ភ្នំពេញ៖ដូចការសង្ស័យមែនទីបំផុតអ្នកនាងលី ម៉ារីណា ពិតជាត្រូវចូលរោងការនៅថ្ងៃទី១២ ខែមករា ឆ្នាំ២០២៤ ខាងមុខនេះមែន ជាមួយលោកទៀង ច័ន្ទសារ អធិការនគរបាលខណ្ឌដូនពេញដែលពិធីជប់លៀងធំរៀបចំនៅមជ្ឈមណ្ឌុលសន្និបាត និងពិព័រណ័អន្ដរជាតិ ជ្រោយចង្វារ(CCIC) អាគារC ។អ្នកនាងម៉ារីណា មមាញឹកខ្លាំងក្នុងការដើរចែកធៀបការនៅដើមខែមករា នេះហើយនាងបានត្រៀមខ្លួនរួចរាល់ហើយសម្រាប់ថ្ងៃពិសេសរបស់នាងដែលនៅបាំងតែ៣ថ្ងៃទៀតប៉ុណ្ណោះ។
ប្រភពបានឲ្យដឹងថាអ្នកនាងលី ម៉ារីណា បានហៅភ្ញៀវភាគច្រើនជាតារារួមអាជីព ខណៈដែលអនាគតស្វាមីនាងបានហៅភ្ញៀវច្រើនជាមន្រ្ដី ប៉ូលីស និងនគរបាលជាដើម។មង្គលការរបស់ម៉ារីណា នឹងរៀបចំយ៉ាងធំដុំមិនចាញ់តារាល្បីៗដ៍ទៃទៀតឡើយ ខណៈដែលមិនទាន់ក្លាយទៅជាភរិយាស្របច្បាប់របស់លោកច័ន្ទសារ ផងពេលនេះនាងត្រូវបានតារារួមអាជីពខ្លះហៅថាជា”ជំទាវ”បណ្ដើរៗទៅហើយ ។
អ្នកយកព័តមានយើងមិនអាចទាក់ទងទៅលី ម៉ារីណា បានទេកាលពីរសៀលថ្ងៃទី៨ មករា ព្រោះទូរស័ព្ទតេមិនចូល ។យ៉ាងណាក្រោយបែកធ្លាយរឿងស្នេហាជាចំហជាមួយលោកទៀង ចន័្ទសារ ជិត២ឆ្នាំមកនេះអ្នកនាងម៉ារីណា មិនដែលនិយាយរឿងស្នេហានាងជាមួយលោកអធិការខណ្ឌដូនពេញម្ដងឡើយ គឺមានតែបង្ហាញភាពផ្អែមល្ហែមស្នេហ៍ជាសាធារណៈដូចគូស្នេហ៍យុវវ័យ។ចំណែកតារាដែលស្និតម៉ារីណា ពួកគបានប្រាប់អ្នកយកព័តមានយើងថាបានទទួលសំបុត្រការពីនាងជិត១អាទិត្យទៅហើយ និងថាតារាកូន១រូបនេះបង្ហាញទឹកមុខស្រស់ថ្លាខ្លាំងមុនដល់ថ្ងៃពិសេសរបស់ខ្លួន។ពួកគេបានសរសើរម៉ារីណា ដែរថាចេះរកបានគូស្នេហ៍ថ្មីសាកសមគ្នាពោលគឺមាឌមាំ និងខ្ពស់ស្រឡះដូចគ្នាតែម្ដង។
គូររំលឹកថាអ្នកនាងលី ម៉ារីណា បានរៀបការចំនួន២លើកមកហើយគឺលើកទី១ជាមួយលោកទឹត្យ ថាវរិទ្ធ តែបានលែងលះគ្នាយ៉ាងលឿនក្រោយការរួចមិនបាន១ខែផង ។មង្គលការលើកទី២របស់ម៉ារីណា នៅថ្ងៃទី២៧ខែឧសភា ឆ្នាំ២០១៣ ជាមួយលោកសាត ចាន់ថន អាណិកជនខ្មែរមកពីអាមេរិក រក្សាបានរយៈពេល១០ឆ្នាំក៍ចែកផ្លូវគ្នាកាលពីខែកុម្ភៈឆ្នាំ២០២២ ដោយបន្សល់កូនប្រុស១អាយុជិត១០ឆ្នាំ ។អ្វីដែលគូរកត់សម្គាល់ទោះជាម៉ារីណា បានជួបរឿងស្នេហាបរាជ័យស្ទួនៗក្ដី ប៉ុន្ដែបុរសដែលស្រលាញ់នាងច្បាស់លាស់ដាច់ខាតត្រូវតែចូលរោងការ ក្រាបក្បាលដល់កន្ទេសលទើបនាងព្រមទទួលធ្វើជាស្វាមី ។
