ភ្នំពេញ៖ពេជ្រ សោភា អាយុ៤១ឆ្នាំ ដែលមើលទៅហាក់ដូចជាវ័យរាងជ្រេបន្ដិចនោះ មិននឹកស្មានថានៅខែកុម្ភៈ ឆ្នាំ២០២៤ នាងនៅតែមានទីផ្សារចម្រៀងត្រូវប៉ាន់ជាងតារាស្រីផ្សេងៗទៀតក្នុងលំដាប់ជូរមុខ។សោភា បានបញ្ចេញកាលវិភាគ(Schedule )ដែល នាងត្រូវច្រៀងនៅខែកុម្ភៈ ឆ្នាំ២០២៤ ហើយភ្ញៀវបានកក់រួចមានដល់ទៅ១០កម្មវិធីផ្សេងគ្នាទូទាំងខេត្តក្រុង ដែលនេះបញ្ជាក់ថាអ្នកដឹកនាំការប្រគុំតន្រ្ដីធំៗនិងAgency មិនដែលមើលរំលងនាងឡើយ ។ប៉ុន្ដែសោភា មិនបានបូកលុយសរុបបង្ហាញថាទាំង១០Concerts ក្នុងខែ២ នេះនាងអាចរកប្រាក់ចំណូលបានប៉ុន្មាននោះទេ ។តែតារាហង្សមាសរូបនេះធ្លាប់ប្រាប់អ្នកយកព័តមានយើងថាការច្រៀងConcerts ឲ្យលោកស្រីទ្រី ដាណា កន្លងមកនាងស៊ីថ្លៃ១កម្មវិធី៥ពាន់ដុល្លារ ប៉ុន្ដែគេជឿរថាConcerts នៅខាងក្រៅពិសេសថៅកែរបស់នាងជាអ្នករៀបចំភាគច្រើននៅតាមខេត្តនោះគេជឿរថាតម្លៃខ្លួនសោភា នឹងមិនបានថ្លៃស្មើគ្នាគ្រប់កម្មវិធីដល់ម្លឹងទេ ។
អ្នករៀបចំការប្រគុំតន្រ្ដីម្នាក់ដែលហៅពេជ្រ សោភា ច្រៀងនៅខែ២ នេះដែរបានឲ្យដឹងថាសោភា កាន់តែមានគេដៅយកនាងច្រើននៅពេលដែលឱក សុគន្ធកញ្ញា ពោះធំនឹងសម្រាកជាច្រើនខែនេះ ហេតុនេះហើយ១ខែចេញច្រៀង១០កម្មវិធីមិនចម្លែកទេ ដោយសារតែនេះជាខែប្រាំង ឬរដូវផ្ការីក តែបើខែធ្លាក់ភ្លៀងតារាល្បីយ៉ាងណាក៍ទំនេរដូចគ្នាដែរ។បុរសដែលធ្លាប់ធ្វើការជាមួយសោភា ជាង១០ឆ្នាំមកនេះថាជាទូទៅតារាទាំងប្រុសទាំងស្រីលំដាប់Grade A រកបានចំណូលលើសពី៣ម៉ឺនដុល្លារក្នុង១ខែនៅរដូវអត់ភ្លៀងចាប់ពីខែ១១ ដល់ខែ៤ ជារៀងរាល់ឆ្នាំ។
ថ្វីត្បិតតែពេជ្រ សោភា នៅតែបង្ហាញសកម្មភាពសិល្បៈរបស់នាងមមាញឹកខ្លាំងនៅឆ្នាំ២០២៤ នេះក្ដី ប៉ុន្ដែគេកត់សម្គាល់ថានាងក៍មិនសូវមានបទល្បីល្បាញខ្លាំងដូចមុនដែរនារយៈពេលចុងក្រោយនេះ ពោលគឺច្រៀងតែបទល្បីចាស់ៗឡើងវិញដែលជូនកាលកែភ្លេងថ្មី ។ការនៅទ្រឹងរបស់សោភា បែបនេះក្រោយពេលនាងបាត់បង់ដៃគូពិសេសដែលយល់ចិត្តនោះគឺលោកព្រាប សុវត្ថិ រត់ចោលហង្សមាសជាង៣ឆ្នាំមកនេះ ទើបនាងងាកទៅច្រៀងតាមឆាកខ្លះជាមួយលោកឆន សុវណ្ណារាជ និងហ្សូណូ រួមទាំងតារាវ័យក្មេងៗដែលហង្សមាសជ្រើសបានពីការប្រលងចម្រៀង។តែសោភា ហាក់មិនក្វល់ពីការអាចប្រឈមនឹងធ្លាក់កូដដោយសារតែគ្មានបទថ្មីៗនិងដៃគូនោះទេ ដោយសារតែនាងអាចនិពន្ធចម្រៀង និងធ្វើភ្លេង បានដោយខ្លួនឯង ពោលគឺចង់ចេញនៅពេលណាក៍បាន ។
គូរបញ្ជាក់ថាពេជ្រ សោភា បានជ្រកនៅហង្សមាសរយៈពេល១៩ឆ្នាំ(២០០៥-២០២៤) ហើយ ដែលកាលពីខែកញ្ញា ឆ្នាំ២០២០ មានព័តមានថាGalaxy ចង់ទិញនាងឲ្យទៅចាប់ដៃជាមួយលោកព្រាប សុវត្ថិ តែចុងក្រោយសោភា សម្រេចចិត្តផ្ញើរខ្លួននៅទ្រនុំចាស់ ព្រោះនាងយល់ថា”ឆ្នាំងចាស់ បាយឆ្ងាញ់ “។ភ្លាមៗនោះសោភា ត្រូវថៅកែប្រគល់តំណែងធំ១ឲ្យនាងធ្វើជាJudge កម្មវិធី”Beat The Best “ បន្ថែមពីលើការងារជាCoach កម្មវិធីThe Voice Cambodia ។ប្រភពបានឲ្យដឹងថាថៅកែត្រៀមឲ្យតំណែងថែមទៀតទៅលើសោភា នៅឆ្នាំ២០២៤ នេះដើម្បីកុំឲ្យនាងរត់ចោលផលិតកម្ម ក្រោយហង្សមាសថ្លោះធ្លោយបណ្ដោយឲ្យព្រាប សុវត្ថិ និងខេមរៈ សិរីមន្ដ ដឹកដៃគ្នាលោតចូលGalaxy ព្រមគ្នានោះ ។
ទោះជាពេជ្រ សោភា កំពុងតែរីករាយរឿងកើបលុយធំនៅរដូវក្ដៅនេះមែន តែរឿងស្នេហានាងជាមួយប្រុសក្មេងឆឹម សក្កដា ហាក់នៅតែស្ថិតក្នុងមន្ទិលសង្ស័យថាអាចនឹងមានការប្រែប្រួលគ្រប់ពេលវេលាទាំងអស់ បើទោះជាពួកគេប្រកាសថាបានភ្ជាប់ពាក្យជាមួយគ្នាកាលពីថ្ងៃទី១១ ខែ១១ ឆ្នាំ២០២២ ក្ដី ។ការលើកឡើងបែបនេះព្រោះតែសោភា នៅតែមិនច្បាស់ថ្ងៃរៀបការឲ្យពិតប្រាកដនៅឆ្នាំ២០២៤ នេះដដែល ហើយមានពេលខ្លះនាងបែជាបណ្ដើរបុរសលាក់មុខម្នាក់ទៅទៅឆ្នេសមុទ្រ ដោយមិនក្វល់ពីគូដណ្ដឹងទៅវិញ ។អ្នកខ្លះចាត់ទុកសុខសោភា ថាជាជាតារា”ជោគជ័យតែអាជីពសិល្បៈ តែស្នេហាសូន្យ” តែការលើកឡើងបែបនេះធ្វើឲ្យមេម៉ាយរូបនេះមិនសប្បាយចិតុ្តឡើយ ។ដោយឡែកFan មិនចង់ឃើញសោភា បរាជ័យស្នេហាជាលលើកទី៣ នោះទេ ហើយពួកគេជម្រុញឲ្យនាងគិតគូររឿងការប្ដីឲ្យបានឆាប់ៗផងព្រោះអាយុ៤១ឆ្នាំទៅហើយ បើរវល់តែស្ដាយលុយធំ តើពេលណាបានមានកូនបន្ដពូជ ?
