ភ្នំពេញ៖តារាចម្រៀងខេមរៈ សិរីមន្ដ ,ឆាយ វីរៈយុទ្ធ ,អនុស្សាវរីយ៍ ជាដើម ពួកគេសុទ្ធតែមានកូនរៀងៗខ្លួនតាំងពីមុនថ្ងៃរៀបការម្លេះ ប៉ុន្ដែលោកប៉ុន សុណារិន ហៅខេម វិញចិត្តចង់បានកូនដែរ តែបែជាមិនហ៊ានឲ្យភរិយាពពោះមុនថ្ងៃការដូចគេទៅវិញ ទើបរហូតមកដល់ពេលនេះលោកសុណារិន នៅតែគ្មានកូនង៉ាបីប្រលែងលេងដូចគេដដែល បើទោះជាកន្លងមកគេធ្លាប់សង្ស័យថាលោកមានកូនដល់ទៅ២នាក់ក្ដី តែលោកថាក្មេងៗទាំងនោះគឺម្នាក់ស្រីជាក្មួយរបស់ភរិយាលោកនៅបារាំង និងម្នាក់ទៀតប្រុសជាកូនមេរបស់លោក(ឡេង ណាវ៉ាត្រា )។តែលោកថាចិត្តលោកពិតជាចង់បានកូនមែន ព្រោះស្រលាញ់ក្មេងៗណាស់ …។
បើទោះជាចំណងស្នេហាលោកខេម និងអ្នកនាងស្រីកា អាណិកជនខ្មែរមកពីបារាំងមានរយៈពេលជាង៨ឆ្នាំដោយសាមីខ្លួនថាមិនទាន់មានកូនក្ដី ប៉ុន្ដែអ្នកទាំងពីរបង្ហាញក្ដីស្រលាញ់ចំពោះគ្នាដោយបើកចំហកាន់តែខ្លាំងរយៈពេលជាង២ឆ្នាំមកនេះ។លោកខេម បានអះអាងប្រាប់Fan ខ្លួនកាលពីពេលថ្មីៗនេះថាលោកមិនមែនស្រលាញ់ភរិយាតែមួយថ្ងៃ(៨មីនា)ទេ តែស្រលាញ់ប្រពន្ធជារៀងរាល់ថ្ងៃ ។អ្នកគាំទ្រតារាចម្រៀងខេម ចង់ឃើញលោកដឹកដៃប្រពន្ធរៀបការឆាប់ៗដើម្បីឲ្យចំណងស្នេហាកាន់តែមានសុវត្ថិភាពជាងនេះ ប៉ុន្ដែទាំងនៅចំពោះអ្នកសារព័តមាននិងFan លោកសុណារិន តែងតែនិយាយថានឹងគិតគួរ(រៀបការ)ឆាប់ៗនេះហើយ តែមិនកំណត់ថាជា ពេលណាឲ្យពិតប្រាកដឡើយ ។
ក្រៅពីខេម តារាប្រុសដែលជ្រើសផ្លូវសាងស្នេហ៍”ជួញឆ្ងាយ ប្រសើជាងជួញជិត “ពោលគឺយកភរិយាជាអាណិកជនមានដូចជាលោកស៊ុក សុភា ,ខៀវ សំភេទ ,ហង្ស ឈា,ខៃ ប្រសិទ្ធ ,យស បូវណ្ណៈ សុវណ្ណ មុនី ,នៅ ស៊ីនឿន និងសោភ័ណ្ឌ ឡាវី ជាដើម ។សម្រាប់លោកខេម ក្នុង១ឆ្នាំលោកចេញទៅដើរលេងនៅទឹកដីខាងប្រពន្ធនៅប្រទេសបារាំងម្ដង គឺនៅខែធ្លាក់ភ្លៀង ព្រោះស្បើយពីការងារសិល្បៈ ខណៈដែលភរិយាលោកអ្នកនាងស្រីកា បានមករស់នៅខ្មែរជាមួយលោកជិត៨ឆ្នាំមកហើយ។ប្រភពបានឲ្យដឹងថាអ្នកនាងកា ប្រៀបដូចជាជំនួយការលោកខេម