ភ្នំពេញ ៖ ផ្លូវបេតុងទើបនឹងចាក់ប្រាប់ឲ្យជិះម៉ូតូយឺតៗបង្កឲ្យមានទំនាស់ពាក្យសម្តីឈានដល់ការវាយតប់គ្នាជាមួយសន្តិសុខយាមរោងចក្រម្នាក់ បង្កឲ្យមានការភ្ញាក់ផ្អើល កាលពីវេលាម៉ោង៩យប់ ថ្ងៃទី២៣ ខែមករា ឆ្នាំ២០១៧ នៅជិតស្ពានថ្ម ច្រកចូលកន្លែងទុករថយន្ត ស៊ីនទ្រី ផ្លូវបេតុងបឹងតាម៉ាត ភូមិម័ល សង្កាត់ដង្កោ ខណ្ឌដង្កោ ។
ជនរងគ្រោះមានឈ្មោះ ថន តារា អាយុ១៩ឆ្នាំ មុខរបរកម្មករធ្វើផ្លូវ របស់ក្រុមហ៊ុនTTM ស្នាក់នៅកន្លែងធ្វើការនៅភូមិម័ល សង្កាត់ដង្កោ ខណ្ឌដង្កោ ។ ចំណែកជនបង្កមានឈ្មោះ មុត មករា អាយុ២៧ឆ្នាំ មុខរបរសន្តិសុខឯកជន ស្នាក់នៅសង្កាត់បឹងទំពុន ខណ្ឌមានជ័យ។
តាមសម្ដីជនរងគ្រោះបាននិយាយថា មុនពេលកើតហេតុរូបគាត់កំពុងជួយសម្រួលចរាចរណ៍ ព្រោះអីពួកគាត់កំពុងតែចាក់ផ្លូវបេតុង ខណៈស្រាប់តែបុរសបង្កដែលជាសន្តិសុខ បានជិះម៉ូតូម៉ាក TODAY ពណ៌ស អត់មានសា្លកលេខបានធ្វើដំនើរតាមផ្លូវ តាមផ្លូវបេតុងបឹងតាម៉ាត ក្នុងទិសដៅពីជើងទៅត្បូង ខណៈមកដល់ចំនុចកើតហេតុ ដោយសារតែផ្លូវទើបនិងចាក់បេតុង ជនរងគ្រោះបានប្រាប់ថា កុំជិះម៉ូតូលឿនពេក ពេលនោះជនបង្កដែលជាសន្តិសុខបានឈប់ម៉ូតូ រួចបានទាក់សម្ដីគ្នា ធ្វើអោយបុរសជាសន្តិសុខខឹងបានវាយទៅលើជនរងគ្រោះមួយដៃ ពេលនោះ ជនរងគ្រោះខឹងមានការប្រតាយប្រតប់គ្នា វិញទៅមកតែមិនមានរងរបួសស្នាមនោះទេ ។ ភ្លាមៗនោះដែរសមត្ថកិច្ចមូលដ្ឋានបានចុះទៅដល់
បានឃាត់ខ្លួនជនបង្ក និងជនរងគ្រោះ ព្រមទាំងម៉ូតូមួយគ្រឿង យកទៅធ្វើការសាកសួរនៅប៉ុស្តិ៍នគរបាលដង្កោ ។
នៅពេលសមត្ថកិច្ចសាកសួរជនបង្កបានសារភាពថា រូបគេពិតជាបានវាយទៅលើជនរងគ្រោះមួយដៃពិតប្រាកដមែន ព្រោះអីដោយសារតែតែរូបគេខឹងខ្លាំងពេក ទើបទប់កំហឹងមិនបានទើបជ្រុលដៃវាយទៅលើជនរងគ្រោះតែម្តងទៅ ហើយពេលនោះខាងជនរងគ្រោះក៍បានប្រតាយប្រតប់ទៅលើរូបគេវិញដែរតែគ្មានរបួសស្នាមនោះទេ ។
ក្រោយពេលកើតហេតុ ខាងជនរងគ្រោះមិនបានដាក់ពាក្សបណ្តឹងនោះទេ គឺគ្រាន់តែអោយខាងភាគីបង្កសន្តិសុខសុំទោស រួចហើយបានអោយសមត្ថកិច្ចធ្វើការអប់រំដើម្បីបញ្ចប់រឿង៕ ណន រ៉ាត់