ភ្នំពេញ៖បេប៊ី បានឲ្យដឹងថាសម្រាប់ការវិលវិញជាថ្មីលើកនេះរូបនាងពិតជាមើលឃើញថាទីផ្សារចម្រៀងនាពេលបច្ចុប្បន្នមិនដូចពីមុនឡើយ។ការថ្លែងបែបនេះរបស់ស្រីស្រស់ជុំ រចនាពេជ្រ ហៅបេប៊ី បន្ទាប់ពីនាងទើបតែត្រឡប់មកកាន់ក្បាលមីក្រូបានជាង៥ខែប៉ុណ្ណោះ ក្រោយបាត់មុខពីឆាកតន្រ្ដីដល់ទៅ៣ឆ្នាំ។
បេប៊ី ថ្លែងប្រាប់អ្នកយកព័តមានយើងតាមទូរស័ព្ទកាលពេលថ្មីៗនេះថាតាំងពីចាប់ផ្ដើមអាជីពចាស់នេះសារជាថ្មីមកនាងចេញច្រៀងសម្ដែងបានឆាកតូចៗច្រើនជាងឆាកធំ នៅតាមខេត្តក្រុងមួយចំនួន ព្រោះថាបច្ចុប្បន្នទីផ្សារចម្រៀងមិនដូចពីមុននោះទេ ដោយសារតែតារាមានច្រើន ការគាំទ្រត្រូវបែកខ្ញែក។យ៉ាងណាស្រីស្រស់ថាថ្មីៗនេះនាងទើបបានចេញបទចម្រៀងកន្ទ្រឹមជាលើកដំបូងក្នុងអាជីពនោះគឺបទ”កន្រ្ទឹមបាត់បង “ ដែលជារសជាតិថ្មីមួយទៀតសម្រាប់នាង ព្រោះកន្លងមកនាងច្រើនតែច្រៀងបទញាក់ តែពេលនេះបានផ្លាស់ប្ដូរការច្រៀងចង្វាក់ថ្មីមួយនេះ ដើម្បីជាការសាទរសម្រាប់ពិធីបុណ្យប្រពៃណីចូលឆ្នាំខ្មែរខាងមុខនេះផង ។យ៉ាងណាបេប៊ី ថាការធ្វើបទចម្រៀងរបស់នាងគឺអាស្រ័យទៅលើទីផ្សារនាពេលបច្ចុប្បន្ន ពោលគឺមិនមែនច្រៀងតែញាក់ ឬស្លូវសុទ្ធគ្រប់ពេលឡើយ ។
បេប៊ី បានផ្អាកការច្រៀងសម្ដែងអំឡុងពេលផ្ទុះកូវីដ ហើយនៅខែ១១ ឆ្នាំ២០២៣ ទើបនាងវិលត្រឡប់មកកាន់ក្បាលមីក្រូជាថ្មី ប៉ុន្ដែមកលើកនេះមិនមែនក្នុងនាមជាតារាថោន ទៀតនោះទេគឺជាតារាចម្រៀងឯករាជ្យផលិតបទចម្រៀងដោយខ្លួនឯង។បេប៊ី ថាថ្វីត្បិតតែអាជីពចម្រៀងនាពេលបច្ចុប្បន្នពិបាកប្រកួតប្រជែងនិងដណ្ដើមភាពលេចធ្លោជាងមុនមែន តែនាងគ្មានបំណងវិលងត្រឡប់ទៅរកអាជីពចាស់តាមរយៈការធ្វើជាពិធីការិនីម្ដងទៀតឡើយ បើទោះជារូបនាងបានតស៊ូជាមួយអាជីពចាស់មួយនេះជាច្រើនឆ្នាំ ហើយអាជីពចម្រៀងជាជំហ៊ានបន្ទាប់របស់នាងក៍ដោយ។
