ភ្នំពេញ ៖ យុវវ័យប្រុសស្រី ៣នាក់ ជិះម៉ូតូ ១គ្រឿង ដឹកគ្នា ក្នុងល្បឿនយ៉ាងលឿន លុះមកដល់ត្រង់ចំណុចរង្វង់មូល មិនបង្អង់ល្បឿន ក៏ជ្រុលឡើងខឿនផ្លូវ រួចជ្រុលទៅបុកបង្គោលប៉ាណូ បណ្តាលឱ្យបាក់អស់ ១ផ្ទាំង ធ្វើឱ្យយុវជន ២នាក់ រងរបួសធ្ងន់ ចំណែកយុវតីម្នាក់ទៀត រងរបួសស្រាល។
ករណីគ្រោះថ្នាក់ចរាចរណ៍នេះ កើតឡើងកាលពីវេលាម៉ោង៤ទៀបភ្លឺ ថ្ងៃទី២៧ ខែវិច្ឆិកា ឆ្នាំ២០២៣ ត្រង់ចំណុចរង្វង់មូលនាងអប្សរា តាមបណ្តោយផ្លូវ OCIC ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា។តាមប្រភពពីសន្តិសុខដែលឃើញហេតុការណ៍ បានឱ្យដឹងថា ដំបូង គេឃើញយុវជន ២នាក់ និងយុវតីម្នាក់ ជិះម៉ូតូ ១គ្រឿង ម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ពោធិ៍សាត់ 1H-8595 ធ្វើដំណើរតាមបណ្តោយផ្លូវ OCIC ទិសដៅពីកើត មកលិច ក្នុងល្បឿនយ៉ាងលឿន។ ខណៈមកដល់ចំណុចកើតហេតុ បានជ្រុលបុកឡើងលើចិញ្ចើមផ្លូវ ទៅបុកផ្លាកប៉ាណូ បាក់រាបដល់ដី និងដួលម៉ូតូ រងរបួសយុវជន២នាក់ធ្ងន់ ចំណែកយុវតីម្នាក់ រងរបួសស្រាល។
ក្រោយកើតហេតុ សមត្ថកិច្ចបានចុះមកជួយអន្តរាគមន៍ និងទាក់ទងទៅរថយន្តសង្គ្រោះដែរ តែមិនមានអ្នកទទួល ទើបមិត្តភក្តិជនរងគ្រោះ សម្រេចចិត្តលើកជនរងគ្រោះដាក់ម៉ូតូកង់បី ដឹកទៅមន្ទីរពេទ្យកាលម៉ែត ដើម្បីសង្គ្រោះ។ ចំណែកឯយុវតីដែលរងរបួសស្រាល បានទូរស័ព្ទហៅសាច់ញាតិមកយកទៅផ្ទះវិញបាត់ទៅ។ដោយឡែកម៉ូតូ ត្រូវបានសមត្ថកិច្ចប៉ុស្តិ៍ជ្រោយចង្វា នាំយកទៅរក្សាទុក រង់ចាំដោះស្រាយនៅពេលក្រោយ៕