តែម្ដងពោលគឺទាំងការចេញច្រៀងក្នុងនិងក្រៅស្រុករបស់លោកណារិន នាងជាអ្នករៀបចំ ចាត់ចែងសម្លៀកបំពាក់ និងគ្រឿងអលង្ការឲ្យប្ដី ពោលគឺដូចគ្នាទៅនិងភរិយារបស់លោកព្រាប សុវត្ថិ ,ឆាយ វីរៈយុទ្ធ និងខេមរៈ សិរីមន្ដ ដែរ ។ប៉ុន្ដែនៅតាមកម្មវិធីសិល្បៈភាគច្រើនលោកខេម កម្រនិងបណ្ដើរប្រពន្ធទៅចូលរួម លើកលែងតែម្ចាស់កម្មវិធីនោះជិតដិតលោកបំផុតទើបទៅជាមួយគ្នា ។
គួរបញ្ជាក់ថាលោកខេម ជាតារាម្នាក់ដែលកាន់គ្រីស្ទានតាំងពីតូចដូចគ្នាទៅនិងអ្នកនាងពេជ្រ សោភា និងសំអុល អែនណាអូមី ដែរ ។អតីតតារាថោនរូបនេះក៍ជាត្រូវបានគេព្យាករណ៍ថាលោកនឹងឡើងជាឧកញ៉ានាពេលអនាគត ពោលគឺដូចគ្នាទៅនិងលោកព្រាប សុវត្ថិ និងខេមរៈ សិរីមន្ដ ដែរ ព្រោះតារាប្រុសសំខាន់ៗរបស់Galaxy ទាំងអស់នឹងឡើងជាឧកញ៉ាដូចគ្នា ។ប៉ុន្ដែខេម មិនសូវមានបទចម្រៀងល្បីល្បាញដូចមុនទេ នារយៈពេលចុងក្រោយនេះពោលគឺតាំងពីព្រាប សុវត្ថិ និងខេមរៈ សិរីមន្ដ ចូលមកជ្រកក្រោមដំបូលជាមួយនោះលោកសុណារិន លែងសូវអុកឡុកទីផ្សារចម្រៀងដូចមុនទៀតហើយ។អ្នកគាំទ្រតារាចម្រៀងសំនៀងស្អករូបនេះថាបើលោកខេម នៅតែគ្មានច្រកចេញ ពោលគឺបុកទីផ្សារចម្រៀងដូចមុនទេ នោះលោកមិនត្រឹមតែរបូតតំណែងជាតួឯកនោះទេ ប៉ុន្ដែអាចធ្លាក់ទៅដល់លខេ៣ ជាមិនខាន ព្រោះសព្វថ្ងៃតារាប្រុសដែលកំពុងតែអុកឡុកចម្រៀងនៅផលិតកម្មនេះជាងគេគឺលោកខែម ប៊ុនថៃ ។ចំណែកលោកសុណារិន វិញអំឡុងពេលដែលលោកថៃ សម្រុកទាំងការថតMVជាមួយខ្លា និងតារាថៃ នោះលោកបែជារក្សារភាពស្ងៀមស្ងាត់ទៅវិញ ខណៈដែលការចាប់ដៃជាមួយនាងតន់ ច័ន្ទសីម៉ា ក៍មិនសូវសកម្មដូចមុនទើបគេពិបាកនឹងមើលឃើញផ្លូវថាលោកសុណារិន អាចឈរនៅពីលើព្រាប សុវត្ថិ និងខេមៈ សិរីមន្ដ បានក្នុងទ្រនុំមួយដែលមានតារាប្រុសប្រជុំទៅដោយជើងខ្លាំងៗនេះ។
ទស្សនិកជនចាំមើលថានៅឆ្នាំ២០២៤ លោកខេម នឹងផ្ដោតលើការពង្រឹងទីផ្សារចម្រៀងរបស់ខ្លួនឡើងវិញ ឬគិតគួ ឲ្យភរិយាពពោះកូនដំបូងឲ្យលោកមុនរៀបការ?
