ភ្នំពេញ៖តារាចម្រៀងសុគន្ធ និសា បានទទួលស្គាល់នៅចំពោះមុខអ្នកសារព័តមានកាលពីពេលថ្មីៗនេះថានាងពិតជាមានការព្រួយបារម្ភចំពោះភាពស្ងប់ស្ងាត់នារយៈពេលចុងក្រោយនេះមែន ពោលគឺមិនមានបទចម្រៀងដិតដល់លើទីផ្សារជាហេតុធ្វើឲ្យនាងមិនអាចប្រជែងចម្រៀងជាមួយតារាល្បីៗផ្សេងទៀតបានឡើយ ។ប៉ុន្ដែនិសា ថារូបភាពបែបនេះមិនមែនតែរូបនាងម្នាក់នោះទេ ប៉ុន្ដែតារាសឹងតែទាំងអស់គ្នានៅហង្សមាសក៍ជួបរឿងដូចនាងដែរ ហើយបញ្ហាមកពីម្នាក់ៗមិនផ្ដោតលើអាជីពចម្រៀងតែមួយច្រកនោះទេ ព្រោះជាប់របរកស៊ីខាងក្រៅសិល្បៈពិសេសការលក់អ៊ឺវ៉ាន់តាមOnline សឹងគ្រប់គ្នា។និសា ថាសម្រាប់រូបនាងក្រៅពីលក់ កាហ្វេ,គុយទាវខ្ចប់, ជ្រក់ជើងមាន់និងចេកឆឹង ជាដើមនោះនាងក៍មានភាគហ៊ុននៅគ្លីនិកThe K Clinic ផងដែរ ប៉ុន្ដែមិនបញ្ជាក់ថាបានបោះទុនអស់ទឹកប្រាក់ប៉ុន្មានក្នុងអាជីវកម្មផ្នែករក្សារសម្រស់មួយនេះឡើយ។
តាមរយៈការលើកឡើងរបស់សុគន្ធ និសា ច្បាស់ណាស់ថានាងនៅតែបន្ដដើរលើផ្លូវច្រៀងផង រកស៊ីផង ប៉ុន្ដែហាក់ពិបាកពង្រឹងទីផ្សារចម្រៀងឲ្យស្ទុះឡើងវិញ ព្រោះបច្ចុប្បន្នហង្សមាសមានតារាកាន់តែច្រើន ហើយអ្នកនិពន្ធជើងខ្លាំងកាន់តែតិច ហេតុនេះបើនិសា នៅពឹងលើផលិតកម្មទម្លាក់បទចម្រៀងឲ្យទាំងស្រុងដែលជាការវិលជុំយូៗបានដល់បទនាងនោះ ច្បាស់ជាមិនអាចកែប្រែទីផ្សារចម្រៀងបានឡើយ ។តែតាមព័តមានថាផលិតកម្មរស្មីហង្សមាស បានបើកដៃឲ្យតារារបស់ខ្លួនទាំងអស់អាចផលិតបទចម្រៀងដោយខ្លួនឯងយកមកចេញនៅផលិតកម្មបានឲ្យតែបទនោះល្អ ហេតុនេះហើយដើម្បីប្រឆាំងការនៅទ្រឹង ឬស្ងប់ស្ងាត់មិនអាចទៅមុខរួចនោះនិសា ត្រូវតែហ៊ានចំណាយលុយធ្វើបទដោយខ្លួនឯង បន្ថែមពីលើផលិតកម្មទើបទៅរួច ។
សុគន្ធ និសា ក៍ដូចតារាចម្រៀងផ្សេងៗទៀតដែរ ពោលគឺទីផ្សារចម្រៀងមានការប្រែប្រួលក្រោយនាងមានស្វាមីជាង៦ឆ្នាំ មកនេះ បើទោះជានាងនៅរក្សារបាននូវរូបសម្រស់មិនធ្លាក់ចុះ អត់ឡើងគីឡូជ្រុល ឬមិនសូវបែកសាច់ក្ដី ។តែយ៉ាងណានិសា នៅតែមានឱកាសចេញច្រៀងសម្ដែងតាម Concerts ធំៗ និងតាមបណ្ដារកម្មវិធីជប់លៀងមង្គលការ រួមទាំងស្ពតពាណិជ្ជកម្មជាហូហែទើបធ្វើឲ្យប្រាក់ចំណូលនាងនៅតែស្ថិតក្នុងលំដាប់តារាជូរមុខនាពេលបច្ចុប្បន្ន ។
លោកសុខ សុគន្ធ ហៅជេម សុខ អ្នកតាមដានសង្គម បានលើកឡើងតាមបណ្ដាញសង្គមកាលពីពេលថ្មីៗនេះថាតារាដែលមានប្ដីនិងកូនហើយគូរតែរកចំណតឡានក្រុង បានន័យថាងាកទៅធ្វើអាជីវកម្មផ្សេងលើសពីសិល្បៈ ព្រោះការគាំទ្រមិនដូចមុនទេ ។ យ៉ាងណានិសា ដែលឈានចូលវ័យ៤០ឆ្នាំ នេះនាងនៅតែមានFan ច្រើន ហើយទោះជាហង្សមាសផលិតបទចម្រៀងឲ្យនាងមិនដិតដល់ទីផ្សារក្ដី ប៉ុន្ដែថៅកែផលិតកម្មធំនេះក៍បានផ្ដល់តំណែងធំឲ្យនាង២ផ្សេងគ្នាដើម្បីចងជើងកុំឲ្យនាងដើរចេញពីទ្រនុំនេះជាលើកទី២ នោះគឺធ្វើជាគណៈកម្មាការកម្មវិធី Cambodian Idol Junior រដូវកាលទី២ និងជាគ្រូបង្វឹគកម្មិវិធី The Voice Cambodia រដូវកាលទី៣ ហើយអាចនឹងកាន់តំណែងធំផ្សេងៗទៀតនៅហង្សមាសឆ្នាំ២០២៤ នេះ ដែលការចេញមុខកាន់តែច្រើនតាមបណ្ដារកម្មវិធីខាងលើនេះអាចជួយរក្សារលំនឹងនាងកុំឲ្យធ្លាក់ចុះបានមួយផ្នែកផងដែរ ទោះជាលែងសូវមានបទចម្រៀងបុកទីផ្សារទៀតក្ដី ។
សុគន្ធ និសា រៀបការជាមួយអាណិកជនខ្មែរមកពីរដ្ឋBoston សហរដ្ឋអាមេរិក លោកពៅ សម្បត្តិ កាលពីថ្ងៃទី១ ខែធ្នូ ឆ្នាំ២០១៧ ដែលចំណងស្នេហាជាង៦ឆ្នាំនេះនាងមិនទាន់ទទួលបានចំណងដៃកូន១គ្រាប់ឡើយ បើទោះជារៀបគម្រោងយកកូនចំនួន៣ឆ្នាំមកហើយគឺឆ្នាំ២០២១,២០២២ និង២០២៣ ក្ដី ។តែនៅឆ្នាំ២០២៤ នេះនិសា សង្ឃឹមអាចយកកូនង៉ាបានដូចក្ដីប្រាថ្នា ព្រោះក្រុមគ្រួសារទាំងសងខាងជម្រុញឲ្យនាងពពោះតាំងពីក្រោយនាងរៀបការប្ដីហើយភ្លាមៗម្លេះ ប៉ុន្ដែអ្នកសុគន្ធា ថាចង់យកកូនទៅតាមគោលការណ៍ ពោលគឺមិនចង់មានកូនដោយចៃដន្យនោះទេ ដែលរឿងនេះគេអាចសន្និដ្ឋានបានថានាងចង់ផ្ដល់កំណើតឲ្យកូនដំបូងកើតលើទឹកដីអាមេរិកភ្លាម បានសញ្ជាតិអាមេរិកភ្លែត ។ប៉ុន្ដែដោយសារតែនិសា នៅស្ដាយអាជីពចាស់ទើបពេលនេះនាងពន្យាពេលទៅរស់នៅអាមេរិក ហើយពន្យាទាំងពេលយកកូន រហូតដល់ពេលចង់បានមែនទែន អត់បានដូចចិត្តទៅវិញ ។ក្រៅពីសុគន្ធ និសា តារាដែលលែងសូវមានបទផ្ទុះនៅឆ្នាំ២០២៤ មានដូចជាឱក សុគន្ធកញ្ញា ,មាស សុខសោភា ,ពេជ្រ សោភា ,សួស វីសា និងសុខ ពិសី ជាដើម ៕