ភ្នំពេញ៖មាស សុខសោភា បានប្រារពខួបអាពាហ៍ ពិពាហ៍ គម្រប់១៤ឆ្នាំ កាលពីថ្ងៃទី២៨ ខែធ្នូ ឆ្នាំ២០២៣ តែមិនបានបង្ហាញសារសរសើរប្ដីពេញៗមាត់ដូចមុនឡើយ គ្រាន់តែទម្លាយសារបែចាក់ដោតដោយបញ្ជាក់ថាពេលនេះនាងកំពុងតែទទួលបានក្ដីស្រលាញ់ដ៍ពិតប្រាកដ ដែលវាប្រៀបបានជាឱសថទិព្វសម្រាប់ជីវិតនាង។សុខសោភា ថ្លែងសារនៅថ្ងៃខួបស្នេហ៍មានអាយុ១៤ឆ្នាំនេះថា”ស្នាមញញឹមនិងក្ដីស្រលាញ់ដែលយើងបានផ្ដល់ឲ្យគ្នាទៅវិញទៅមក ដោយមិនមានការទាមទារ ការតបស្នងត្រឡប់មកវិញ ពីអ្នកណាម្នាក់នោះ ក្តីស្រលាញ់ពិតនេះហើយ គឺជាឱសថទិព្វចូលទៅកំចាត់ទុក្ខសោកទាំងឡាយនោះហើយ”។ចំណែកស្វាមីនាងលោកអ៊ឹត រ៉ាដា មិនបានឆ្លើយតបទៅភរិយាលោកវិញនោះទេ គ្រាន់តែលោកបានចែកចាយ(Share)នូវរូបអាពាហ៍ ពិពាហ៍ របស់លោកកាលពីឆ្នាំ២០០៩ ជាមួយសោភា ដែលFan បានជូនពរនាងនៅថ្ងៃពិសេសនេះប៉ុណ្ណោះ ។
គូររំលឹកថាមាស សុខសោភា បានរៀបការតាមបែបប្រពៃណីខ្មែរ ជាមួយលោកអ៊ឹត រ៉ាដា កាលពីថ្ងៃទី២៨ ខែធ្នូ ឆ្នាំ២០០៩ តែពិធីនោះធ្វើដោយលាកលៀម ស្រដៀងគ្នាទៅនិងសែនព្រេនដែរនិងមានតែតារា២ដួងចូលរួមគឺលោកឆន សុវណ្ណារាជ និងញឹម ចាន់ថន ឡើងសែនកួចដៃពួកគេ ។វាជាការរៀបការជាលើកទី២របស់សុខសោភា បន្ទាប់ពីនាងបានរៀបការលើកទី១កាលពីឆ្នាំ២០០៨ តាមបែបសាសនាគ្រឹស្ទ នៅកាណាដា ដោយនាងនិងប្ដីគ្រាន់តែបំពាក់ជញ្ជៀនឲ្យគ្នាទៅវិញទៅមក ។ដោយសារតែមានការិះគន់ច្រើនថាសោភា ល្បីប៉ុណ្ណឹងដែរ មិនគូរណារៀបការបែបលួចលាក់ដល់ទៅ២ដងនោះទើបកាលពីឆ្នាំ២០២១ មានដំណឹងថាអតីតតារារាម រូបនេះចង់ប្រថុយរៀបការជាសាធារណៈវិញម្ដង តែរឿងនេះត្រូវបានលុបចោលទៅវិញ ដោយសារពេលនោះកូវីដ មិនទាន់ស្ងាត់។តែនៅឆ្នាំ២០២៣ ដែលតារាចាប់ផ្ដើមរៀបការបន្ដកន្ទុយគ្នានោះសុខសោភា បែជាស្ងាត់ដំណឹងរៀបការនេះឈឹងទៅវិញ។យ៉ាងណាតារារួមអាជីពនិងអ្នកគាំទ្រសុខសោភា បានលើកឡើងថាទោះជាអ្នកចម្រៀងសំនៀងផ្អែមរូបនេះមិនដែលហ៊ានរៀបការជាចំហដូចគេក្ដី ប៉ុន្ដែចំណងស្នេហានាងនៅតែរឹងមាំជាងគូស្នេហ៍ខ្លះទៀតដែលរៀបការផ្អើលមេឃតែមិនអាចរក្សារចំណងស្នេហាបាន។
