវត្ថិ ក្រោយលោកឡើងជាឧកញ៉ាជាង២ឆ្នាំនេះមានតម្លៃខ្លួនខ្ពស់ជាងមុន ប៉ុន្ដែលោកមិនប្រាប់ថាស៊ីថ្លៃប៉ុន្មាននោះទេ នៅចំពោះមុខអ្នកសារព័តមានដែលសួរនាំរឿងនេះកន្លងមក។លោកសុវត្ថិ ថាទោះជារូបលោកក្លាយទៅជាអ្វី ក៍មិនបោះបង់ចម្រៀងចោលដែរពោលគឺច្រៀងនិងសម្ដែងស្មើដៃគ្នា ហើយទស្សនិកជនអាចហៅលោកដូចពីមុនក៍បាន ជាឧកញ៉ាក៍បានតាមចំណូលចិត្ត។តាមព័តមានថាបើសិនជាទៅអូស្រា្ដលីលើកនេះជោគជ័យលោកសុវត្ថិ ក៍អាចនឹងចេញទៅច្រៀងនៅប្រទេសផ្សេងៗនៅអ៊ឺរ៉ុបទៀតដែរ ប៉ុន្ដែបើបរាជ័យនោះលោកនឹងមិនផ្ដោតលើទីផ្សារក្រៅស្រុកទៀតឡើយ ក្រោយលោកជួបរឿងអ្នកគាំទ្រព្រមានធ្វើពហិការដល់ទៅ៣ដង គឺអំឡុងពេលលោកទៅច្រៀងនៅកូរ៉េ កាលពីចុងខែ៩ និងទៅអូស្រា្ដលីនៅចុងខែ១០ និងត្រូវបានក្រុមយុវវជនស្រលាញ់បរិស្ថាន ព្រមានលែងស្ដាប់ចម្រៀងលោកកាលពីខែកញ្ញា ឆ្នាំ២០២២ ៕
