ភ្នំពេញ ៖ តារាចម្រៀងវ័យក្មេង សម្លេងផ្អែមស្រទន់ ដែលទទួលបានការបេញចិត្តពីសម្តេចហ៊ុន សែន អតីត នាយករដ្ឋមន្ត្រី នៃព្រះរាជាណាចក្រកម្ពុជា យុវជន ពេជ្រ រដ្ឋា បានជួបគ្រោះអកុសល ដួលម៉ូតូលើដងផ្លូវ បណ្តាលឱ្យបាត់បង់ជីវិត កាលពីវេលាម៉ោង ១២និង៤៨នាទីអធ្រាត្រ ឈានចូលថ្ងៃទី២៩ ខែវិច្ឆិកា ឆ្នាំ២០២៣ នៅលើផ្លូវស្ថិតក្នុងភូមិសាស្ត្រខេត្តពោធិ៍សាត់ នៅពេលធ្វើដំណើរមកពីច្រៀងនៅក្នុងកម្មវិធីមង្គលការមួយ។
ការស្លាប់របស់តារាចម្រៀង ពេជ្រ រដ្ឋា ធ្វើឲ្យមិត្តរួមអាជីព និងមិត្តភក្តិជាច្រើន បានសម្តែងការសោកស្តាយ យ៉ាងខ្លាំង ក្នុងនោះតារាចម្រៀងស្រី ចំរើន សុភ័ក្ត្រ ដែលទើបរៀបការប្តីបានជាង១ខែ ក្រៅពីការសោកស្តាយ ដោយក្តីស្រឡាញ់រាប់អាន នាងបានបួងសួងឲ្យព្រលឹងពេជ្រ រដ្ឋា បានទៅកាន់ទីស្ងប់សុខ ហើយបើសិនជាអាច សូមមកចាប់ជាតិថ្មី ក្នុងផ្ទៃរបស់នាងចុះ។
តាមប្រភពព័ត៌មាន បានឲ្យដឹងថា តារាចម្រៀងផលិតកម្មថោន ពេជ្រ រដ្ឋា អាយុ ៣១ឆ្នាំ បានទទួលមរណភាព ដោយគ្រោះថ្នាក់ចរាចរណ៍នៅស្រុកភ្នំក្រវាញ ខេត្តពោធិ៍សាត់ វេលាម៉ោង ១២និង២៤ នាទី ពេលជិះម៉ូតូត្រឡប់ ពីច្រៀងក្នុងកម្មវិធីមង្គលការមួយ ត្រឡប់មកផ្ទះ តាមផ្លូវជាតិលេខ ៥៥ ចន្លោះគីឡូម៉ែត្រលេខ២៧-២៨ ស្ថិតក្នុង ភូមិព្រែកទី៣ ឃុំសំរោង ស្រុកភ្នំក្រវាញ ខេត្តពោធិ៍សាត់ លុះជិតដល់ផ្ទះរបស់ខ្លួនទៅហើយ គឺនៅភូមិអូរហេង ឃុំសំរោង ស្រុកក្រវាញ ខេត្តពោធិ៍សាត់ ស្រាប់តែជួបគ្រោះថ្នាក់ចរាចរណ៍ ផុងលលាដ៍ក្បាល និងបាក់ឆ្អឹងដង កាំបិត បណ្តាលឲ្យបាត់បង់ជីវិតតែម្តង។
តាមប្រភពប្អូនប្រុសបង្កើតរបស់តារាចម្រៀង ពេជ្រ រដ្ឋា បានបញ្ជាក់នៅព្រឹកថ្ងៃទី២៩ ខែវិច្ឆិកា ឆ្នាំ២០២៣ ថា ពេជ្រ រដ្ឋា ជាបងប្រុសរបស់ខ្លួន បានជួបគ្រោះថ្នាក់បាត់បង់ជីវិតទៅហើយ ដែលរូបគេជាប្អូន ពិតជាទទួល យកមិនបានទេ ។ ជាមួយនេះ យុវជនជាប្អូនប្រុសរបស់ជនរងគ្រោះ បានបួងសួងសូមឱ្យវិញ្ញាណក្ខន្ធបងប្រុស បានទៅកាន់សុគតិភព។
ប្រភពខាងលើ ឲ្យដឹងបន្តថា តារាចម្រៀង ពេជ្រ រដ្ឋា បានដួលម៉ូតូ អូសជាច្រើនម៉ែត្រ តែករណីនេះ ពុំទាន់មាន ការបញ្ជាក់ច្បាស់នៅឡើយថាតើបណ្តាលមកពីមូលហេតុអ្វី ទើបបណ្តាលឲ្យជនរងគ្រោះដួលម៉ូតូ រហូតបាត់ បង់ជីវិតបែបនេះ?
ក្រោយកើតហេតុ សពរបស់តារាចម្រៀង ពេជ្រ រដ្ឋា ត្រូវបានដឹកទៅកាន់ស្រុកកំណើត ដើម្បីរៀបចំធ្វើបុណ្យ តាមប្រពៃណី។
ជុំវិញករណីខាងលើនេះ មានតារាចម្រៀងរួមអាជីព និងមិត្តភក្តិរបស់ពេជ្រ រដ្ឋា បានសម្តែងការសោកស្តាយ និងស្ទើរតែមិនគួរឲ្យជឿថា តារាចម្រៀងវ័យក្មេងរូបនេះ លាទៅដោយគ្មានថ្ងៃវិលត្រឡប់ យ៉ាងលឿនបែបនេះ។
តារាចម្រៀង ចំរើន សុភ័ក្រ្ត ដែលទើបរៀបការប្តីថ្មោងថ្មី បានបង្ហាញនូវការសោកស្តាយយ៉ាងខ្លាំង ចំពោះការ បាត់បង់មិត្តរួមអាជីពម្នាក់យ៉ាងលឿនបែបនេះ ព្រោះទើបតែនិយាយាលេងជាមួយនាងសោះ បែរជាទៅបាត់ រហូត។ ជាមួយគ្នានេះ តារាចម្រៀងចំរើន សុភ័ក្រ្ត បានបួងសួងឲ្យវិញ្ញាណក្ខណ្ឌពេជ្រ រដ្ឋា បានទៅកានទីស្ងប់ សុខ ហើយបើសិនជាអាច ឲ្យមកចាប់កំណើតជាថ្មី នៅក្នុងផ្ទៃរបស់នាងចុះ។
តារាចម្រៀង ចំរើន សុភ័ក្ត្រ បានសរសេរក្នុងទំព័របណ្តាញសង្គម ហ្វេសប៊ុក របស់នាង នៅថ្ងៃទី២៩ ខែវិច្ឆិកា ឆ្នាំ២០២៣ ថា «ឱ រដ្ឋា ប្អូនបងអើយ! បងមិនដឹងនិយាយថាម៉េចទេ ហេតុអីទៅអូន? ទើបនិយាយលេងជា មួយបងសោះ ហេតុអីជីវិតមនុស្សយើងផុយស្រួយម្ល៉េះ? សូមឲ្យប្អូនបានទៅកានទីស្ងប់សុខ។ បើសិនជាអាច បងសូមឲ្យប្អូនមកនៅជាមួយបងណា Pich Ratha ប្អូនបង»។
សូមបញ្ជាក់ថា ពិធីបុណ្យសព បេជ្រ រដ្ឋា ប្រារព្ធធ្វើនៅភូមិអូរហេង ឃុំសំរោង ស្រុកភ្នំក្រវាញ ខេត្តពោធិ៍សាត់ (ទល់មុខវត្តបង្ហោះក្បាល)៕
