ភ្នំពេញ ៖ ប្រជាពលរដ្ឋប្រមាណ២០០នាក់ តំណាងឱ្យ២៥៣គ្រួសារ រស់នៅខេត្ត ព្រះវិហារ ដែលបាត់បង់ដីធ្លីតាំងពីឆ្នាំ២០១២ ដោយសារកងកម្លាំងមានសមត្ថកិច្ចធ្វើការឈូស ឆាយវាយកម្ទេចផ្ទះ សាលារៀន វត្តអារាម រឹបអូសយកទាំងដីសាងសង់លំនៅឋាន ស្រែ ចម្ការរបស់ពួកគាត់ បានធ្វើដំណើរមកដល់មុខ ក្រសួងមហាផ្ទៃ ស្ថិតនៅតាមផ្លូវព្រះនរោត្តម ក្រុម៧៤ ស្ថិតនៅភូមិ១៣ សង្កាត់ទន្លេបាសាក់ ខណ្ឌចំការមន កាលពីម៉ោង៩និង២០នាទីព្រឹក ថ្ងៃទី២៤ ខែមករា ឆ្នាំ២០១៧។
លោកគិន ចន្ថា ភេទប្រុស អាយុ៥៣ឆ្នាំ អតីតយោធា ស្នាក់នៅភូមិស្វាយជ្រុំ ឃុំកន្ទួត ស្រុកជាំក្សាន្ត ខេត្តព្រះវិហារ បានប្រាប់ថា ព្រឹក នេះគាត់មកតវ៉ានៅមុខក្រសួងមហាផ្ទៃ ដោយ ឱ្យសម្តេចក្រឡាហោម ស ខេង ឧបនាយករដ្ឋមន្ត្រី និងសម្តេចនាយករដ្ឋមន្ត្រីហ៊ុន សែន និង លោកជំទាវបណ្ឌិតប៊ុន រ៉ានី សូមឱ្យជួយដោះ សាយវិវាទដីធ្លីដែលមានទំនាស់ តាំងពីឆ្នាំ២០១២ រហូតមកដល់បច្ចប្បន្ន ត្រូវអាជ្ញាធរ និងកង-កម្លាំងប្រដាប់អាវុធឃុបឃិតគ្នាវាយកម្ទេចផ្ទះ សាលារៀន និងវត្តអារាមពួកគាត់ចោលអស់ គ្មានសល់។
ប្រជាពលរដ្ឋបន្តទៀតថា គាត់រស់នៅ លើដីមានទំនាស់នោះ តាំងពីឆ្នាំ១៩៩៩ មាន ឯកសារបញ្ជាក់ពីអាជ្ញាធរមូលដ្ឋានត្រឹមត្រូវ មានប្រជាពលរដ្ឋសរុប២៥៣គ្រួសារ និងដីទំហំ ៣៣៥៣ហិកតារ រួមទាំងដីស្រែចម្ការ និង ដំណាំដាំដុះរបស់ប្រជាពលរដ្ឋ។ កាលពីខែវិច្ឆិកា ឆ្នាំ២០១៦ ពួកគាត់បានយកញត្តិមកដាក់នៅ ក្រសួងមហាផ្ទៃម្តងហើយ តែមិនទាន់ឃើញ មានដំណោះស្រាយសោះ ទើបពួកគាត់នាំគ្នា មកម្តងទៀត ដើម្បីពន្លឿនឱ្យឆាប់ដោះស្រាយ ឱ្យបានលឿនផង ពីព្រោះពួកគាត់សព្វថ្ងៃគ្មាន កន្លែងស្នាក់នៅប្រកបរបរចិញ្ចឹមជីវិតទេ។ បន្ទាប់ ពីពួកគាត់ចេញពីក្រសួងមហាផ្ទៃហើយបាននាំគ្នាទៅស្ថានីយទូរទស្សន៍ហង្ស-មាស ដើម្បីជួយ ផ្សព្វផ្សាយ រួចក៏ចេញទៅក្រសួងរៀបចំដែនដី នគរូបនីយកម្ម និងសំណង់ រួចត្រឡប់ទៅខេត្ត ព្រះវិហារវិញ៕ គួន ចំរើន