ភ្នំពេញ ៖ ចេញពីផឹកស៊ីស្រវឹងនៅបៀរហ្គាឌិននាំស្រ្តីម្នាក់ និងមិត្តភក្កិ២នាក់ទៀតគោល បំណងទៅ ច្រៀងខារ៉ាអូខេបើករថយន្តលឿនដូចហោះវ៉ារថយន្តមួយគ្រឿងជ្រុលទៅបុក ពីក្រោយ ម៉ូតូមួយគ្រឿងពេញទំហឹងផ្លោងទៅបោកនឹងដើមអង្កាញ់ធ្លាយខួរស្លាប់ ចំណែករថយន្តបង្ក ក្រឡាប់នៅមុខផ្ទះប្រជាពលរដ្ឋបណ្តាលឲ្យអ្នកជិះក្នុងរថយន្តរងរបួស ធ្ងន់ម្នាក់ ហេតុការណ៍នេះបានកើតឡើងកាលពីវេលាម៉ោង១០យប់ថ្ងៃទី ៣០ ខែមករា ឆ្នាំ២០១៧ ត្រង់ចំនុចមុខវិទ្យាល័យ ជា ស៊ីមសាមគ្គី ស្ថិតតាមបណ្ដោយផ្លូវ២៧១ សង្កាត់ស្ទឹងមានជ័យ ខណ្ឌមានជ័យ ។
សាក្សីនៅកន្លែងកើតហេតុបាន ឱ្យដឹងថាមុនពេលកើតហេតុ គេឃើញរថយន្តបង្កមួយគ្រឿងម៉ាកកូរ៉ូឡាពណ៌សំបកឪឡឹក ពាក់ស្លាកលេខ ភ្នំពេញ2H 1637 បើកបរដោយម្ចាស់មានឈ្មោះ សុខ វីវ៉ា ភេទប្រុស អាយុ២៩ឆ្នាំ មុខរបរអ្នកលក់ទូរសព្ទ័នៅផ្សារឃ្លាំងរំសេវ ស្នាក់នៅក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ រួមដំណើរជាមួយមត្តភក្ដិប្រុស២នាក់ និងនារីម្នាក់ទៀត បើកតាមផ្លូវ២៧១ ទិសដៅពីជើងទៅត្បូងក្នុងល្បឿនលឿនដូចហោះ លុះមកដល់ចំនុចកើតហេតុជាផ្លូវកោង រថយន្តបង្កបានបើកវ៉ាខាងស្ដាំរថយន្តការីមបាឡែន មួយគ្រឿង ដែលជិះនៅពីខាងមុខធ្វើឲ្យ រថយន្តបង្កជ្រុលទៅបុកម៉ូតូរងគ្រោះមួយគ្រឿង ម៉ាកវីវ៉ា ពណ៌ខ្មៅ ពាក់ស្លាកលេខ រាជការ 1956 បើកបរដោយបុរសម្នាក់ក្នុងទិសដៅស្របទិសគ្នា ត្រូវបានរថយន្តបង្កបុក ពីក្រោយយ៉ាងពេញទំហឹង បណ្ដាលអោយជនរងគ្រោះជាអ្នកបើកម៉ូតូហោះផ្លោងប្រមាណជា១០ម៉ែត្រទៅបោកនឹងដើមឈើអង្កាញ់ បែកក្បាលខ្ទេចធ្លាយខួរ និងដាច់ប្រអប់ជើង គួរឱ្យរន្ធត់ស្លាប់ភ្លាមៗចំណែករថយន្តបង្កបានក្រឡាប់ផ្លោងទៅបោកនឹងដើមអង្កាញ់ មួយដើមទៀតបាក់មួយដើម ទើបរថយន្តក្រឡាប់ផ្ងារឡើងទៅលើខឿនមុខផ្ទះធ្វើឲ្យរថយន្តក្រឡាប់ប៉ះជើងទ្រមេឃមុខបាក់រានទេវតានៅមុខផ្ទះនិងសង្កត់លើបង្គោលខ្សែភ្លើង ដែកមួយដើមដាំនៅមុខផ្ទះធ្វើឲ្យបុរសម្នាក់ដែលអង្គុយនៅខាងមុខជិតតៃកុងរបួសបាក់ដៃ រងរបួសធ្ងន់ ចំណែកអ្នកបើករថយន្តបង្កនិងអ្នករួមដំណើរជាមួយ២នាក់ទៀតរង របួសស្រាល អ្នកដែលរងរបួសធ្ងន់ត្រូវរថយន្តសង្គ្រោះដឹកយកទៅព្យាបាលនៅគ្លីនិក ហុង ហាក់ ចំនែកស្រ្តីម្នាក់ដែលរួមដំណើរជាមួយកន្លែងកើតហេតុនោះទេ រីឯម៉ូតូខូចខាត ទាំងស្រុង ។
បើតាមការបញ្ជាក់ពីអ្នកបើករថយន្តបង្ក បានអោយដឹងថា មុនពេលកើតហេតុរូបគេនិងមិត្ត
ភក្ដិពីរនាក់ទៀត បាននាំគ្នាទៅផឹកស៊ីនៅក្នុងហាងបៀរហ្គាឌិនមួយកន្លែងនៅម្ដុំអូបែកក្អម ស្រវឹង ហើយបាននាំគ្នាទៅច្រៀងខារ៉ាអូខេបន្តទៀត នៅម្ដុំស្ពានអាកាសស្ទឹងមានជ័យ ដោយ បានហៅស្រ្តីជាបុគ្គលិកម្នាក់នៅបៀរហ្គាឌិនទៅជាមួយដែរ ខណៈពេលកំពុងតែបើកបរមកដល់ចំនុចកើតហេតុរូបគាត់បានបើកវ៉ាស្ដាំរថយន្តមួយគ្រឿងនៅពីមុខក្នុងល្បឿនលឿន ស្រាប់តែមានម៉ូតូខាងលើបានជិះឆ្លងផ្លូវបញ្ច្រាសទិសមកពីត្បូងមកវិញបណ្ដាលអោយរថយន្តខាងលើដែលកំពុងបើកវ៉ាគ្នាក្នុងល្បឿនលឿននោះ ជ្រុលទៅបុកម៉ូតូខាងលើពេញទំហឹង លាន់ដូចរន្ទះបណ្ដាលឱ្យជនរងគ្រោះបើងដូចសំឡីខ្ទាតទៅបោក និងដើមអង្កាញ់បែកក្បាលស្លាប់ភ្លាមនៅនិងកន្លែងកើតហេតុ
សពជនរងគ្រោះខាងលើមានឈ្មោះ គឹម ម៉ារិន ភេទប្រុស អាយុ៦៣ឆ្នាំ ស្នាក់នៅសង្កាត់ស្ទឹង-មានជ័យ ខណ្ឌមានជ័យ។
ក្រោយពេលកើតហេតុសមត្ថកិច្ច បានចុះមកធ្វើការវាស់វែង និងអូសរថយន្តនិងម៉ូតូព្រមទាំងនាំខ្លួនម្ចាស់រថយន្តយកទៅឃុំខ្លួននៅការិយាល័យចរាចរណ៍ជើងគោករាជធានី រង់ចាំការចាត់ការទៅតាមនីតិវិធី។ ចំនែកឯសពវិញ ត្រូវបានសមត្ថកិច្ចធ្វើឯកសារប្រគល់អោយសាច់ញាតិយកទៅតំកល់ទុកនៅវត្តញាណរង្សីរងចាំសាច់ញាតិធ្វើបុណ្យតាមប្រពៃណី ៕ សោល វណ្ណៈ