ភ្នំពេញ៖លោកព្រាប សុវត្ថិ និងម៉េង កែវពេជ្ជតា ដែលទស្សនិកជនចាត់ទុកថាជាកំពូលតារាចម្រៀងប្រចាំប្រទេសនោះបានចាប់ដៃគ្នាច្រៀងសម្ដែងសារជាថ្មីនៅលើឆាកតន្រ្ដីទូរទស្សន៍បាយ័ននៅនៅកោះពេជ្រ កាលពីរាត្រីថ្ងៃទី២៦ ខែវិច្ឆិកា ពោលគឺនៅថ្ងៃទី១ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ទើបធ្វើឲ្យទស្សនិកជនមានការចាប់អារម្មណ៍តារាទាំងពីរនៅពេលច្រៀងឆ្លងឆ្លើយបទ”ជួបគ្នានៅ New Zealand “ ជាថ្មី ក្រោយអាកខានធ្វើជាដៃគូជាង២០ឆ្នាំ ។
នៅលើឆាកតន្រ្ដីលោកព្រាប សុវត្ថិ បាននិយាយទៅកាន់អ្នកនាងម៉េង កែវពេជ្ជតា ថាលោកបានបែកអ្ននាងពេជ្ជតា ជាង២០ឆ្នាំមកហើយ អត់បានជួបគ្នាទេ តែបេះដូងលោកឃើញដៃគូចាស់គឺរំភើបតែម្ដង។លោកសុវត្ថិ បន្ថែមថាលោកស្រលាញ់សម្លេងអ្នកនាងកែវពេជ្ជតា ចូលចិត្តសម្លេងអ្នកនាងពេជ្ជតា។
ចំណែកអ្នកនាងម៉េង កែវពេជ្ជតា បានតបទៅលោកព្រាប សុវត្ថិ វិញថាលោកសុវត្ថិ ជារៀមច្បង មានគុណធ័ម មានសុជីវធ័ម គូរឲ្យស្រលាញ់ និងឥឡូវមានឋានៈទៀត គូរឲ្យនឹក តែជាតិនេះហួសហើយ។ភ្លាមនោះលោកសុវត្ថិ និយាយកាត់ថាអត់ទាន់ហួសទេ គឺនៅតែជួបគ្នាចឹង ព្រោះជាសិល្បករដូចគ្នា ថ្ងៃណាមួយយើងជួបគ្នាម្ដងទៀតល្អជាងហ្នឹងទៀត។
ព្រាប សុវត្ថិ និងអ្នកនាងម៉េង កែវពេជ្ជតា ធ្លាប់ច្រៀងរួមគ្នានៅហង្សមាសនិងមានបទចម្រៀងជាច្រើនដែលតារាទាំងពីរបានចាប់ដៃគ្នាទទួលបានការគាំទ្រពីមហាជន។ប៉ុន្ដែពេលនេះលោកសុវត្ថិ ច្រៀងនៅGalaxy ខណៈដែលអ្នកនាងម៉េង កែវពេជ្ជតា មានវង្សតន្រ្ដីប្រចាំត្រកូលនិងធ្វើបទភ្លេងខ្លួនឯង ។តារាទាំងពីរបានជួបគ្នាតាមឆាកតន្រ្ដីជាញឹកញាប់ ប៉ុន្ដែជាង២ទសវត្សន៍មកហើយដែលមិនដែលច្រៀងជាដៃគូ គឺទើបតែពេលនេះអំឡុងពេលដែលទាំងសងខាងមានកូនកំលោះក្រមុំទៅហើយទើបមានឱកាសច្រៀងឆ្លងឆ្លើយគ្នា និងរំលឹកអនុស្សាវរីយ៍ចាស់ឡើងវិញ។
