ភ្នំពេញ៖ទេព បូព្រឹក្ស ៖បានបង្ហាញអារម្មណ៍ចង់សាកចិត្តលោកងួន ចាន់ដេវីត នៅថ្ងៃខួបកំណើតគម្រប់អាយុ៣០ឆ្នាំ កាលពីថ្ងៃទី២២ ខែធ្នូ ថានាងចង់បានកូនថែម ។ប៉ុន្ដែអ្វីដែលគូរឲ្យចាប់អារម្មណ៍បូព្រឹក្ស និងដេវីត ដែលគ្រងឈុតអាពាហ៍ ពិពាហ៍ ថតជាមួយកូនបុ្រសនាងAlbert ទើបមានអាយុ១០ខែ នោះក៍មានក្មេងបុ្រសម្នាក់ទៀតដែលមានអាយុខ្ទង់៧ឆ្នាំត្រូវគេសង្ស័យថាជាកូនបុ្រសរបស់នាងមករួមជាសមាជិករបស់ពួកគេផងដែរដែលធ្វើឲ្យមានការលេចឭកាន់តែច្រើនថាតាមពិតបូព្រឹក្ស មិនមែនកូន១ទេ គឺមានកូន២ទៅហើយ ។តែការលេចឮទាំងនេះមិនទាន់មានការបញ្ជាក់ពីស្រីនិច្ច ផ្ទាល់ទេ បើទោះជានាងតែងតែហៅកុមារនោះថាជាកូនៗក្ដី។ចំណែកលោកងួន ចាន់ដេវីត វិញបានថ្លែងនៅថ្ងៃខួបកំណើតគូស្នេហ៍នោះថាលោកមានមោទនភាពដែលបានរួមតំណើរជីវិតជាមួយបូព្រឹក្ស រយៈពេលជាង៧ឆ្នាំមកនេះ។
ងួន ចាន់ដេវីត ថ្លែងសារថាអរគុណប៉ុន្មានឆ្នាំមកនេះដែលកាន់ដៃគ្នារហូតទទួលបានសុភមង្គលមួយយ៉ាងពេញលេញ អ្នកជាមនុស្សស្រីពូកែ រឹងមាំ និងជាមនុស្សស្រីដែលអស្ចារ្យ ជាកតិត្ដិយសខ្ញុំណាស់ ដែលបានរួមដំណើរជីវិតជាមួយអ្នក។Fan ទាំងសងខាងបានជូនពរឲ្យគូស្នេហ៍ទេព បូព្រឹក្ស -ងួន ចាន់ដេវីត រឹតតែទទួលបានសុភមង្គលទ្វេដង និងឆាប់បានកូនថែមដូចក្ដីប្រាថ្នា។ប៉ុន្ដែទន្ទឹមនិងនេះក៍មានអ្នកខ្លះបានដាស់តឿនទៅទេព បូព្រឹក្ស និងដេវីត ថាគូតែដល់ពេលវេលាដែលពួកគេត្រូវដឹកដៃគ្នាចូលរោងការហើយ ព្រោះបើគិតតែពីរឿងយកកូនថែម អត់ព្រមក្រាបផ្ទឹមបែបនេះ ជាតារាល្បីផងនឹងមានFan ច្រើនយកគំរូតាមជាមិនខាន ។
គូរបញ្ជាក់ថាទេព បូព្រឹក្ស បានបង្កាត់ភ្លើងស្នេហាជាមួយលោកងួន ចាន់ដេវីត កាលពីឆ្នាំ២០១៦ ហើយកាលពីឆ្នាំ២០១៩ អ្នកទាំងពីរដឹកដៃគ្នាទៅថតរូបPre_Wedding នៅកោះម៉ាល់ឌីវ និងចង់រៀបការជាមួយគ្នាទៀតផង។ប៉ុន្ដែពេលនេះដំណឹងពួកគេក្រាបផ្ទឹមបានសា្ងត់ទៅវិញ ហើយកាលពីថ្ងៃទី១៦ ខែកុម្ភៈ ឆ្នាំ២០២៣ បូព្រឹក្ស សម្រាលបានកូនប្រុស១ដោយដាក់ឈ្មោះថាទេព បញ្ចាវរាប ហៅAlbert ។បូព្រឹក្ស ធ្លាប់ប្រាប់អ្នកយកព័តមានយើងថារឿងខ្លះនាងអាចនិយាយបានរឿងខ្លះមិនអាចនិយាយបានដែលការវាចាបែបនេះតបទៅអ្នកដែលសួរនាងថាតើនាងមានធ្លាប់បានចុះអេតាស៊ីវិលជាមួយដេវីត ឬនៅ នឹងមានគម្រោងរៀបការដែរទេ ?