ភ្នំពេញ៖មាន សូនីតា បានផ្ដល់បទសម្ភាសន៍កាលពីថ្ងៃទី២២ ខែធ្នូ ថាក្រោយឃើញហ៊ិន ច័ន្ទនីរ័ត្ន ចូលរោងការនាងក៍មានអារម្មណ៍ចង់រៀបការដូចមិត្តភក្ដិដ៍ជិតដិតរបស់នាងម្នាក់នេះដែរ។យ៉ាងណានាងថាសម្រាប់កូនកំលោះជាអ្នកណានោះសូនីតា ថាមិនទាន់អាចបង្ហាញឬប្រាប់បានទេ ព្រោះនាងនិងបុរសនោះស្ថិតក្នុងតំណាក់កាលនៅមើលចិត្តគ្នាសិន ហើយពេលនេះនៅមិនទាន់ច្បាស់លាស់។ប៉ុន្ដែនាងទទួលស្គាល់ថានាងមិនមែនបេះដូងនៅទំនេរឡើយ បើទោះជាបុរសនោះនិងនាងមិនទាន់ច្បាស់លាស់គ្នា១០០% ក្ដី។
មាន សូនីតា និយាយលាយឡំសំណើចថាឃើញគេរៀបការចិត្តចង់តែរៀបការដែរ តែធ្វើម៉េចបើអត់ទាន់ត្រូវគ្នារឿងនេះជាមួយគាត់(សង្សារ)ផង។ការបង្ហើបចង់បានភួយសាច់របស់សូនីតា នាពេលនេះ ចំខែកត្តិកតែម្ដងដែលមិនថាតែតារាទេ អ្នកនៅក្រៅរង្វង់សិល្បៈក៍រៀបការជាបន្ដបន្ទាប់ដែរ ព្រោះតែមិនចង់ទុកកាយ៉ាឲ្យរងារឯកោម្នាក់ឯងទេ។សម្រាប់សូនីតា ជាស្រីស្អាតបែបនេះនាងមានជម្រើសស្នេហ៍ច្រើនហេតុនេះការមិនព្រមបញ្ចេញមុខសង្សារឲ្យគេស្គាល់បែបនេះអាចជាការបើកផ្លូវឲ្យបុរសផ្សេងនៅតែមានសិទ្ធិចូលមកប្រជែងដណ្ដើមបេះដូងនាងបាន។
មាន សូនីតា ថាទំនាក់ទំនងរវាងនាងនិងបុរសម្នាក់នោះមិនទាន់ឈានដល់ការភ្ជាប់ពាក្យ ឬកំណត់ពេលវេលារៀបការបានទេ ព្រោះនាងត្រូវការពេលវេលាមើលចិត្តគ្នាថែមទៀត។
តារាសម្ដែងមាន សូនីតា ថានៅចុងឆ្នាំ២០២៣ នេះនាងមានគម្រោងធំមួយដែលមិនធ្លាប់មានពីមុននោះគឺនាងបានចាប់ដៃជាមួយតារាចម្រៀងម៉ានិត បង្កើតកម្មវិធី”ឋានសួគ័លើដី” ដែលកម្មវិធីនេះនាងធ្វើឡើងដើម្បីជួយលើកស្ទួយតំបន់ទេសចរណ៍ក្នុងស្រុក ផ្សព្វផ្សាយពីកន្លែងកម្សាន្ដស្អាតៗក្នុងខេត្តទាំង២៥ ខេត្តក្រុងហើយការងារនេះនាងថាធ្វើដោយបេះដូង ចំណាយទាំងពេលវេលា និងថវិការផ្ទាល់ខ្លួន ព្រោះគ្មានSponsor ទេហើយបើកឆាកដំបូងនាងផ្ដើមចេញពីខេត្តសៀមរាប ព្រោះទីនោះមានអ្វីៗគ្រប់យ៉ាងបែបយ៉ាង ទាំងវប្បធ័ម អរិយធ័ម ទឹកជ្រោះ កន្លែងកម្សាន្ដជាច្រើនទៀត។នាងថានៅថ្ងៃទី២៥ ធ្នូ នាងបានបើកឆាកសម្ពោធគម្រោងថ្មីនេះនៅខេត្តសៀមរាប ហើយសង្ឃឹមថាបងប្អូនជួយលើកទឹកចិត្តគាំទ្រដល់នាងដែលធ្វើកិច្ចការជួយដល់សង្គមមួយនេះ។សូនីតា សារភាពថាការងារនាងដំបូងនេះមានអ្នកខ្លះថាធ្វើបានតែ១ឆាវ តែនាងមិនបោះបង់គោលដៅឡើយ។តារាសម្លេងស្រាលរូបនេះថាក្រៅពីចេញពីដេអូជាVlog នោះនាងក៍ចេញជាMV គ្រប់ខេត្តក្រុងតែម្ដងដើម្បីបង្ហាញពីទីតាំងទេសចរណ៍នៅទីនោះឲ្យទាំងភ្ញៀវជាតិនិងអន្ដរជាតិបានស្គាល់កាន់តែច្បាស់ថែមទៀត។នាងថានេះជាកាដូខ្លួនឯងសម្រាប់ចុងឆ្នាំ២០២៣ និងដើមឆ្នាំ២០២៤ តទៅ ដែលនាងនឹងធ្វើការងារមួយនេះឲ្យចេញជារូបរាងឡើងតាមគម្រោង។
យ៉ាងណាផែនការណ៍របស់មាន សូនីតា នាពេលនេះក៍មានតារាផ្សេងៗទៀតធ្លាប់បានធ្វើដែរក្នុងនោះមានដូចជាលោកករុណា ពេជ្រ ដែលមានឆន្ទៈស្រដៀងមាន សូនីតា ដែរដោយលោកថានឹងចេញចម្រៀងរៀបរាប់ពីតំបន់ទេសចរណ៍ទាំង២៥ខេត្តក្រុងដើម្បីលើកស្ទួយពីវិស័យនេះឲ្យផុសផុលឡើង តែលោកពេជ្រ ទើបចេញបទចម្រៀងរៀបរាប់ពីសម្រស់ខេត្តនីមួយៗនោះបានតែ២ខេត្ដប៉ុណ្ណោះគឺខេត្តកំពង់ស្ពឺ និងបាត់ដំបង ហេតុនេះគេចាំមើលថាតើសូនីតា ដែលអះអាងថាកម្មវិធីនាងបង្កើតឡើងនេះអត់មានអ្នកឧបត្ថម្ភ នោះអាចឲ្យនាងបានសម្រេចបំណងដល់គោលដៅឬយ៉ាងណា ?
មាន សូនីតា ជាស្រីស្អាតម្នាក់មិនដែលបណ្ដើរគូស្នេហ៍ជាចំហម្ដងឡើយ ខណៈដែលកន្លងមកធ្លាប់លេចឭថានាងមានគូស្នេហ៍ជាមន្រ្ដីគយវ័យចំណាស់ម្នាក់ តែនាងមិនដែលចេញមុខបំភ្លឺរឿងនេះទេ ។ប្រភពបានឲ្យដឹងថាសូនីតា ដែលបានបើកហាងកាហ្វេ ហាងលក់ក្រម៉ា រហូតដល់នាងជាប់ឈ្មោះជារាជនីក្រម៉ា និងជិះរយន្ដទំនើបៗផ្លាស់ប្ដូរគ្នានោះធ្វើឲ្យគេសង្ស័យកាន់តែច្រើនថានាងមានគូស្នេហ៍នៅក្រោយខ្នង ទើបនាងមានលុយដំណើរការអាជីវកម្មទាំងនោះឡើងក្នុងពេលតែមួយបែបនេះ។ប៉ុន្ដែសូនីតា បែជាថាពេលនេះចង់រៀបការតែមិនទាន់ត្រូវរ៉ូវគ្នាជាមួយកូនកំលោះលាក់មុខរបស់នាងទៅវិញ ៕