មាស សុខសោភា បានភ្ជាប់ស្នេហ៍ជាមួយលោកអ៊ឹត រ៉ាដា កាលពីឆ្នាំ២០០៧ ហើយទោះជាមិនដែលឃើញពពោះម្ដងណាក្ដី តែសោភា ថានាងមានកូនប្រុសម្នាក់ពេញវ័យកំលោះទៅហើយនោះគឺយុវវនឈ្មោះBovee Hundly ។បើទោះជាអ្នកស្និតសោភា និងបុរសនោះចេញមុខអះអាងថាក្មេងនោះជាក្មួយរបស់នាងយ៉ាងណាក៍ដោយ តែសោភា នៅតែមានៈថាជាកូនរបស់នាងដដែល។ប៉ុន្ដែនៅពេលតារារួមអាជីព និងFan សួរថាតើនាងពពោះឆ្នាំណា និងសម្រាលកូននៅទីណា នោះសោភា មិនដែលឆ្លើយតបឡើយ ។ដោយឡែករយៈពេលជាង១០ឆ្នាំមកនេះឲ្យតែដល់ថ្ងៃខួបអាពាហ៍ ពិពាហ៍សោភា តែងតែចេញសរសើរនិងលើកពីគុណសម្បត្តិត្តិប្ដីប្រាប់ទៅមហាជនថាលោករ៉ាដា ជាមនុស្សម្នាក់ដែលហ៊ានលះបង់គ្រប់បែបយ៉ាងទាំងអស់ដើម្បីនាង។មិនត្រឹមតែអួតពីប្ដីថាជាបុរសគ្រប់១០ប៉ុណ្ណោះទេ តែសោភា ថែមទាំងចេញបទចម្រៀង២បទមកហើយលើកពីស្វាមីសំណព្វចិត្តរបស់នាងគឺបទ”ឧត្តមស្វាមី “និងបទ”អរគុណលោកប្ដី”ដែលបទទី២នេះនាងថែមទាំងបានដឹកដៃស្វាមីថតMV ជាមួយគ្នាទៀតផង ។
សូមបញ្ជាក់ថាមាស សុខសោភា បានធ្វើជាតារាចម្រៀងឯករាជ្យដោយមិនទៅច្រៀងនៅផលិតកម្មណារយៈពេល១ឆ្នាំគត់ ក្រោយនាងចាកចេញពីរាម ហើយពេលនេះគ្មានដំណឹងនាងទៅជ្រកនៅផលិតកម្មថ្មីមួយណាទេ បើទោះជាថោន,Galaxy និងហង្សមាស បន្ដចង់បាននាងក្ដី ។រយៈពេល១២ខែដែលសុខសោភា ច្រៀងនៅផលិតផលិតកម្មខ្លួនឯងCamtrax Music នេះនាងនៅរក្សារបានលំនឹងទីផ្សារចម្រៀងតាមរយៈការបង្ហាញកាលវិភាគ(Schedule)ច្រៀងក្នុង១ខែធ្នូ ដល់ទៅ៩កម្មវិធីផ្សេងគ្នាដែលមានន័យថាបើនាងច្រៀង១កម្មវិធីស៊ីថ្លៃ៣ពាន់ដុល្លារ នោះសោភា រកត្រឹមតែ១ខែនោះbanជិត៣ម៉ឺនដុល្លារទៅហើយ ។ដោយសារតែនៅកាក់កបបែបនេះហើយទើបគ្មានដំណឹងសុខសោភា មានគម្រោងចង់ទៅរស់នៅប្រទេសកាណាដាតាមប្ដីដូចកាលពីឆ្នាំ២០១១ ទេ ហើយពេលនេះនាងនៅតែឈក្នុងលំដាប់តារាចម្រៀងស្រីជូរមុខតទៅទៀត ព្រោះគូប្រជែងដ៍ស្វិតស្វាញរបស់នាងជាង១០ឆ្នាំមកហើយគឺឱក សុគន្ធកញ្ញា ក៍គ្មានបទផ្ទុះនឹងជាប់ដៃត្រៀមសម្រាលកូនទី២ ។
មហាជនចាំមើលថាតើមាស សុខសោភា នឹងលេចមុខទៅផលិតកម្មណានៅឆ្នាំ២០២៤ ឬមួយបន្ដច្រៀងផលិតកម្មខ្លួនឯងរហូត ?