ស្រីនិច្ច និយាយមិនច្បាស់លាស់ឡើយពីរឿងចូលរោងការនេះដោយនាងថាអត់អាចកំណត់បាន។យ៉ាងណាសម្រាប់លោកដេវីត វិញពេលនេះលោកថាមានមោទនភាពដែលបានក្លាយទៅជាប្ដីបូព្រឹក្ស បញ្ជាក់ថាលោកហ៊ានធ្វើអ្វីៗគ្រប់បែបយ៉ាងទាំងអស់ដើម្បីគូស្នេហ៍ ក្នុងនោះរួមទាំងការចូលរោងការផងដែរ ប្រសិនបើស្រីនិច្ច ចង់គ្រងឈុតកូនក្រមុំមែនទែន ។
ចំពោះការវិលមកឆាកតន្រ្ដីវិញរយៈពេល៤ខែរបស់ទេព បូព្រឹក្ស នាពេលនេះគេឃើញនាងព្យាយាមសម្រកគីឡូថែមទៀត បើទោះជាទម្ងន់នាងសល់តែជាង៥០គ.ក្រ ក្ដី។ ស្រីនិច្ច ដែលមានគេសង្ស័យថានាងមានកូន២នេះមិនបន្ធូដៃក្នុងការលេងក្បាច់រាំឡើយ ពោលគឺនៅតែរាំបែបកាចៗដូចមុនដដែល អត់ខ្លាចទាស់សសៃកូនខ្ចីទេ ក្រោមជំនួយពីគូស្នេហ៍នាងលោកដេវីត តាមរយៈការបង្ហាញមុខរួមគ្នាច្រើនឆាកតន្រ្ដី ប៉ុន្ដែគេនៅមិនទាន់អាចសន្និដ្ឋានបានថាតើស្រីនិច្ច នៅតែមានទីផ្សារសិល្បៈដូចកាលនៅមិនទាន់មានកូនឬយ៉ាងណាឡើយ ព្រោះតែការចេញបទចម្រៀងរបស់នាងមិនទាន់បានដិតដល់លើទីផ្សារឡើយ បើទោះជាដេវីត ជាអ្នកធ្វើភ្លេង និងនិពន្ធទំនុកច្រៀងឲ្យនាងក្ដី ។អ្នកជំនាញសិល្បៈបានលើកឡើងថាអំឡុងពេលដែលបូព្រឹក្ស ផ្អាកច្រៀងរាំក្រោយសម្រាលកូននេះតារាដែលលេងក្បាច់រាំសាហាវជំនួសនាងនៅហង្សមាសគឺមានតែនាងយូរី តែម្នាក់ប៉ុណ្ណោះ ហេតុនេះបើស្រីនិច្ច មានគូស្នេហ៍ជាជំនួយនៅក្រោយខ្នងបែបនេះមិនយូទេ នាងអាចនឹងអុកឡុកទីផ្សារចម្រៀងបានម្ដងទៀតជាមិនខាន ប្រសិនបើបូព្រឹក្ស មានអ្វីថ្មីមកបញ្ចេញហើយបន្ដចាប់ដៃគូស្នេហ៍ឡើងឆាករួមគ្នា ។
ក្រៅពីទេព បូព្រឹក្ស តារាដែលយកកូនមុនរៀបការមានដូចជាអ្នកនាងយុគ ចិន្ដា ,ខាត់ សុឃីម ,សុន ស្រីពេជ្រ,ផាត់ ផាន់ណា ,ពេជ្រ សូលីកា ,នៅ សុនិតា ,កែវ ពេជ្រពិសី និងឌុច លីដា ជាដើម។គេចាំមើលថាបូព្រឹក្ស នឹងសម្រេចចិត្តយកកូនថែមទៀតឬមួយចង់គ្រងឈុតកូនក្រមុំពិតដូចក្នុងនៅថ្ងៃខួបគម្រប់អាយុ៣០ឆ្នាំ ធ្វើឲ្យនាងប្ដូរចិត្តហ៊ានដឹកដៃដេវីត ចូលរោងការសិន ទើបយកកូនទី៣ ?