បេប៊ី ថ្លែងថា “ខ្ញុំគ្មានបំណងវិលត្រឡប់ទៅធ្វើជាMC ម្ដងទៀតនោះទេ ។ខ្ញុំស្រលាញ់ចម្រៀង ត្រូវប្រឹងបញ្ចេញសម្ថភាពឲ្យអស់តាមដែលអាចធ្វើទៅបាន ។ខ្ញុំមកវិញនេះមិនមែនដើម្បីប្រជែងជាមួយអ្នកណាទេ គឺខំប្រឹងដោយខ្លួនឯងគេល្បីបែបគេ យើងល្បីបែបយើង “។
អ្នកជំនាញសិល្បៈបានលើកឡើងថាបច្ចុប្បន្នតារាកាន់តែច្រើនងាកមកធ្វើបទចម្រៀងដោយខ្លួនឯង ព្រោះពួកគេខ្លះមិនសូវត្រូវបានផលិតកម្មយកចិត្តទុកដាក់ធ្វើបទចម្រៀងឲ្យ និងខ្លះទៀតចង់ចេញបទចម្រៀងដែលខ្លួនឯងស្រលាញ់ ហេតុនេះត្រូវតែចំណាយលុយផ្ទាល់ខ្លួន ធ្វើបទដែលខ្លួនចង់ច្រៀង ត្រូវនឹងសម្លេងខ្លួន ។
បេប៊ី បន្ថែមទៀតថា”កាលខ្ញុំច្រៀងនៅផលិតកម្ម ខាងក្រុមហ៊ុនជាអ្នកធ្វើបទឲ្យនិងការថតMV គេចំណាយទាំងអស់ ។ប៉ុន្ដែពេលយើងច្រៀងខ្លួនឯង ចំណាយលុយផ្ទាល់ខ្លួនទាំងការធ្វើបទ និងការថតMV តែនេះមិនមែនជាលើកដំបូងនោះទេ ព្រោះខ្ញុំធ្លាប់ចាយលុយធ្វើបទខ្លួនឯងជាយូមកហើយ អីចឹងទៅជាទម្លាប់ហើយ អត់អីទេ “។
ក្រៅពីបេប៊ី តារាចម្រៀងដែលវិលត្រឡប់មកវិញ ក្រោយផ្អាកពីសិល្បៈជាច្រើនឆ្នាំមានដូចជាអ្នកនាងឡាយ លក្ខិណា ,លោកឃុំ ប៉ុណ្ណាដែត និងនារីរ័ត្ន គន្ធា ជាដើម ។សម្រាប់បេប៊ី វិញអំឡុងពេលដែលសុខៗសា្រប់តែបាត់ខ្លួនពីអាជីពចម្រៀងនោះនាងធ្លាប់ត្រូវបានគេសង្ស័យថាអាចមានគូស្នេហ៍ហួងហែង រហូតមានអ្នកខ្លះថានាងមិនត្រូវបានម្ចាស់ចិត្តឲ្យវិលរកអាជីពចាស់ទៀតផង ។ប៉ុន្ដែបេប៊ី ថានាងជាប់ដៃបើកហាងកាហ្វេ ដែលពង្រីកជាច្រើនសាខា ទើបរកតែពេលដកឃ្លាមកច្រៀងរាំមិនកើត ។នាងរចនាពេជ្រ ថាពេលនេះហាងកាហ្វេនាងបានបងប្រុសនាងមើលខុសត្រូវជំនួស ហើយពេលទំនេរពីការងារសិល្បៈរូបនាងក៍ឆ្លៀតទៅមើលហាងម្ដងៗដែរ ។
សូមបញ្ជាក់ថាបេប៊ី បានធ្វើជាពិធីការិនីនៅCTN រយៈពេលជាង១០ឆ្នាំ ប៉ុន្ដែចុងក្រោយនាងបោះបង់ទាំងអាជីពMC និងតារាសម្ដែង ដើម្បីផ្ដោតតែលើការច្រៀងតែមួយច្រកប៉ុណ្ណោះ ។អ្នកជំនាញតន្រ្ដីខ្លះថាបេប៊ី មានទឹកដមសម្លេងស្រដៀងទៅនិងសុខ ស្រីនាង ពេលច្រៀងបទស្លូវ ៕