ភ្នំពេញ៖ព្រាប សុវត្ថិ ទើបតែនាំកូនប្រុសទាំង៣វិលត្រឡប់ពីច្រៀងសម្ដែងនៅអូស្រា្ដលីមកដល់ខ្មែរវិញកាលពីពេលថ្មីៗនេះ ក្រោយរកលុយនៅក្រៅស្រុករយៈពេល១ខែ ដែលការចេញទៅក្រៅស្រុកលើកនេះលោកមានភាពចម្រូងចម្រាសខ្លាំងព្រោះតែមានទាំងអ្នកគាំទ្រ និងអ្នកធ្វើពហិការ ការច្រៀងសម្ដែងរបស់លោក។ប៉ុន្ដែយ៉ាងណាព្រាប សុវត្ថិ នៅតែធ្វើការសម្ដែងទៅតាមគម្រោងហើយវិលវិញតាមកាលកំណត់ច្បាស់លាស់ដោយសារតែការច្រៀងសម្ដែងរបស់លោកមួយចំនួននៅក្នុងស្រុកត្រូវបានគេកក់មុនជាច្រើនខែ។
ប្រភពថាក្រោយព្រាប សុវត្ថិ ឡើងជាឧកញ៉ាជាង១ឆ្នាំ នេះគេកម្រឃើញលោកលេចមុខចេញច្រៀងសម្ដែងតាមកម្មវិធីមង្គលការណាស់ គឺយូៗម្ដងដែលខុសពីតារាល្បីៗផ្សេងទៀតគ្មានគោរម្យងារឧកញ៉ាពួកត្រូវប៉ាន់ធំ នារដូវក្ដៅចាប់ពីខែ១១ ឆ្នាំ២០២៣ ដល់ខែ៤ ឆ្នាំ២០២៤ ។សកម្មភាពរបស់ព្រាប សុវត្ថិ ពេលនេះគឺដូចគ្នាទៅនិងលោកខេម ប៊ុនថៃ ដែរដែលក្រោយប្រកាសច្រៀង៦បទ បានថ្លៃ១ម៉ឺនដុល្លារនោះនៅតាមកម្មវិធីមង្គលការផ្សេងៗគេកម្រឃើញមានម្ចាស់កម្មវិធីហ៊ានជួលលោកដូចមុន។ចំណែកលោកព្រាប សុវត្ថិ វិញមិនដែលបានប្រកាសពីការតម្លើងថ្លៃខ្លួនទេ ហើយលោកធ្លាប់ប្រាប់អ្នកយកព័តមានយើងថាពីមុននិងបច្ចុប្បន្នគេនៅតែហៅលោកច្រៀងជាធម្មតា បើទោះជាសកម្មភាពជាក់ស្ដែងមិនដូចអ្វីដែលលោកអះអាងក្ដី។
គូរកត់សម្គាល់ថាព្រាប សុវត្ថិ តាំងពីចូលជ្រកនៅGalaxy ជាង៣ឆ្នាំមកនេះលោកចេញច្រៀងសម្ដែងConcerts ភាគច្រើនតែកម្មវិធីរៀបចំដោយថៅកែរបស់លោក ដោយសារតែម្ចាស់កម្មវិធីខ្លះគេចង់ហៅតារាធម្មតាៗ ព្រោះតែហៅតារាឋានៈខ្ពស់ពេកនាំឲ្យអស់លុយច្រើនហើយពិបាកគោរម្យអោបលំទោន…។ប៉ុន្ដែសម្រាប់លោកសុវត្ថិ ហៅឧកញ៉ាស្នាយ វិញលោកថាទស្សនិកជនអាចហៅរូបជា”លោក”ក៍បាន ជា”ឧកញ៉ា”ក៍បានលោកមិនមានបញ្ហាចោទចំពោះរឿងមួយនេះទេ។ចំណែកប្រភពខ្លះថាលោកព្រាប សុវត្ថិ ក៍ឡើងថ្លៃខ្លួនខ្ពស់ជាងមុនដែរ បន្ទាប់ពីឡើងជាឧកញ៉ា ប៉ុន្ដែរឿងមួយនេះលោកលាក់ជិតតែម្ដង។ដោយឡែកអ្នកដឹកនាំកម្ម វិធីប្រគុំតន្ត្រីរបស់CTN