ភ្នំពេញ៖តារាកំប្លែងលោកបាន សំណាង ហៅពូណុយ ដែលវិត្តន៍ខ្លួនពីតារាតិកតុក នោះពេលនេះបានក្លាយទៅជាកូនកំលោះរបស់ស្រីស្អាតយ៉ែម ស្រីពេជ្រ ហើយពួកគេនឹងដឹកដៃគ្នារៀបការនៅថ្ងៃទី៧ ខែមិថនា ឆ្នាំ២០២៤ ខាងមុខនេះហើយ ។ធៀបការរបស់ណូណុយ -ស្រីពេជ្រ ត្រូវបានតារាជាច្រើនបង្ហោះនៅលើបណ្ដាញសង្គមនៅថ្ងៃទី២៨ មិថុនា ដែលបង្ហាញថាមង្គលការរបស់ពូកគេធ្វើនៅស្ថានីយ៍ទូរទស្សន៍Pnn នៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ចាប់ពីម៉ោង៥រសៀល។
អ្នកយកព័តមានយើងបានទូរស័ព្ទទៅកញ្ញាយ៉ែម ស្រីពេជ្រ នៅរសៀលថ្ងៃទី២៨ ឧសភា តែត្រូវបាននារីម្នាក់លើកជំនួសនិងថាជាជំនួយការរបស់ស្រីពេជ្រ ហើយថាតារាសម្ដែងរូបនេះកំពុងថតមិនអាចនិយាយបានទេ ។ដោយឡែកពូណុយ វិញទូរស័ព្ទចូលជាច្រើនដង ប៉ុន្ដែនាយមិនលើកឡើយនៅថ្ងៃដដែលនេះ ។
យ៉ាងណាមង្គលការរបស់យ៉ែម ស្រីពេជ្រ និងពូណុយ នេះធ្វើឲ្យមានការចាប់អារម្មណ៍ជាច្រើនថាកូនក្រមុំស្អាតពេកហើយ និងខ្លះថាស្ដាយកូនក្រមុំញ៉ែអត់ទាន់ជាដើម…។ប៉ុន្ដែសម្រាប់អ្នកសិល្បៈស្និតតារាទាំងពីរបានសាទរចំពោះគូស្នេហ៍តារា១គូនេះដែលទីបំផុតពួកគេច្បាស់លាស់ជាមួយគ្នារហូតដល់ដឹកដៃគ្នារៀបការតាមប្រពៃណី ដែលខុសពីតារាខ្លះលួចលាក់គ្នាជាច្រើនឆ្នាំ ប៉ុន្ដែមិនហ៊ានរៀបការឡើយ និងមួយចំនួនបានយកកូនមុនរៀបការទៀតផង។
គួរំលឹកថាយ៉ែម ស្រីពេជ្រ ជាអតីតFreshie និងបានក្លាយជាតារាសម្ដែងភាពយន្ដជាច្រើនរឿងមកហើយក្នុងតំណែងជាតួឯកជាបន្ដបន្ទាប់។ស្រីពេជ្រ ក៍ឈានមកចាប់អាជីពជាពិធីការិនីផងដែរទើបជួបដៃគូរបស់នាងគឺលោកបាន សំណាង ហៅពូណុយ ដោយតែងតែនិយាយផ្ដោះផ្ដងគ្នាបែបញ៉ែទៅ ញ៉ែមក ប៉ុន្ដែគេស្មានថានោះគ្រាន់តែជាសកម្មភាពក្នុងឆាកប៉ុណ្ណោះ តែតាមពិតពួកគេស្រលាញ់គ្នាមែនទែន។សម្រាប់ពូណុយ វិញនាយធ្លាប់ប្រាប់អ្នកយកព័តមានយើងថាមុនក្លាយទៅជាអ្នកកំប្លែងល្បីឈ្មោះគូសមនេះនាយប៉ងធ្វើអត្តឃាតសម្លាប់ខ្លួនចំនួន៣លើកមកហើយ តែមិនបានសម្រេច ហើយការក្លាយទៅជាអ្នកកំប្លែងនាពេលនេះគឺខ្មោចឲ្យ។ពូណុយ ថាមូលហេតុដែលនាងធ្លាប់ចង់បញ្ចប់ជីវិតនោះគឺដោយសារតែមានបំណុលជុំទិស គេតាមទារលុយគ្រប់ច្រកល្ហក ទៅដល់ក្រហែងណា ក៍មិនអាចលាក់មុខជិត…។ប៉ុន្ដែពេលនាយចាប់ផ្ដើមលេងតិកតុក ក៍ត្រូវបានគេចាប់អារម្មណ៍រហូតមានគេហៅថតសិល្បៈជាបន្ដបន្ទាប់និងមកដល់បច្ចុប្បន្នដែលនាយគ្មានពេលទំនេរទេ ព្រោះធ្វើជាអ្នកនិពន្ធ ដឹកនាំ និងសម្ដែងរឿងខ្លួនឯងផង។
គេនៅមិនទាន់ដឹងថាតើពូណុយ ជូនថ្លៃទឹកដោះទៅស្រីពេជ្រ ប៉ុន្មាននោះទេ ប៉ុន្ដែតាមព័តមានថាលោកសំណាង រកប្រាក់បានពីសិល្បៈច្រើននារយៈពេលចុងក្រោយ ហេតុនេះលោកមិនខ្លាចចំណាយលុយធំរៀបការជាមួយមនុស្សស្រីជាទីស្រលាញ់របស់លោកឡើយ ។
ក្រៅពីពណុយ-យ៉ែម ស្រីពេជ្រ តារាដែលរៀបការនៅឆ្នាំ២០២៤ នេះមានដូចជាអ្នកនាងលី ម៉ារីណា និងសុវត្ថិឌី ធារិកា ជាដើម ៕
