ភ្នំពេញ៖តារាចម្រៀងឃីន ស្រីនាថ ហៅអ៊ីវ៉ា បានបង្ហាញអារម្មណ៍រំភើបរីករាយចិត្តព្រោះតែក្លិបបាល់ទាត់របស់គូស្នេហ៍នាងលោកលី សេងហួរ បានក្លាយទៅជាម្ចាស់ជើងឯកនៅឆ្នាំ២០២៤ នេះតាមរយៈលទ្ធផលនៅវគ្គផ្ដាច់ព្រ័ត្រក្រុមU17 សៀមរាប យូណាធីត បំបាក់ក្រុមអេស អរ ប៊ីស៊ីអេហ្វស៊ី ក្នុងលទ្ធផល៦ ទល់ ០ ។
បន្ទាប់ពីឃើញក្លិបបាល់ទាត់ដែលមានគូស្នេហ៍ជាថៅកែនោះអ៊ីវ៉ា បានចេញសារសម្ដែងការអបអរសាទរដល់ក្លិបមួយនេះ ខណៈដែលគូស្នេហ៍នាងលោកសេងហួរ ក្នុងឋានៈជាម្ចាស់ក្លិបលោកក៍បានចេញសារស្រដៀងគ្នានេះដែរ។ប្រភពបានឲ្យដឹងថារៀងរាល់ការប្រកួតសំខាន់ៗរបស់ក្លិបសៀមរាប យូណាយធីត ពិសេសឈុតធំ អ៊ីវ៉ា តែងតែទៅចូលរួមជានិច្ច ដោយពេលខ្លះនាងថែមទាំងការច្រៀងសម្ដែងអមកម្មវិធីទៀតផង។ដោយឡែកក្រុមការងាររបស់ក្លិបនិងកីឡាករវិញបានគោរពអ៊ីវ៉ា ដូចជាថៅកែឬម្ចាស់ក្លិបដូចដែលពួកគេបានគោរពទៅលើលោកលី សេងហួរ ដែរ។
អ៊ីវ៉ា ធ្លាប់ថ្លែងថាតាមពិតនាងស្រលាញ់កីឡាទេ តែបែជាក្លាយទៅជាតារាចម្រៀងទៅវិញ ។ប៉ុន្ដែយ៉ាងណានាងថាគូស្នេហ៍របស់ជាអ្នកធ្វើការក្នុងវិស័យកីឡាម្នាក់។ចំណែកលោកសេងហួរ វិញថ្មីៗនេះលោកបានចេញសារសរសើរស្រីនាថ ពេញៗមាត់ថានាងជានារីម្នាក់ដែលមានគុណសម្បត្តិគ្រប់បែបយ៉ាងទាំងអស់ក្នុងជីវិតលោក។
គូររំលឹកថាអ៊ីវ៉ា បានភ្លាត់ស្នៀតធ្លាយរឿងមានសង្សារជាម្ចាស់ក្លិបបាល់ទាត់សៀមរាប យូណាយធីត នៅពាក់កណ្ដាលឆ្នាំ២០២៣ ក្រោយពីនាងបានព្យាយាមបិទបាំងរឿងស្នេហាជាមួយថៅកែក្លិបបាល់ទាត់វ័យក្មេងរូបនេះអស់រយៈពេល៧ឆ្នាំ។ចំណងស្នេហានេះមានចាស់ទុំទាំងសងខាងដឹងឭហើយតាមព័តមានថាស្រីនាថ និងលោកសេងហួរ បានភ្ជាប់ពាក្យជាមួយគ្នាទៅហើយ គ្រាន់តែពួកគេមិនបង្ហាញឲ្យគេឃើញជាចំហប៉ុណ្ណោះ ព្រោះខ្លាចប៉ះពាល់ដល់អាជីពចម្រៀងអ៊ីវ៉ា ។ចំណែករឿងដែលឪពុកអ៊ីវ៉ា គឺលោកវ៉ាវ ថាមិនប្រកាន់អនាគតកូនប្រសារទោះជាអ្នកមានអ្នកក្រ ក៍អាចចូលចែចូវកូនក្រមុំលោកបាន សំខាន់គឺកុំឲ្យតែជាប្ដីគេនោះពេលនេះបញ្ជាក់ឲ្យគ្រប់គ្នាឃើញហើយថាគូស្នេហ៍របស់ស្រីនាថ គឺជាបុរសទ្រព្យស្ដុក ព្រោះឪពុកម្ដាយលោកសេងហួរ ជាអ្នករកស៊ីធំនៅខេត្តសៀមរាប ។អ្វីដែលអ៊ីវ៉ា ត្រូវចិត្តនោះលោកសេងហួរ មិនចេះប្រចណ្ឌឬហួងហែងនាងក្នុងការច្រៀងរាំឡើយ ក្នុងនោះទោះរួមទាំងការថតMV ស្និតស្នេហ៍ជាមួយតារាប្រុសផ្សេងក៍លោកមិនក្វល់ដែរ ព្រោះថៅកែក្មេងរូបនេះក៍ជាអ្នកស្រលាញ់សិល្បៈម្នាក់ដែរដោយលោកថែមទាំងបានចូលថតខារ៉ាអូខេជាមួយស្រីនាថ បទ”ម្ដេចយកប្រពន្ធចោលអូន?”ទៀតផង។ប៉ុន្ដែលោកសេងហួរ តែងតែតាមដានគ្រប់សកម្មភាពសិល្បៈរបស់អ៊ីវ៉ា ដូចជាការចេញច្រៀងតាមបណ្ដារConcerts នានាដោយលោកដឹងពីការទៅដល់ ច្រៀងបទអីខ្លះ ចប់ម៉ោងន្មាន និងទៅដល់ផ្ទះពេលណាជាដើម ។រូបភាពបែបនេះមិនមែនលោកសេងហួរ មិនទុកចិត្ត ឬប្រចណ្ឌអ៊ីវ៉ា នោះទេ ប៉ុន្ដែលោក”បារម្ភ” ពីសុវត្ថិភាពនាងដែលធ្វើតំណើរទៅច្រៀងនៅខេត្តឆ្ងាយៗ ដែលផ្ទុយស្រឡះពីលោកថៅកែ”ប”ប្អូនលោកផ្កាយ៣ ធ្លាប់តាមស្នេហាអ៊ីវ៉ា ៨ឆ្នាំមុនលោកហួរ តែលោកបានហាមនាងមិនឲ្យច្រៀងបទណាមានក្បាច់រាំ និងមិនអនុញ្ញាត្តិឲ្យនាងថតអោបរឹតជាមួយតារាប្រុសណាជាដាច់ខាត ទើបចុងក្រោយស្រីនាថ ផាត់ស្នេហ៍មួយនេះចោល។
ថ្វីត្បិតតែចំណងស្នេហាអ៊ីវ៉ា និងថៅកែក្លិបបាល់ទាត់ឈានចូលដល់ឆ្នាំទី៨ នឹងមានដំណឹងថាពួកគេនឹងរៀបការនៅឆ្នាំ២០២៤ នេះក្ដី ប៉ុន្ដែមិនច្បាស់ពីថ្ងៃខែដែលក្រាបផ្ទឹមពិតប្រាកដនោះទេ ព្រោះអ្នកយកព័តមានយើងធ្លាប់ទូរស័ព្ទទៅអ៊ីវ៉ា ជាច្រើនតែចូលគ្មានអ្នកទទួល និងពេលខ្លះនាងលើកហើយ ប៉ុន្ដែគ្រាន់តែស្ដាប់សំណួរបានបន្ដិចបិទទូរស័ព្ទក៍មាន។ចំណែកលោកអ៊ូ វ៉ាវ មិនអាចទាក់ទងបានឡើយ ។ប្រភពបានបានឲ្យដឹងថាលោកវ៉ាវ មិនចង់ឲ្យស្រីនាថ លើកពេលរៀបការម្ដងទៀតទេ ព្រោះតាមគម្រោងនាងត្រូវរៀបការជាមួយថៅកែនៅឆ្នាំ២០២៣ ដែលអាយុនាងគម្រប់៣០ឆ្នាំ តែនាងបែជារារែកចិត្តហើយពន្យាពេលទៅវិញ។លោកវ៉ាវ ធ្លាប់ក្រើនរំលឹកដាស់តឿនអីវ៉ា ថា”មនុស្សស្រីប្រៀបបានដូចជាផ្កា រីកលំអងកាលណាក៍រោយទៅវិញ ហេតុនេះការប្រើជីវិតនៅលីវយូពេក គឺអត់ប្រយោជន៍ទេ…”។
តាមព័តមានថាក្រៅពីអ៊ីវ៉ា តារាដែលត្រៀមរៀបការនៅឆ្នាំ២០២៤ មានដូចជាពេជ្រ សោភា ,ប៉ាច គីមមួយ និងម៉ានីកា ជាដើម ៕
