ភ្នំពេញ៖តារាចម្រៀងហង្សមាសស្រីស្អាតកែវ សុបញ្ញា នឹងរៀបការនៅថ្ងៃទី១៣ ខែមករា ឆ្នាំ២០២៤ នេះហើយដែលពិធីជប់លៀងធំរៀបចំនៅហាងទន្លេបាសាក់២ សង្កាត់ទន្លេបាសាក់ ខណ្ឌចំការមន ក្រុងភ្នំពេញ។សុបញ្ញា ថានេះជាគម្រោងច្បាស់លាស់ដែលបានត្រៀមរួចជាស្រេចហើយក្រោយរៀបការ នាងនឹងគ្រោងយកកូនភ្លាមៗតែម្ដង មិនខ្លាចប៉ៈពាល់ដល់អាជីពចម្រៀងឡើយ ។
កែវ សុបញ្ញា បានប្រាប់តាមទូរស័ព្ទនៅព្រឹកថ្ងៃទី១ មករា ថាមង្គលការរបស់នាងជប់លៀង៥០តុ(៥០០នាក់) នឹងបានត្រៀម១០តុថែមទៀត ហើយក្នុងនោះភ្ញៀវខាងនាងអញ្ជើញអ្នកសិល្បៈរួមអាជីពខ្ទង់៧០% ។នាងថាដោយសារតែគិតថាទំនាក់ទំនងរវាងនាងនិងគូដណ្ដឹងបានស្វែងយល់ចិត្តគ្នាជាច្រើនឆ្នាំមកហើយ ហេតុនេះនៅដើមឆ្នាំ២០២៤ ជាវេលាសមស្របមួយមកដល់ ដែលត្រូវរៀបការហើយទើបមិនអាចបង្អង់ឬពន្យាពេលតទៅទៀតបានឡើយ។ដោយឡែកទាក់ទងរឿងគម្រោងយកកូនវិញសុបញ្ញា ថាបើទោះជាពេលនេះនាងមិនទាន់កំណត់ពីទីតាំងទៅដើរកម្សាន្ដ(Honey Moon)មែន ប៉ុន្ដែក្រោយរៀបការរួចនាងនឹងស្វាមីទៅជួបគ្រូពេទ្យជំនាញដើម្បីពិភាក្សាពីការយកកូន ពោលគឺចង់បានកូនឆាប់ៗ អត់ជ្រើសវិធីពន្យាទេ ។
ឆ្លើយតបសំណួរថាក្រោយរៀបការប្ដីរួចកែវ សុបញ្ញា នៅតែបន្ដអាជីពចម្រៀងជាធម្មតា ឬត្រូវកាត់បន្ថយហើយងាកទៅរកស៊ីថែមទៀតនោះស្រីស្រស់ថាទាំងអាជីពសិល្បៈ និងការធ្វើជំនួញនាងជ្រើសរើសឲ្យដើរស្មើគ្នា(៥០=៥០) ដែលការវាចាបែបនេះដូចការអះអាងរបស់លោកព្រាប សុវត្ថិ ដែរដែលថាលោកចាប់អាជីពចម្រៀងនិងធ្វើជំនួញទន្ទឹមគ្នា ។
សូមបញ្ជាក់ថាមង្គលការរបស់កែវ សុបញ្ញា នៅដើមឆ្នាំ២០២៤ នេះក៍ធ្វើឡើងទៅតាមក្បួនហុងស៊ុយផងដែរ ដែលគ្រូចិនសែបានប្រាប់នាងថាអាចរៀបការបាននៅចុងឆ្នាំ២០២៣ ឬដើមឆ្នាំ២០២៤ ហើយទីបំផុតនាងជ្រើសដើមឆ្នាំ២០២៤ វិញ។អតីតបេក្ខភាពThe Voice Cambodia រដូវកាលទី១ រូបនេះនាងបានបើកហាងCs Beer នៅក្រុងតាខ្មៅ និងរកស៊ីលក់ផលិតផលតាមOnline ផងដែរ។សុបញ្ញា បានភ្ជាប់ពាក្យជាមួយលោកប៉ាល់ ប៉ោស៊ាង ជាមន្រ្ដីកងរាជអាវុធហត្ថ កាលពីថ្ងៃទី១០ខែកក្កដា ឆ្នាំ២០២១ ក្រោយលោកប៉ោស៊ាង បានព្យាយាមតាមសុំស្រលាញ់នាងអស់រយៈពេល១៥ឆ្នាំ ។ស្រីស្អាតរូបនេះមានជម្រើសស្នេហ៍ច្រើនព្រោះមានបុរសទាំងក្នុងនិងក្រៅសិល្បៈរួមទាំងអាណិកជនខ្មែរនៅបរទេសមិនតិចនាក់ទេ តាមចែចង់ តែទីបំផុតនាងសុខចិត្តជ្រើសបុរសម្នាក់ដែលបង្ហាញពីក្ដីស្រលាញ់លើនាងអស់១ទសវត្សន៍កន្លះគ្មានការប្រែប្រួលចិត្តនោះគឺជាមន្រ្ដីយោធាម្នាក់។ប្រភពបានឲ្យដឹងថាអនាគតស្វាមីកែវ សុបញ្ញា នៅតែអនុញ្ញាត្តិឲ្យនាងលេងសិល្បៈតទៅទៀតតាមចិត្តចង់របស់នាង តែសុបញ្ញា ចង់ពង្រឹងអាជីវកម្មខាងក្រៅបន្ថែមទៀតក្រោយមានស្វាមី។
កែវ សុបញ្ញា ក្រៅពីជាតារាចម្រៀងផ្នែកយុវវ័យម្នាក់របស់ហង្សមាសនាងក៍បានថតភាពយន្ដជាច្រើនរឿងមកហើយនៅផលិតកម្មនេះ។ស្រីស្អាតរូបនេះមានទំនាក់ទំនងល្អទាំងក្នុងនិងក្រៅសិល្បៈហើយនាងតែងតែគោរពរៀមច្បង ហេតុនេះហើយបានជាមានគេចូលចិត្តនាងច្រើនព្រោះនាងមិនដែលលេចឭថាមានទំនាស់ជាមួយតារាណាម្នាក់ឡើយ។ក្រៅពីសុបញ្ញា តារាដែលត្រៀមរៀបការប្ដីនៅឆ្នាំ២០២៤ មានដូចជាពេជ្រ សោភា ,ប៉ាច គីមមមួយ ,ម៉ង់ ចាន់កញ្ញា ,ម៉ានីកា និងអ៊ីវ៉ា ជាដើម ។
ទស្សនិកជនចាំមើលថាតើកែវ សុបញ្ញា នឹងរយាលពីអាជីពចម្រៀងក្រោយមានស្វាមី ដើម្បីសម្រេចបំណងយកកូនឲ្យបានឆាប់ៗ ឬមួយក៍នាងធ្វើដូចឱក សុគន្ធកញ្ញា និងសួស វីសា ដែលច្រៀងផង យកកូនផង ?