ភ្នំពេញ៖តារាសម្ដែង និងចម្រៀងលោកយ៉ែម សំអូន បានធ្វើកម្មវិធីជប់លៀងធំខួបកំណើតរបស់ខ្លួនគម្រប់អាយុ៤៦ឆ្នាំ កាលពីរាត្រីថ្ងៃទី២០ កុម្ភៈ ដោយមានមិត្តរួមអាជីពជាច្រើនចូលរួមសាទរ។ប៉ុន្ដែខួបលោកសំអូន ឆ្នាំនេះក៍មិនខុសពីឆ្នាំមុនដែរ ពោលគឺលោកត្រូវមិត្តភក្ដិបង្អាប់ថា”ចាស់ហើយ ធ្វើខួបទៀត “ដែលពាក្យនេះធ្វើឲ្យបុរសពោះម៉ាយរូបសង្ហារមានការខ្មាសអៀនតិចតួចដែរ ព្រោះភ្ញៀវភាគច្រើនថាលោកធ្វើពិធីចំរើនព្រះជន្ម មិនមែនខួបធម្មតា នោះទេ ។
លោកយ៉ែម សំអូន ថ្លែងសារថាថ្ងៃទី២០ ខែ២ ឆ្នាំ២០២៤ ជាលេខដ៍ល្អចំនិងថ្ងៃកំណើត ដ៍ស្រស់ផូផង់របស់លោក។លោកថាឆ្នាំណាក៍លោកមានសំណាងដែរ ព្រោះមានឪពុកម្ដាយជាមហាគុណនៅក្នុងជីវិតរបស់លោកធ្វើឲ្យលោកមិនដែលស្គាល់ពាក្យថាបរាជ័យឡើយ។
សូមបញ្ជាក់ថាលោកយ៉ែម សំអូន បានប្រារពខួបកំណើតលោកសឹងតែជារៀងរាល់ឆ្នាំដោយមានតារាល្បីៗ ពិសេសអ្នកចម្រៀង ពិធីករដែលធ្វើការឲ្យក្រុមហ៊ុនកម្សាន្ដរបស់លោកតែងតែចូលរួមសម្ដែងឈុតប្លែកៗនៅថ្ងៃខួបលោក។ប៉ុន្ដែទន្ទឹមនិងនោះក៍មានការរិះគន់ខ្លះដែរថាលោកសំអូន ចូលដល់វ័យនេះហើយមិនសាកសមធ្វើខួបធំដល់ម្លឹងដូចយុវវ័យទេ ហើយគូរតែសន្សំលុយទុកការប្រពន្ធថ្មី ជប់លៀងមង្គលការវិញទើបល្អជាង។ការលើកឡើងនិងដាស់តឿនលោកសំអូន បែបនេះព្រោះតែគេមិនចង់ឃើញលោក ប្រើជីវិតជាពោះម៉ាយបំពេញតួនាទីជាស្រីផងប្រុសផងបែបនេះតទៅទៀតឡើយ និងម្យាងទៀតលោកមានផ្ទះធំយ៉ាងប្រណិតហេតុនេះអ្វីដែលលោកមានការខ្វះខាតនាពេលនេះគឺភួយសាច់នេះតែម្ដង។
គូររំលឹកថាលោកយ៉ែម សំអូន បានទុកជីវិតជាបុរសពោះម៉ាយរយៈពេល៩ឆ្នាំមកហើយ ក្រោយលោកបានចែកផ្លូវជាមួយអតីតភរិយាអ្នកនាងយ៉ាន លីនដា កាលពីខែមិថុនា ឆ្នាំ២០១៥ ហើយពេលនេះអ្នកនាងលីនដា និងកូនស្រីកំពុងរស់នៅអូស្រា្ដលី ។លោកសំអូន ធ្លាប់ប្រាប់អ្នកយកព័តមានយើងថាជារៀងរាល់ឆ្នាំនៅថ្ងៃដែលលោកធ្វើខួបកូនស្រីរបស់លោកតែងតែដឹងនិងចងចាំថ្ងៃនោះហើយនាងផ្ញើរសារជូនពរលោកពីចម្ងាយ ។ប៉ុន្ដែតាមព័តមានថាលោកសំអូន និងអតីតប្រពន្ធពេលនេះពេលខ្លះជួបគ្នាដោយចៃដន្យនៅខ្មែរក៍ពួកគេមិននិយាយរកគ្នាឡើយ ។តែអ្នកនាងលីនដា បានបើកសិទ្ធិដោយសេរីលើកូនស្រីពោលគឺចង់ជួបឪពុកគេពេលណាក៍បានតាមចិត្តចង់។
