ភ្នំពេញ៖ស្រីស្រស់សឹម ស្រីនិច្ច បានបង្ហាញរូបសម្រស់កាន់តែលេចត្រដែតនៅពេលដែលនាងតុបតែងទ្រង់គ្រឿងជាទេវតាឆ្នាំថ្មី ឆ្នាំរោង ព្រះនាងមហោទរាទេវី ដែលមើលទៅរូបរាង ដងខ្លួន នាងពិតជាស្រស់ស្អាតខ្លាំង។
តើហេតុអ្វីបានជាស្រីស្អាតសឹម ស្រីនិច្ច ចង់ធ្វើជាមហោទរាទេវី ជាបុត្រទី៧ នៃកបិលមហាព្រហ្ម ?
សឹម ស្រីនិច្ច បានប្រាប់តាមទូរស័ព្ទកាលពីពេលថ្មីៗនេះថាមូលហេតុដែលនាងតែងខ្លួនជាទេវតា ព្រោះចិត្តស្រលាញ់ឆ្នាំរោង ស្រលាញ់សត្វក្ងោក ពណ័ខៀវ ។នាងថាការតុបតែងគ្រឿងជាទេវតាឆ្នាំថ្មីនេះគ្មានអ្នកណាតម្រូវឬរៀបចំឲ្យនាងនោះទេ ប៉ុន្ដែជាការស្រលាញ់នាងក៍ជ្រើសយកសម្លៀកបំពាក់ និងStudio ថតដោយខ្លួនឯងតែម្ដង…។
យ៉ាងណាការគ្រងឈុតប្រពៃណីបានយ៉ាងស្អាតរបស់សឹម ស្រីនិច្ច នេះមិនមែនជាលើកដំបូងឡើង ព្រោះនាងធ្លាប់គ្រងសម្លៀកអប្សរាទ្រង់គ្រឿងអលង្ការសម័យបុរាណយ៉ាងស្រស់ស្អាតក្នុងរឿង”អប្សរា មហាអង្គរ” ដែលដឹកនាំដោយលោកហ្វៃ សំអាង ហើយភាពយន្ដមួយនេះនាងលេងជាតួអង្គដល់ទៅ៣ផ្សេងគ្នាឯណ្ណោះ ព្រមទាំងរំពឹងថានៅពេលរឿងមួយនេះដាក់បញ្ចាំងនឹងធ្វើឲ្យទីផ្សារសិល្បៈរបស់នាងកាន់តែទូលាយជាងនេះទៀតផង។
តារាស្រីស្រស់សោភារូបនេះបន្ថែមថាសម្រាប់ការថតរឿងបុរាណមួយនេះអាចនឹងបញ្ចប់នៅចុងឆ្នាំ២០២៤ នេះហើយ ខណៈដែលបច្ចុប្បន្ននាងមានភាពមមាញឹកច្រើនទៅលើការងារសិល្បៈ ។ប៉ុន្ដែទោះជារវល់យ៉ាងណាក៍ស្រីនិច្ច ក៍មិនភ្លេចទៅសាកថ្មីជីវិតដែរដែលថ្មីៗនេះនាងទើបវិលត្រឡប់មកការដើរកម្សាន្ដរយៈពេលខ្លីនៅប្រទេសថៃផងដែរ ។
គួរបញ្ជាក់ថាសឹម ស្រីនិច្ច បានដកខ្លួនពីអាជីពសិល្បៈរយៈពេលខ្លីដែលពេលនោះនាងថាជាប់ដៃរកស៊ីផ្នែកអចលនទ្រព្យ តែពេលនេះបានវិលត្រឡប់មករកអាជីពចាស់ដូចដើម ។តារាបង្ហាញម៉ូដក្លាយទៅជាតារាសម្ដែងភាពយន្ដនិងខារ៉ាអូខេលេចធ្លោនាពេលបច្ចុប្បន្នរូបនេះធ្លាប់អះអាងថាមួយតួខ្លួននាងមិនទាន់កែកុនផ្នែកណាមួយឡើយ ពោលគឺនៅរក្សារសម្រស់ពីធម្មជាតិ១០០% ។ដោយឡែកទាក់ទងរឿងស្នេហាវិញស្រីនិច្ច ដែលធ្លាប់បង្ហាញបុរសម្នាក់ជាចំហ និងថាស្ថិតក្នុងតំណាក់កាលស្វែងយល់ចិត្តគ្នានោះពេលនេះបែជាស្ងាត់រឿងស្នេហានាងទៅវិញ ទើបគ្មានដំណឹងស្រីស្រស់ចូលរោងការឡើយ។
ប្រភពពីតារាជិតដិតបង្ហើបថាកញ្ញាសឹម ស្រីនិច្ច មានជម្រើសស្នេហ៍ច្រើន ហេតុនេះនាងមិនចង់សម្ដែងភាពយន្ដបន្ដកន្ទុយគ្នាដូចតារាផ្សេងៗទៀតនោះទេ ព្រោះខ្លាចលេចធ្លោខ្លាំងពេកធុញរឿងប្រុសតាមរំខាន។យ៉ាងណាផលិតករតែងតែសរសើរពីទេពកោសល្យសម្ដែងរបស់នាងថាពិតជាធម្មតាព្រោះអាចលេងជាតួបុរាណក៍បាន សម័យក៍បាន ។សម្រាប់ស្រីនិច្ច វិញនាងថាភាពយន្ដដែលនាងមានការលះបង់ច្រើនជាងគេគឺរឿង”អប្សរា មហាអង្គរ “នេះហើយព្រោះគ្រាន់តែចំណាយពេលហាត់រាំរបាំជិត១ឆ្នាំ និងបានព្យាយាមសម្រកទម្ងន់ទៅតាមអ្នកដឹកនាំរឿងចង់បាន។
ក្រៅពីសឹម ស្រីនិច្ច តារាដែលធ្លាប់គ្រងជាឈុតទេវតាមានដូចជាពេជ្រ សោភា,ឱក សុគន្ធកញ្ញា ,នៅ សុនិតា ,រ៉េត សារីតា ,ងិន ម៉ារ៉ាឌី ជាដើមដែលតារាខ្លះពួកគេរៀបចំតុបតែងថតដោយខ្លួនឯងព្រោះជាការស្រលាញ់ និងខ្លះទៀតខាងក្រសួងពាក់ព័ន្ធជ្រើសរើសសម្រាប់ពិធីបុណ្យប្រពៃណីចូលឆ្នាំខ្មែរជាតិ។ចំណែកតារាដែលធ្លាប់គ្រងឈុតអប្សរា វិញមានដូចជាសុគន្ធ និសា ,ណាក់ ស្រីណា ,នី មុនីនាថ ,ម៉ាក សែនសូនីតា ,ថន លក្ខិណា នៅ សុនិតា ,ចន សុទិម៉ា និងដេត ស្រីនាថ និងសឹម ស្រីនិច្ច ជាដើម ។
សម្រាប់ស្រីស្អាតសឹម ស្រីនិច្ច វិញនាងតុបតែងខ្លួនទៅតាមពេលវេលាពោលគឺដូចជានៅពេលទៅឆ្នេរសមុទ្រ គេក៍ធ្លាប់ឃើញនាងលេងខ្លួនជាមួយឈុតប៊ីគីនី ដូចតារាផ្សេងៗទៀតដែរ ។ គេចាំមើលថាតើបុរសរូបណាទៅដែលនឹងក្លាយទៅជាស្វាមីរបស់ស្រីស្អាតសឹម ស្រីនិច្ច ដែលតែងខ្លួនជាទេវតាឆ្នាំថ្មី ព្រះនាងមហោទរាទេវី ?