លោកស៊ិន សិលា ធ្លាប់សំណូមពរថាតារាទាំងឡាយដែលឡើងគោរម្យងារជាឧកញ៉ារួចហើយគូរតែដកខ្លួនចេញឲ្យដាច់ស្រឡះពីអាជីពសិល្បៈព្រោះកុំឲ្យពេលចេញច្រៀងសម្ដែងពិបាកប្រកាសឬឡើងឈ្មោះនោះ តែពេលនេះមានតែ២រូបប៉ុណ្ណោះដែលមិនបន្ដអាជីពចាស់មួយនេះទៀតគឺលោកឧកញ៉ាទុំ សារុត ហៅនាយឃ្លោគ និងលាន អាហ្វ្រីលគីនីន ខណៈព្រាប សុវត្ថិ និងខេមរៈ សិរីមន្ដ នៅតែមិនទៅណាឆ្ងាយពីចម្រៀងឡើយ។
គូរបញ្ជាក់ថាព្រាប សុវត្ថិ បានចាប់អាជីពចម្រៀងរយៈពេល២៦ឆ្នាំ(១៩៩៧-២០២៣ )មកហើយ ដែលទោះជាពេលនេះលោកមានវ័យជ្រេបន្ដិចមែនប៉ុន្ដែមិនទាន់មានអ្នកជំនួសតំណែងលោកទាំងស្រុងបានទេ។អតីតតារាហង្សមាសរូបនេះបើសិនជាលែងច្រៀងសម្ដែងក៍លោកនៅតែជាសេដ្ឋីម្នាក់ក្នុងសិល្បៈដែរ ដោយសារតែកាលពីខែកញ្ញា ឆ្នាំ២០២០ មនុស្សជំនិតលោកទម្លាយថាលោកសុវត្ថិ សល់ទ្រព្យខ្ទង់៣០លានដុល្លារ ពីការចាប់អាជីពចម្រៀងជាង២០ឆ្នាំមកនេះ។តារាកូន៣រូបនេះក្រៅពីច្រៀងលោកមាន ក្របខណ្ឌនៅក្រសួងការពារជាតិដែលបច្ចុប្បន្នលោកមានឋានន្ដរស័ក្កជាជាវីរៈសេនីឯក និងជានាយរងការិយាល័យទី៥នៃកងទ័ព្ទជើងគោក។ក្នុងអាជីពចម្រៀងជាង២០ឆ្នាំនេះលោកព្រាប សុវត្ថិ ជួបរឿងអ្នកគាំទ្រព្រមានធ្វើពលិការដល់ទៅ៣ដង គឺលើកទី១៖កាលពីខែមេសា ឆ្នាំ២០២២ នៅពេលដែលលោកទទួលបានដីចំនួន៣ហិកតាបឹងតាមោគ ក្នុងខណ្ឌព្រែកព្នៅ តាមររយៈអនុក្រិតចុះហត្ថលេខាដោយអតីតនាយករដ្នមន្រ្ដី,លើកទី២៖ អំឡុងពេលលោកទៅច្រៀងនៅកូរ៉េ កាលពីចុងខែ៩ និងលើកទី៣៖ពេលលោកទៅច្រៀងនៅអូស្រា្ដលីនៅចុងខែ១០ ឆ្នាំ២០២៣ ។ប្រភពបានឲ្យដឹងថាក្រោយព្រាប សុវត្ថិ ឡើងជាឧកញ៉ានេះតារាប្រុសល្បីៗដែលលេចមុខច្រៀងតាមកម្មវិធីមង្គលការធំៗមានដូចជាលោកឆន សុវណ្ណារាជ ,ឆាយ វីរៈយុទ្ធ និងក្រុមតារាហង្សមាសមួយចំនួនទៀត។
មជ្ឈដ្ឋានមហាជនរងចាំមើលបន្ទាប់ពីព្រាប សុវត្ថិ ជួបឧបស័គ្គធំៗដល់ទៅ៣លើកក្នុងអាជីពបែបនេះលោកនៅតែរក្សារតំណែងជាតារាប្រុសលំដាប់ឈានមុខគេតទៅទៀត ឬមួយក៍ការគាំទ្រលោកនឹងមានការប្រែប្រួលខ្លាំងនៅឆ្នាំ២០២៤ ខាងមុខនេះ ?