ភ្នំពេញ ៖ នារីវ័យក្មេងម្នាក់ខឹងឪពុកចុងបណ្តេញចេញពីផ្ទះបាន២ថ្ងៃតូចចិត្តចង់រត់ចូលរថយន្តប៉ុនប៉ងសម្លាប់ខ្លួនបង្កឲ្យមានការភ្ញាក់ផ្អើលដល់សមត្ថកិច្ចចុះទៅឃាត់យកទៅសួរនាំបានបន្តិច ស្រាប់តែខ្យល់គសន្លប់ស្តូកស្តឹងកាលពីវេលាម៉ោង១០និង៣០នាទី យប់ថ្ងៃទី៧ ខែកុម្ភៈ នៅមុខសាលាបឋមសិក្សាអូដឹម ស្ថិតនៅភូមិអូដឹម សង្កាត់ចោមចៅ ខណ្ឌពោធិ៍សែនជ័យ។
នារីរងគ្រោះមានឈ្មោះ ធារី ហៅ កាំឡៃ អាយុ១៧ឆ្នាំ រស់នៅភូមិកណ្តាលឃុំវត្តអង្គខាង ត្បូងស្រុកបន្ទាយមាសខេត្តកំពត។
តាមប្រភពពត៌មានពីប្រជាពលរដ្ឋបានអោយដឹងថាមុនពេលកើតហេតុគេឃើញនារីខាងលើដើរនៅតាមបណ្តោយផ្លូវជាតិលេខ៤មកដល់ទល់មុខសាលាបឋមសិក្សាអូដឹមស្ថិតនៅក្នុងសង្កាត់ចោមចៅដោយឃើញនារីរូបនោះដើរឆ្លងកាត់ផ្លូវទៅវិញទៅមកហាក់ដូចជាចង់ ដើរចូលរថយន្តឲ្យបុកស្លាប់ ឃើញដូនេះប្រជាពលរដ្ឋបានរាយការណ៍ដល់សមត្ថកិច្ច មកអន្តរាគមន៍និងធ្វើការសួរនាំ ។
ពេលដែលសមត្ថកិច្ចទៅដល់ក៏បាននាំនារីរូបនោះទៅធ្វើការសួរនាំនៅប៉ុស្តិ៍នគរបាលចោមចៅបានបន្តិចដោយនារីរងគ្រោះបាននិយាយប្រាប់ថា នាងត្រូវឪពុកចុងបាន ដេញចេញពីផ្ទះនៅខេត្តកំពតទើបនាងជិះរថយន្តឈ្នួលមកភ្នំពេញ ពេលមកដល់ភ្នំពេញមិនដឹងទៅណាមកទេ ចេះតែដើរទាំងអត់បានហូបបាយទឹក រយៈពេល២ថ្ងៃមកហើយ គ្រាន់តែ សមត្ថកិច្ចឮថាអត់បានហូបបាយរៀបចំទៅទិញបាយ យកមកឲ្យហូបតែមិនទាន់បានទៅទិញផង ស្រាប់តែនារីវ័យក្មេងបនាដួលសន្លប់ស្តូកស្តឹង ។
ភ្លាមៗនោះមានខាងវិទ្យុនិងសមត្ថកិច្ចបានបញ្ជូននារីរងគ្រោះទៅព្យាបាលនៅសម្ភពចោមចៅដឹងខ្លួនហើយត្រូវបានខាងវិទ្យុដឹកនាងយកទៅមណ្ឌលបាត់ទៅ ៕
ថោង ធីម