អូស្រា្ដលី៖ព្រាប សុវត្ថិ និងកូនទាំងពីររួមទាំងភរិយា,ក្រុមតន្រ្ដីករ(Bands)បានទៅដល់ អូស្រ្ដាលី តាំងពីថ្ងៃទី១៩ តុលា ជាមួយតំណើរលើកនេះហាក់មានភាពចម្រូងចម្រាសបន្ដិចព្រោះមានអ្នកគាំទ្រលោកនៅទីនោះខ្លះបានព្រមានធ្វើពហិការ ដោយចោទតារាវ័យ៤៨ឆ្នាំ រូបនេះថាបានចូលរួមបំផ្លាញការផ្ទៃដីបឹងតាមោគ ក្រោយតារាGalaxy ទទួលបានដីចំនួន៣ហិកតា តាមអនុក្រិត្យចុះហត្ថលេខាដោយអតីតនាយករដ្នមន្រ្ដី កាលពីថ្ងៃទី១៣ ខែមេសា ឆ្នាំ២០២២ ។ភាពខុសប្រកតីបានកើតឡើងរវាងអ្នកគាំទ្រ និងអ្នកថាលែងគាំទ្រលោកព្រាប សុវត្ថិ លើទឹកដីអូស្រា្ដលីទើបមានការសង្ស័យថាប្រជាប្រិយភាពរបស់អតីតតារាហង្សមាសរូបនេះអាចមានការប្រែប្រួលឬធ្លាក់ចុះ ប៉ុន្ដែនៅថ្ងៃបើកឆាកច្រៀងសម្ដែងរបស់លោកនៅទីក្រុងMelbourne ប្រទេសអូស្រ្ដាលីនោះ តាមរយៈហ្វេសបុករបស់លោកព្រាប សុវត្ថិ ផ្ទាល់និងភរិយាលោកអ្នកស្រីឡុង ស្រីមុំ ឃើញថាចំនួនអ្នកទៅទស្សនានិងរាំកម្សាន្ដការច្រៀងសម្ដែងរបស់លោកសុវត្ថិ នៅតែមានសន្ទុះខ្លាំង បើទោះជាមិនណែនសាល ក្ដី ប៉ុន្ដែមិនទំនេរតុច្រើនឡើយ។ជាមួយគ្នានេះដែរគេឃើញនៅលើហ្វបេសបុកលោកព្រាប សុវត្ថិ ក៍បានចេញច្រៀងសម្ដែងនៅCrystal Palace ទីកក្រុងSydney នៅថ្ងៃទី២៧ ខែ១០ នោះក៍មានអ្នកទៅទស្សនាយ៉ាងច្រើនផងដែរ ពេលលោកច្រៀងបទចាស់ៗនៅហង្សមាសឡើងវិញ។ប៉ុន្ដែអ្នកខ្លះបានសម្ដែងជាចម្ងល់ថាថាក្នុងការឃោសនាការច្រៀងសម្ដែងរបស់លោកព្រាប សុវត្ថិ និងក្រុមគ្រួសារនោះមានកូនប្រុសទាំង៣របស់លោកទៅជាមួយដែរ តែជាក់ស្ដែងការច្រៀងថ្ងៃដំបូងនោះលោកចាប់ដៃតែជាមួយកូនទី១ សុវត្ថិ មុនីវណ្ណ និងកូនទី២ សុវត្ថិ មុនីនាគ ប៉ុណ្ណោះ មិនឃើញកូនទី៣ សុវត្ថិ សិរីវុឌ្ឍ ចូលរួមឡើយ ហើយរហូតមកដល់ពេលនេះលោកនិងភរិយានៅមិនទាន់ចេញមុខបំភ្លឺរឿងមួយនេះទេ ។
សូមបញ្ជាក់ថាព្រាប សុវត្ថិ ជាតារាដែលធ្លាប់ស៊ីថ្លៃខ្ពស់ម្នាក់ក្នុងការច្រៀងសម្ដែងនៅក្នុង និងក្រៅស្រុក ហើយចាប់អាជីពជាតារាចម្រៀងរយៈពេល២៦ឆ្នាំ លោកធ្លាប់ត្រូវបានអ្នកគាំទ្រព្រមានធ្វើពហិការ៣លើកមកហើយក្នុងនោះគឺលើកទី១៖កាលពីខែកញ្ញា ឆ្នាំ២០២២ ក្រោយលោកត្រូវបានអតីតនាយយករដ្ឋមន្រ្ដីចេញអនុក្រិត្យកាត់ដីផ្ទៃបឹងតាមោគ៣ហិកតា