ភ្នំពេញ ៖ ស្ត្រីជាម្តាយ និងក្រុមគ្រួសារ សាច់ញាតិបងប្អូនរបស់ជនសង្ស័យប្តីប្រពន្ធ ២នាក់ ជាអាជីវករលក់ដូរ ដែលមានទំនាស់វាយតប់គ្នាជាមួយកម្លាំងសណ្តាប់ខណ្ឌសែនសុខ បានលើកគ្នាទៅអធិការដ្ឋានខណ្ឌសែនសុខ កាលពីព្រឹកថ្ងៃទី០១ ខែធ្នូ ឆ្នាំ ០២៣ ដោយស្រែកថាអយុត្តិធម៌ និងទទូចស្នើរដល់សមត្ថកិច្ច មេត្តាសម្របសម្រួល ដោះលែងក្រៅប្រព័ន្ធតុលាការ ព្រោះកូនស្រីរបស់គាត់ ជាអ្នករងគ្រោះ ដែលត្រូវបានកម្លាំងសណ្តាប់ធ្នាប់ខណ្ឌ សែនសុខ វាយ ខណៈពេលដែលមានទំនាស់គ្នា ពេលរៀបចំសណ្តាប់ធ្នាប់។
អ្នកស្រី នួន ហន់ អាយុ៦០ឆ្នាំ ត្រូវជាម្តាយជនសង្ស័យ ២នាក់ប្តីប្រពន្ធ ដែលត្រូវឃាត់ខ្លួន បានលើកដៃសំពះ រៀបរាប់ថា យុត្តិធម៌ណាស់ ដែលកូនស្រីរបស់គាត់ត្រូវបានកម្លាំងសណ្តាប់ធ្នាប់ខណ្ឌសែនសុខ វាយបណ្តាល ឱ្យរងរបួសហើយ ត្រូវបានកម្លាំងនគរបាលឃាត់ខ្លួន និងបញ្ជូនទៅកាន់តុលាការទៀត។
ស្ត្រីជាម្តាយ បានបន្តថា កូនស្រីរបស់គាត់និងប្តី ជាអ្នកលក់ពងទាកូន និងពោះគោទឹកប្រហុក នៅចំណុចសួន ច្បារខាងមុខវិទ្យាស្ថានស្រាវជ្រាវនិងអភិវឌ្ឍន៍ព្រៃឈើ សត្វព្រៃ តាមមហាវិថីភ្នំពេញ-ហាណូយ ក្នុងភូមិរោង ចក្រ សង្កាត់គោកឃ្លាង ខណ្ឌសែនសុខ ។ មុនពេលកើតហេតុ កាលពីថ្ងៃទី២៩ ខែវិច្ឆិកាឆ្នាំ ២០២៣ នៅវេលា ម៉ោងប្រមាណ ១១និង៣០នាទីយប់ ខណៈពេលដែលកំពុងតែលក់ដូរ ក៏មានទំនាស់គ្នាជាមួយកម្លាំងសណ្តាប់ ធ្នាប់ខណ្ឌសែនសុខ ដែលបានចុះទៅរៀបចំសណ្តាប់ធ្នាប់ ហើយត្រូវបានកម្លាំងសណ្តាប់ធ្នាប់វាយហើម សៀត ថ្កា និងត្រូវបាន សមត្ថកិច្ចចុះទៅឃាត់ខ្លួនទាំងសងខាងសរុបទាំងអស់៤នាក់ បញ្ជូនទៅកាន់តុលាការតែម្តង។ ការទាស់ទែងគ្នានេះផ្តើមចេញពីកូនស្រីរបស់គាត់ លក់ដូរក្រាលកន្ទេលលើសួនច្បារ ហើយត្រូវបានកម្លាំង សណ្តាប់ធ្នាប់ហាមឃាត់ ខណៈពេលដែលប្រពន្ធរបស់សណ្តាប់ធ្នាប់រូបនោះ អង្គុយញ៉ាំអីលើ សួនដែរមិន ឃាត់ ។
ស្ត្រីជាម្តាយ ក៏បានលើកដៃសំពះអង្វរដល់សមត្ថកិច្ចនគរបាល មេត្តាជួយសម្របសម្រួល និងដោះលែងកូនស្រី និងកូនប្រសាររបស់គាត់ ហើយបញ្ចប់រឿងត្រឹមនេះ។
