ភ្នំពេញ៖លោកស្រីសុគន្ធ ដែលគេស្គាល់ថាជាអតីតភរិយាលោកឧកញ៉ាយឹម តាស្រង់ នោះបានចេញមុខសុំទោសលោកតាស្រង់ និងម៉ាក់អ៊ីអ៊ី គឺលោកស្រីលី ញូរី កាលពីពេលថ្មីៗនេះដែលនេះគឺជាសញ្ញាល្អមួយព្រោះការដើរថយមួយជំហ៊ានដើម្បីរឈានទៅក្សារភាពស្ងៀមស្ងាត់ និងបញ្ចប់ការប៉ះសំដីគ្នានាំឲ្យផ្អើលនៅលើបណ្ដាញសង្គមតទៅទៀត។
អតីតភរិយាលោកឧកញ៉ាយឹម តាស្រង់ ដែលមានហ្វេសបុកឈ្មោះSokun Online Shop នោះបានថ្លែងថាលោកស្រីសូមធ្វើការសូមទោសជាសាធារណៈចំពោះការនិយាយលើសខុសដែលនាំឲ្យអ្នកលេងលើបណ្ដាញសង្គមមានការយល់ច្រឡំ នាំឲ្យគេជេរលើលោកឧកញ៉ាយឹម តាស្រង់ និងម៉ាក់អ៊ីអ៊ី ប៉ះពាល់ដល់កិត្តយស និងសេចក្ដីថ្លៃថ្នូររបស់ឧកញ៉ានិងម៉ាក់អ៊ីអ៊ី ។លោកស្រីសុគន្ធ ថ្លែងបន្ដថាម៉ាក់អ៊ីអ៊ី មិនបាននិយាយចោទប្រកាន់មកលើលោកស្រីថាមិនបានមើលថែរកូនកន្លងមកទេ តែរឿងមកពីលោកស្រីមានការយល់ច្រឡំចំពោះខ្លឹមសារខ្លួនឯង ហេតុនេះសូមបងប្អូនមេត្តាឈប់យល់ច្រឡំ និងបញ្ចប់ការជេរទៅលើម៉ាក់អ៊ីអ៊ី និងឧកញ៉ាបន្ដទៀត។
សូមបញ្ជាក់ថារឿងរ៉ាវដែលនាំឲ្យអតីតភរិយាលោកឧកញ៉ាយឹម តាស្រង់ និងម៉ាក់អ៊ីអ៊ី មានការវិវាទគ្នាផើលពេញបណ្ដាញសង្គមនោះព្រោះតែថ្មីៗនេះលោកស្រីលី ញូរី បានឆ្លើយតបទៅសំណួររបស់អ្នកសារព័តមានដែលចោទសួរថាតើលោកស្រីស្រលាញ់ឧកញ៉ាយឹម តាស្រង់ នៅត្រង់ចំណុចណា ?ភ្លាមៗនោះម៉ាក់អ៊ីអ៊ី បានផ្ដល់ចម្លើយទៅអ្នកកាសែតថាលោកស្រីមានការអាណិតលោកយឹម តាស្រង់ ដែលឃើញលោកមើលថែកូនៗដល់ទៅ៤នាក់បានយ៉ាងល្អ ។លោកស្រីថាមនុស្សប្រុសបែបនេះកម្រនឹងបានជួបឬឃើញមាន…។
ក្រោយមានការលើកឡើងបែបនេះលោកស្រីសុគន្ធ អតីតភរិយាលោកឧកញ៉ាយឹម តាស្រង់ ថាការថ្លែងបែបនេះធ្វើឲ្យមានការភ័ន្ដច្រឡំថាលោកស្រីជាមនុស្សស្រីអត់ចេះមើលកូន ឬមិនចេះមើលថែរកូនៗ តែតាមការពិតលោកស្រីនិងអតីតប្ដីបានចិញ្ចឹមបីបាច់កូនៗតាំងពីតូចៗបានយ៉ាងល្អហើយពេលបែកគ្នាកូនៗដំបូងនៅតែជាមួយលោកស្រីទេ ប៉ុន្ដែពេលពួកគេធំៗទៅទើបលោកស្រីបានផ្ដល់ទៅឲ្យឪពុកទំនុកបម្រុងការសិក្សារជាដើមព្រោះលោកមានលទ្ធភាពនិងម្យាងទៀតលោកស្រីដឹងថាលោកតាស្រង់ ស្រលាញ់កូនៗណាស់ទើបលោកស្រីយល់ព្រមឲ្យកូនៗទៅជួបនិងត្រូវឪពុកជួយជ្រោមជ្រែងជាបន្ដបន្ទាប់។ចំណុចខ្វែងគំនិតគ្នាបែបនេះហើយទើបធ្វើឲ្យមានការយល់ច្រឡំនិងចោទប្រកាន់គ្នាទៅវិញទៅមក ប៉ុន្ដែឥឡូវរឿងរ៉ាវនេះបានធូស្រាលទៅវិញបន្ទាប់ពីលោកស្រីសុគន្ធ បានចេញមុខសុំទោសជាសាធារណៈចំពោះលោកឧកញ៉ាយឹម តាស្រង់ និងម៉ាក់អ៊ីអ៊ី ។
លោកជំទាវលី ញូរី ហៅម៉ាក់អ៊ីអ៊ី បានថ្លែងថាអត្ថន័យដែលលោកស្រីនិយាយថាលោកយឹម តាស្រង់ ពោះម៉ាយ៧ឆ្នាំមើលថែរកូនតែឯងគឺពាក្យនេះលោកជំទាវគឺចង់សំដៅលើបុគ្គលតែម្នាក់គត់គឺលោកឧកញ៉ាយឹម តាស្រង់ ហើយលោកជំទាវមិនបានបៀតបៀន ឬដៀមដាមទៅអតីតភរិយារបស់លោកយឹម តាស្រង់ នោះទេ ។លោកជំទាវលី ញូរី សង្កត់ថាលោកស្រីចង់សដំដៅថាពាក្យដែលលោកតាស្រង់ បែកគ្នារយៈពេល៧ឆ្នាំហើយ គាត់អត់ទាន់យកប្រពន្ធ ឬមានសង្សារនិងរៀបការ យកនារីណាម្នាក់មើលថែរកូនៗគាត់ គឺលោកជំទាវចង់សំដៅបែបនេះ ។លោកជំទាវញូរី ថាលោកស្រីអត់បានចោទប្រកាន់ប្អូនស្រី(អតីតប្រពន្ធតាស្រង់ )ចុះចោលកូន ឬប្អូនស្រីបានបោះបង់កូនចោលហើយក៍មិនបាននិយាយថាប្អូនស្រីអត់ជួយចិញ្ចឹមកូននោះដែរ ។លោកជំទាវញូរី ថារឿងនោះគឺជាការយល់ស្រឡំ ដែលបងប្អូនបានស្ដាប់ហើយធ្វើឲ្យមានការយល់ច្រំឡំធ្វើឲ្យផ្អើលលើបណ្ដាញសង្គមហ្វេសបុក។
ជាមួយគ្នានេះដែរលោកជំទាវលី ញូរី បានស្នើរឲ្យសុំបញ្ឈប់ការជេរប្រមាថទៅលើលោកស្រីឬឧកញ៉ាយឹម តាស្រង់ ក៍ដូចជាអតីតភរិយាលោកយឹម តាស្រង់ ផងដែរ ព្រោះមនុស្សមានកិត្តយសរៀងៗខ្លួន ហើយលោកស្រីសង្ឃឹមថារឿងរ៉ាវនេះនឹងបានស្ញប់ស្ងាត់ទៅវិញ។
ក្រោយមានការបញ្ជាក់ច្បាស់ៗភាគីទាំងសងខាងបែបនេះគេជឿរថាមជ្ឈដ្ឋានមហាជន និងអ្នកលេងបណ្ដាញសង្គម បានយល់ច្បាស់ ឈប់ចោទប្រកាន់ថាខាងណាខុស ខាងណាត្រូវទៀតជាមិនខាន ព្រោះភាគីពាក់ព័ន្ធចេញមុខបំភ្លឺច្បាស់ៗហើយ ។ចំណែកលោកឧកញ៉ាយឹម តាស្រង់ វិញថ្មីៗនេះក្នុងជំនួបជាមួយអ្នកសារព័តមានលោកបាននិយាយថាក្រោយជួបម៉ាក់អ៊ីអ៊ី ជីវិតលោកហាក់មានអ្វីគ្រប់យ៉ាងពោលគឺពោពេញទៅដោយសុភមង្គល ។ប៉ុន្ដែលោកឧកញ៉ាថាគម្រោងរៀបការជាមួយម៉ាក់អ៊ីអ៊ី នៅមិនទាន់កំណត់ថាធ្វើនៅពេលណាទេ ៕