តារារួមអាជីពបានសម្ដែងការសាទរចំពោះអ្នកនាងលី ម៉ារីណា ដែលរកបានម្ចាស់បេះដូងថ្មីនាពេលនេះហើយពួកគេសង្ឃឹមថាចំណងស្នេហាមួយនេះនឹងរក្សារបានភាពយូអង្វែងជាមិនខាន ព្រោះមុនដឹកដៃគ្នាចូលរោងការនេះម៉ារីណា និងលោកច័ន្ទសារ ចុះសម្រុងគ្នាល្អខ្លាំងពោលគឺបង្ហាញក្ដីស្រលាញ់ចំពោះគ្នាជាចំហតែម្ដង រយៈពេលជិត២ឆ្នាំ ហើយលោកអធិការក៍បានរៀបចំខួបកំណើតឲ្យម៉ារីណា ដល់ទៅ២លើកមុនដឹកដៃគ្នាចូលរោងការគឺគម្រប់អាយុ៤២ និង៤៣ឆ្នាំ ដែលនាំឲ្យម៉ារីណា មានភាពកក់ក្ដៅក្នុងចិត្តជាខ្លាំង។ប្រភពបានបង្ហើបឲ្យដឹងថាម៉ារីណា ពេញចិត្តម្ចាស់ស្នេហ៍ថ្មីដោយសារតែលោកច័ន្ទសារ មិនត្រឹមតែស្រលាញ់និងយកចិត្តទុកដាក់លើនាងខ្លាំងទេ ប៉ុន្ដែលោកអធិការក៍ស្រលាញ់ក្រុមគ្រួសារនិងកូនប្រុសនាងដូចជាកូនបង្កើតផងដែរ ។ព័តមានបានឲ្យដឹងថាលោកអធិការក៍ធ្លាប់ប៉ះរឿងស្នេហាមិនសមប្រកបជាមួយតារាជើងចាស់ម្នាក់ដែរមុនមកផ្សារភ្ជាប់ស្នេហាម៉ារីណា នាពេលនេះ។
ក្រៅពីលី ម៉ារីណា តារាដែលត្រៀមរៀបការនៅឆ្នាំ២០២៤ នេះមានដូចជាសុវត្ថិឌី ធារិកា ,កែវ សុបញ្ញា ,ពេជ្រ សោភា និងប៉ាច គីមមួយ ជាដើម ។ម៉ារីណា ធ្លាប់បានប្រាប់អ្នកយកព័តមានយើងថានាងមានជម្រើសស្នេហ៍ច្រើនទាំងក្នុងនិងក្រៅស្រុក ប៉ុន្ដែម្ដងនេះនាងជ្រើសយកស្នេហ៍”ជួញជិត ប្រសើរជាងជួញឆ្ងាយ” វិញម្ដងពោលគឺផាត់ចោលសំណើរអាណិកជនបរទេសដែលការគិតរបស់នាងនេះដូចគ្នាទៅនិងពេជ្រ សោភា ដែរ។នាងថាទទួលថតភាពយន្ដក្នុង១ឆ្នាំតែ១រឿងប៉ុណ្ណោះ ដើម្បីទុកពេលរកស៊ី ខណៈដែលប្រភពខ្លះថានាងនឹងកាត់បន្ថយស្ទើទាំងស្រុងពីការសម្ដែងក្រោយរៀបការរួច ព្រោះស្វាមីនាងជាមន្រ្ដីធំចង់ឲ្យនាងងាកទៅធ្វើជំនួញបន្ថែម ស្របពេលបច្ចុប្បន្នម៉ារីណា មានហាងនំបញ្ចុក និងលក់សម្លៀកបំពាក់តាមOnline ៕