គួររំលឹកថា កាលពីវេលាម៉ោង ៩និង៥០នាទីយប់ ថ្ងៃទី២៩ ខែវិច្ឆិកា ឆ្នាំ២០២៣ មានករណីហិង្សាមួយ បានកើត ឡើង នៅត្រង់ចំណុច សួនច្បារមុខវិទ្យាស្ថានស្រាវជ្រាវព្រៃឈើ តាមបណ្តោយផ្លូវហាណូយ ស្ថិតក្នុងសង្កាត់ គោកឃ្លាង ខណ្ឌសែនសុខ ដោយកម្លាំងសណ្តាប់ធ្នាប់សាលា ខណ្ឌសែនសុខ បានចុះរៀបចំសណ្តាប់ ធ្នាប់ការ លក់ដូរនៅតាមបណ្តោយផ្លូវហាណូយ ស្រាប់តែកើតមានទំនាស់ពាក្យសម្តីជាមួយនឹងអាជីវករលក់ដូរ តាមរ៉ឺម៉ក រហូតដល់ផ្ទុះអំពើហិង្សា វាយតប់គ្នា។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេឃើញបុរសម្នាក់ និងស្ត្រីម្នាក់ ដែលជាអ្នកលក់ដូរភេសជ្ជៈ និងរបស់ហូបចុក តាមម៉ូតូសណ្តោងរ៉ឺម៉ក ហើយពួកគាត់បានបើកម៉ូតូស ណ្តោងរ៉ឺម៉ក ទៅឈប់លក់ដូរនៅត្រង់ចំណុចសួនច្បារកើតហេតុ។ លុះដល់វេលាកើតហេតុ មានកម្លាំងសណ្តាប់ធ្នាប់សាលាខណ្ឌសែនសុខ ៤ទៅ៥នាក់ បានជិះម៉ូតូទៅឈប់នៅត្រង់ចំណុចកើតហេតុនោះ រួចដើរប្រាប់ និងណែនាំទាំងអាជីវករ និងប្រជាពលរដ្ឋ ដែលទៅអង្គុយលេងនៅទីនេះ សូមកុំឱ្យអង្គុយនៅលើស្មៅ។
ប្រភពដដែល បន្តថា រំពេចនោះ ដោយមិនដឹងថា តើកម្លាំងសណ្តាប់ធ្នាប់ និងអាជីវករ ២នាក់ប្តីប្រពន្ធនោះ មានបញ្ហាអ្វីនឹងគ្នានោះទេ ស្រាប់តែកើតមានការជជែកគ្នាយ៉ាងតឹងសរសៃក រហូតក្លាយជាការឈ្លោះប្រកែកគ្នា និងឈានដល់ការប្រើប្រាស់អំពើហិង្សា វាយតប់គ្នា បង្កឱ្យមានការភ្ញាក់ផ្អើលដល់សមត្ថកិច្ចមូលដ្ឋាន ចុះមកធ្វើការអន្តរាគមន៍ភ្លាមៗតែម្តង។
តាមសម្តីភាគីអាជីវករ ២នាក់ប្តីប្រពន្ធ បានរៀបរាប់ប្រាប់ថា ពួកគាត់បានមកលក់ដូរនៅត្រង់ចំណុចកើតហេតុនេះ អស់រយៈពេលជាង កន្លះខែទៅហើយ តែមិនដែលមានអ្នកណាមកដេញនោះទេ។ លុះនៅយប់កើតហេតុ ពួកគាត់មកលក់ដូរនៅទីនោះជាធម្មតា ស្របពេលនោះ ក៏មានបងប្អូនរបស់គាត់ទើបមកពីស្រុក និងបានដាក់បាយមកអង្គុយហូបជាមួយគាត់ នៅលើស្មៅសួនច្បារ ត្រង់ចំណុចកើតហេតុនោះ។ លុះក្រោយមក ក៏មានកម្លាំងសណ្តាប់ធ្នាប់សាលាខណ្ឌសែនសុខ ៤ទៅ៥នាក់ ជិះម៉ូតូមកដល់ រួចបាននិយាយថា “ដាក់លក់អ៊ីចឹងប្រយ័ត្នគេអូសយកទៅសាលាខណ្ឌ”។ បន្ទាប់មក គាត់ក៏ជិះម៉ូតូសណ្តោងរ៉ឺម៉ករបស់គាត់ចេញ រួចទៅឈប់ទុកចោលនៅមួយចំហៀងផ្លូវម្ខាងទៀត។