លោកគង់ វិសាល ជាអ្នកដឹកនាំកម្មវិធីសិល្បៈដ៍ល្បីល្បាញឈ្មោះរបស់ទូរទស្សន៍បាយ័ន និងការប្រគុំតន្រ្ដីPremium Festival Concert ផ្សាយផ្ទាល់លើកញ្ចក់ទូរទស្សន៍បាយ័នបានឲ្យដឹងថាតារាទាំងពីរល្បីដូចគ្នា ល្បីបានយូអង្វែងបានជាងគេ ហើយលោកស្រីម៉េង កែវពេជ្ជតា និងលោកព្រាប សុវត្ថិ អាចច្រៀងបុរាណក៍បាន សម័យក៍បាន គឺដូចគ្នា ។លោកវិសាល ថាបទ”ជួបគ្នានៅ New Zealand “ និពន្ធដោយលោកហ្វៃ សំអាង មានអាយុកាល២៣ឆ្នាំហើយ បទនេះពិរោះ គឺតាំងពីលោកធ្វើការនៅប៉ុស្ដិ៍ទូរទស្សន៍លេខ៣ ម្លេះ។លោកថាទស្សនិកជនមានការចាប់អារម្មណ៍ច្រើន គេពេញចិត្តដោយសារតែតារាទាំងពីរយល់ព្រមឯកភាពគ្នា ច្រៀងឆ្លងឆ្លើយ ហើយក៍ជាគោលការណ៍ខាងក្រុមហ៊ុនចង់បានដូចគ្នា ពោលគឺការចាប់ដៃគ្នារវាងកំពូលតារាទាំងពីរលោកជាអ្នកផ្ដើមគំនិត និងមានការយល់ព្រមពីគាត់ទាំងពីរផងដែរ។លោកវិសាល បន្ថែមថាលោកបានស្គាល់និងធ្វើការងារជាមួយលោកព្រាប សុវត្ថិ និងលោកស្រីម៉េង កែវពេជ្ជតា ជាង២០ឆ្នាំមកហើយ ពោលគឺតាំងពីឆ្នាំ១៩៩ -២០០០ ម្លេះ។
នៅលើហ្វេសបុករបស់អ្នកនាងម៉េង កែវពេជ្ជតា បានបង្ហោះសារទាក់ទងការច្រៀងសម្ដែងរបស់នាងជាមួយលោកព្រាប សុវត្ថិ ថា”រំភើបពេក រំភើបចិត្តណាស់ ច្រៀងឡើងខុសទំនុកផង អីផង” ។
គូរបញ្ជាក់ថាលោកព្រាប សុវត្ថិ បានអាចយុ៤៨ឆ្នាំ ហើយនៅតែរក្សារបានតំណែងជាតារាជូរមុខលំដាប់កំពូលដែលមិនទាន់មានតារារូបណាផ្ដួលលោកបានឡើយ បើទោះជាតាំងពីចាកចេញពីផលិតកម្មរស្មីហង្សមាស ចូលGalaxy ជាង៣ឆ្នាំនេះលោកសុវត្ថិ មិនសូវមានបទល្បីៗដូចមុនក្ដី ។អតីតតារាចម្រៀងហង្សមាសលោកនូ ស៊ឹប ធ្លាប់លើកឡើងថាលោកព្រាប សុវត្ថិ ជាតារាចម្រៀងចូលខ្នាតអន្ដរជាតិ តែលោកថារយៈពេលចុងក្រោយនេះលោកសុវត្ថិ មិនទាន់មានអ្វីលេចធ្លោទេ ព្រោះឃើញងាកទៅរកស៊ីច្រើន ។ដោយឡែកអ្នកនាងម៉េង កែវពេជ្ជតា វិញត្រូវបានអតីតអ្នកចាត់ការទូទៅផលិតកម្មហង្សមាសលោកអ៊ិន ទីតូ និយាយថាសម្លេង១គ្មាន២ ។ចំណែកលោកគង់ វិសាល សិល្បករជាច្រើនគោរពលោកព្រោះលោកដឹកនាំសិល្បៈជាង២០ឆ្នាំ មកហើយដែលឆ្លងកាត់បទពិសោធន៍ធ្វើConcerts រាប់រយឆាកដោយជោគជ័យ ហើយលោកវិសាល ជាអ្នកដឹកនាំប្រកបដោយមនោសញ្ចេតនានិងធ្លាប់ជួយតារាជាច្រើនឲ្យមានការងារធ្វើនិងមានឈ្មោះបោះសម្លេងរហូតដល់សព្វថ្ងៃមានដូចជាតារាចម្រៀង ,ពិធីករ និងតារាបង្ហាញម៉ូដជាដើម ៕