ក្នុងខណ្ឌព្រែកព្នៅ ឲ្យលោក នាំឲ្យក្រុមយុវជនស្រលាញ់បរិស្ថានចេញសេចក្ដីប្រកាសព្រមានលែងស្ដាប់ចម្រៀងលោក,លើកទី២៖នៅពេលដែលលោកសុវត្ថិ ចេញទៅច្រៀងសម្ដែងនៅកូរ៉េខាងត្បូងកាលពីចុងខែកញ្ញា ឆ្នាំ២០២៣ ក៍មានកម្មករនិងអ្នកស្រលាញ់ប្រជាធិបតេយ្យនៅទៅទីនោះព្រមានធ្វើពហិការការច្រៀងសម្ដែងរបស់លោកដែរ ខណៈដែលលើកទី៣៖គឺនៅពេលដែលលោកសុវត្ថិ និងកូនៗចេញទៅច្រៀងនៅអូស្រា្ដលីនៅចុងខែ១០ នេះ។
យ៉ាងណាតាមរយៈការចាប់ដៃជាមួយកូនទាំង២ព្រាប សុវត្ថិ នៅតែបង្ហាញការជឿរជាក់ចំពោះការច្រៀងសម្ដែងរបស់លោកលើទឹកដីអូស្រ្ដាលីនេះ ហើយឆ្លៀតពេលទំនេរលោកនិងភរិយារួមទាំងកូនៗក៍បានដើរកម្សាន្ដនិងទិញអ៊ឺវ៉ាន់ម៉ាកប្រេន ប្រេន យ៉ាងរីករាយផងដែរ។ចំណែកអ្នកគាំទ្រព្រាប សុវត្ថិ នៅក្នុងស្រុកវិញរក្សារភាពស្ងៀមស្ងាត់ក្រោយមានពលរដ្ឋខ្លះនៅបរទេសប្រកាសធ្វើពហិការាការច្រៀងសម្ដែងនៅក្រៅស្រុកជាបន្ដបន្ទាប់បែបនេះ។
គូរកត់សម្គាល់ដែរថាក្រៅពីអាជីពចម្រៀងលោកព្រាប សុវត្ថិ ជាវីរៈសេនីឯក និងតួនាទីជានាយរងការិយាល័យទី៥នៃកងទ័ព្ទជើងគោក ហើយលោកត្រូវបានគេចាត់ទុកថាជាសេដ្ឋីម្នាក់ក្នុងសិល្បៈតាំងពីមុនលោកទទួលបានគោរម្យងារជាឧកញ៉ាកាលពីខែចុងខែមេសា ឆ្នាំ២០២២ ព្រោះកាលពីខែកញ្ញា ឆ្នាំ២០២០ លោកសុវត្ថិ ត្រូវមនុស្សជំនិតរបស់លោកទម្លាយថាតារាកូន៣រូបនេះមានទ្រព្យខ្ទង់៣០លានដុល្លារ ទៅហើយ។ចំណែកការឈជើងនៅGalaxy ជាង៣ឆ្នាំនេះលោកសុវត្ថិ ទោះជាមិនសូវមានបទល្បីៗដូចមុនក្ដី ប៉ុន្ដែលោកបានងាកទៅពង្រីកមុខជំនួញជាបន្ដបន្ទាប់ រហូតធ្វើឲ្យលោកជាប់ដៃរកស៊ីដកឃ្លាមិនរួច លែងសូវមានបទថ្មីៗចេញដិតដល់នៅលើទីផ្សារទៀតផង ។ប៉ុន្ដែលោកឧកញ៉ាស្នាយ បានប្រកាសថាអាជីពចម្រៀង និងរកស៊ីលោកចាប់ស្មើគ្នា មិនអាចបោះបង់មួយណាបានជាដាច់ខាត។លោកថា”បើមិនធ្វើជំនួញទេ អត់ទៅមុខឡើយ”។
អ្នកគាំទ្ររងចាំមើលថាក្រោយព្រាប សុវត្ថិ តេស្ដការច្រៀងសម្ដែងរបស់លោកនៅអូស្រា្ដលីលើកនេះហើយ លោកនឹងហ៊ានចេញទៅច្រៀងសម្ដែងនៅប៉ែកអ៊ឺរ៉ុបឬអត់ នាពេលខាងមុខ ព្រោះតាមព័តមានថាពលរដ្ឋខ្មែរខ្លះរស់នៅទីនោះក៍ត្រៀមធ្វើពហិការចំពោះវត្តមានរបស់លោកដូចនៅអូស្រ្ដាលីនិងកូរ៉េ ដែរ ៕