មជ្ឈដ្ឋានមហាជននៅតែមិនយល់ថាហេតុអ្វីបានជាលោកយ៉ែម សំអូន នៅទុកជីវិតជាពោះម៉ាយជិត១ទសវត្សន៍ដោយគ្មានដំណឹងយកប្រពន្ធថ្មីបែបនេះឡើយ ព្រោះជីវិតអ្នកសិល្បៈភាគច្រើនណាស់គឺបែកចាស់ យកថ្មីភ្លាម ពួកគេកម្រនឹងបៀមទុក្ខរឿងស្នេហាបានយូឆ្នាំណាស់ តែលោកសំអូន បែជាដើរផ្លូវខុសគេទៅវិញ ។អ្នកខ្លះសង្ស័យថាលោកសំអូន នៅតែអាល័យអតីតប្រពន្ធ ឬពិបាកស្វែងរកស្រីស្នេហ៍ថ្មីជំនួសប្រពន្ធចាស់បាន ទើបលោកពន្យាពេលស្អំរបួសបេះដូងបែបនេះ។ប៉ុន្ដែទន្ទឹមនិងនោះក៍មានខ្លះនៅតែសង្ស័យថាលោកសំអូន គ្មានអារម្មណ៍ជាមួយស្រី្ដភេទដែរ ព្រោះបញ្ហាដ៍ចម្រូងចម្រាសរបស់លោកជាមួយអតីតប្រពន្ធដែលនាំឲ្យមិនអាចបន្ដស្នេហាតទៅមុខទៀតបាននោះគឺដោយសារតែពេលនោះអ្នកនាងលីនដា សង្ស័យអតីតប្ដីមានប្រុស បើទោះជាលោកសំអូន និងភាគីពាក់ព័ន្ធជាមួយលោកកាលនោះបានច្រានចោលក្ដី ។
លោកយ៉ែម សំអូន ធ្លាប់បង្ហាញរូបភាពឲ្យគេឃើញថាលោកមិនមែនជាបុរសពោះម៉ាយកូន១នោះទេតែមានកូន២ គឺកូនប្រុស១ ស្រី១ ។តែរហូតមកដល់បច្ចុប្បន្នគេនៅតែមិនដឹងថាអតីតភរិយាទី១របស់លោកសំអូន និងជាម្ដាយរបស់កូនប្រុសលោកជាអ្នកណាឡើយ ។
ក្រៅពីលោកយ៉ែម សំអូន តារាដែលប្រើជីវិតពោះម៉ាយនៅឆ្នាំ២០២៤ នេះមានដូចជាលោកទេព រិនដារ៉ូ និងម៉ារ៉ា ប៊ុណ្ណា ជាដើម ។ប្រភពបានឲ្យដឹងថាលោកសំអូន ចង់រកភរិយាឲ្យកូនប្រុសរបស់លោកមុន ទើបលោកគិតគូររឿងការប្រពន្ធថ្មីតាមក្រោយ ។ប្រសិនបើលោកសំអូន ប្រែក្លាយពីការចំណាយលុយខ្ជះខ្ជាយធ្វើខួបកំណើតមកជាធ្វើពិធីការប្រពន្ធថ្មីឆាប់ៗនេះមែន នោះពាក្យចរចាមអារ៉ាមដែលថាលោកចូលចិត្តស្និតស្នេហ៍ជាមួយមនុស្សប្រុស ជាងស្រីនោះនឹងត្រូវបន្សាបបានវិញខ្លះៗជាមិនខាន ហើយអ្នកដែលភ្ញាក់ផ្អើលជាងគេគឺអ្នកនាងយ៉ាន លីនដា ៕