អាជីវករ ២នាក់ប្តីប្រពន្ធ បន្តថា ពេលនោះ មានកម្លាំងសណ្តាប់ធ្នាប់ម្នាក់ បានមកប្រាប់ពួកគាត់ទៀតថា កុំអង្គុយនៅលើស្មៅ និងបានហាមគាត់មកលក់ដូរនៅទីនោះបន្តទៀតទេ ព្រោះកុំឱ្យប៉ះពាល់ដល់សណ្តាប់ធ្នាប់។ ពេលនោះ បងប្អូនរបស់គាត់ក៏បាននិយាយថា បងអើយ1 យប់ហើយ អនុគ្រោះធ្វើមិនឃើញខ្លះទៅ ព្រោះគាត់ក្រ ជំពាក់លុយគេច្រើនណាស់ ស្រាប់តែកម្លាំងសណ្តាប់ធ្នាប់ម្នាក់ ច្រឡោត និងគំរាមវាយមកលើរូបគាត់ទាំង២នាក់ប្តីប្រពន្ធតែម្តង។ ភ្លាមនោះ កម្លាំងសណ្តាប់ធ្នាប់ បានវាយប្តីរបស់គាត់ ហើយពេលដែលគាត់ចូលទៅជួយ ក៏វាយគាត់ចំសៀតផ្កា មួយដៃថែមទៀត។ បន្ទាប់ពីកើតមានជម្លោះ និងវាយតប់គ្នារួចមក ក៏មានបុរសម្នាក់ ទំនងជាមេរបស់កម្លាំងសណ្តាប់ធ្នាប់នោះ បានមកសុំឱ្យគាត់សម្រួលគ្នា ដើម្បីបញ្ចប់រឿង ព្រមទាំងសុំទោសពួកគាត់ ប៉ុន្តែពួកគាត់មិនព្រមទេ។
ចំណែកកម្លាំងសណ្តាប់ធ្នាប់សាលាខណ្ឌសែនសុខ បានបញ្ជាក់ថា ពួកគាត់មិនបានប្រើប្រាស់អំពើហិង្សាដាក់ទៅលើប្តីប្រពន្ធទាំង២ ដូចដែលពួកគេចោទប្រកាន់នោះទេ គឺរយៈពេលកន្លងមក ថ្នាក់លើរបស់ពួកគាត់ បានដាក់បទបញ្ជាឱ្យពួកគាត់មកធ្វើការណែនាំ និងសុំអធ្យាស្រ័យប្រជាពលរដ្ឋដែលមកកម្សាន្តនៅសួនច្បារ ត្រង់ចំណុចកើតហេតុនេះ សូមឱ្យពួកគាត់កុំអង្គុយនៅលើស្មៅ ព្រោះខ្លាចងាប់ស្មៅ។
កម្លាំងសណ្តាប់ធ្នាប់សាលាខណ្ឌសែនសុខ បន្តថា ចំពោះអ្នកលក់ដូរ គឺមិនតម្រូវអត់ឱ្យឈប់លក់ដូរជាអចិន្ត្រៃយ៍នោះទេ ដោយប្តីប្រពន្ធទាំងពីរនាក់នោះ ពួកគាត់បានប្រាប់និងណែនាំជាច្រើនដងមកហើយ។ លុះនៅយប់កើតហេតុ កម្លាំងសណ្តាប់ធ្នាប់ ក៏មិនបានចុះទៅដេញពួកគេដែរ គឺគ្រាន់តែចុះទៅណែនាំនិងត្រួតពិនិត្យ ដើម្បីរាយការណ៍ជូនថ្នាក់លើតែប៉ុណ្ណោះ។ ប៉ុន្តែពេលនោះ ស្រាប់តែពួកគេដកទូរស័ព្ទមកថតកម្លាំងសណ្តាប់ធ្នាប់ និងបានច្រឡោត ស្រែកខ្លាំងៗ ព្រមទាំងបានស្ទុះមកប្រវាយប្រតប់ បណ្តាលឱ្យកម្លាំងរបស់គាត់ម្នាក់រងរបួសរលាត់ដៃជើងទៀតផង។
ក្រោយពេលកើតហេតុ សមត្ថកិច្ចមូលដ្ឋាន បាននាំខ្លួនភាគីទាំងពីរ ទៅកាន់ប៉ុស្តិ៍នរគបាលរដ្ឋបាលគោកឃ្លាង ដើម្បីធ្វើការសាកសួរ និងដោះស្រាយ៕