រាជធានីភ្នំពេញ ៖ ភ្លាមៗបន្ទាប់ពីតារាកំប្លែងនិងជាពិធីករល្បីឈ្មោះ លោកបាន សំណាង ហៅពូណុយ និងតារាសម្តែងនិងជាពិធីការិនីល្បីឈ្មោះ កញ្ញាយ៉ែម ស្រីពេជ្រ បានដើរចែកធៀបការ អញ្ជើញភ្ញៀវអ្នកសិល្បៈ ចូលរួមពិធីមង្គលការរបស់ពួកគេ ដែលគ្រោងធ្វើឡើងនៅថ្ងៃទី០៧ ខែមិថុនា ឆ្នាំ២០២៤ ខាងមុខ នៅស្ថានីយទូរទស្សន៍ PNN ធ្វើឲ្យផ្អើលពិភពសិល្បៈ និងបណ្តាញសង្គមមក ស្រាប់តែមានតារាចម្រៀងប្រុសវ័យក្មេងម្នាក់ បានចេញមុខអះអាងថា ខ្លួនជាសង្សាររបស់កញ្ញាយ៉ែម ស្រីពេជ្រ ហើយបានចោទតារាកំប្លែង ពូណុយ ថា ដណ្តើមសង្សាររបស់ខ្លួន និងបានចោទកញ្ញាយ៉ែម ស្រីពេជ្រ ថាសាវា លួចលាក់ក្បត់រូបខ្លួនទៅរៀបការជាមួយពូណុយ។ ជាមួយគ្នានេះ តារាខកស្នេហ៍រូបនេះ បានចងដៃយ៉ែម ស្រីពេជ្រ ជាមុន នូវចម្រៀងមួយបទ «ព្យុះអើយបោកបក់រោងការចោលទៅ» ផងដែរ។
តារាចម្រៀងវ័យក្មេងដែលចោទកញ្ញាយ៉ែម ស្រីពេជ្រ សាវា និងចោទពូណុយ បំបែកស្នេហារបស់ខ្លួននោះ មានឈ្មោះមីស្ទើរ វ៉ាយ (Mrr White) អាយុជាង២០ឆ្នាំ ជាអ្នកចម្រៀងនៅផលិតកម្មសាន់ដេ ដែលល្បីបទមួយចំនួនដែរ ដូចជាបទ «ញ៉ែនាងបានយកទៅ» «បើដឹងមុនថាសង្សារគេ ខ្ពើមប៉ះ» ជាដើម។
តារាចម្រៀង មីស្ទើរ វ៉ាយ (Mrr White) បានបង្ហោះរូបភាពខ្លួនថតឈុតរៀបការជាមួយកញ្ញាយ៉ែម ស្រីពេជ្រ និងរូបយ៉ែម ស្រីពេជ្រ ជាមួយពូណុយ ព្រមទាំងធៀបការរបស់អ្នកទាំ២ ក្នុងគណនីបណ្តាញសង្គម ហ្វេសប៊ុក របស់ខ្លួន នៅល្ងាចថ្ងៃទី២៩ ខែឧសភា ឆ្នាំ២០២៤ ជាមួយសំណេរថា «ពូណុយ Ban Samnang មកបំបែកស្នេហាខ្ញុំ Yem Srey Pich មនុស្សសាវា អ្នកទាំង២ លួចលាក់ក្បត់ខ្ញុំពីពេលណា?»។
បន្ថែមពីលើសំណេររំលេចចេញពីបេះដូងឈឺចុកចាប់ខាងលើនេះ តារាចម្រៀងវ័យក្មេងខាងលើ បានស៊ែរវីដេអូព័ត៌មានដែលបានដកស្រង់សំណេររបស់ខ្លួនខាងលើទៅផ្សាយ ស្តីពីដំណឹងរៀបការរបស់កញ្ញា យ៉ែម ស្រីពេជ្រ និងពូណុយ ក្នុងគណីហ្វេសប៊ុក របស់ខ្លួនដដែល ជាមួយសំណេរបន្ថែមខ្លីថា « ព្យុះអើយ! បោកបក់រោងការចោលទៅ!»។
បន្ទាប់ពីបានឃើញសំណេររបស់តារាចម្រៀងខកស្នេហ៍ខាងលើ មានអ្នកគាំទ្រ និងមិត្តភក្តិរបស់តារាចម្រៀងរូបនេះ បានចូលមកបញ្ចេញមតិយោបល់ (Comments) ជាច្រើន ជួយលើកទឹកចិត្តឲ្យបំភ្លេចស្នេហ៍ចាស់ដែលរបូតទៅលើដៃតារាកំប្លែង ពូណុយ ទៅហើយនោះទៅ និងអ្នកខ្លះបន្ទោសថា «មកពីយើងស្រឡាញ់គេ មិនមានភាពច្បាស់លាស់ អត់ចូលដណ្តឹងគេ លុះពូណុយ មកក្រោយ គេបាននៅកៀកកិត និងចូលដណ្តឹងបានមុន រឿងអីស្រីពេជ្រ ត្រូវនៅរារែក?»។
យ៉ាងណា ឆ្លើយតបអ្នកខម្មិនថា «ចងដៃឲ្យច្រើនៗទៅអូន លែងឈឺចាប់ហើយ» មីស្ទើរ វ៉ាយ បានសរសេរថា «ចងដៃមួយបទបង ព្យុះអើយបោកបក់រោងការចោលទៅ!»។ ជាមួយគ្នានេះ ឆ្លើយតបខម្មិនរបស់នារីម្នាក់ដែលសរសេរថា «មានទទួលផឹកកំដរសេដគ្រប់កម្មវិធីបង» តារាចម្រៀងខកស្នេហ៍រូបនេះ បានសរសេរតបថា «មកពីអត់លុយនឹង បានគេក្បត់ មានលុយណាផឹកទៀត?»។
ចំណែកការឆ្លើយតបទៅអ្នកគាំទ្រម្នាក់ ដែលខម្មិនថា «បងប្រុសខ្ញុំប៉ុណ្ណឹងដែរ នៅតែគេបោក ចុះទម្រាំដូចខ្ញុំទៀត?» លោកវ៉ាយ បានសរសេរតបថា «គេបោកយើងយកកូនប្រើ»។
ជាមួយគ្នានេះ តារាចម្រៀងខាងលើ ក៏បានស៊ែរឡើងវិញ នូវសំណេររបស់ខ្លួន ដែលបង្ហោះក្នុងទំព័រហ្វេសប៊ុក ផ្ទាល់ខ្លួន កាលពីថ្ងៃទី១៨ ខែមេសា ឆ្នាំ២០២៣ ដែលបញ្ជាក់ពីអត្ថន័យខ្លឹមសារនៃចម្រៀងរបស់ខ្លួនមួយបទ ដែលមានចំណងជើងថា «ញ៉ែនាងបានយកទៅ» ដែលហាក់ដូចជាត្រូវនឹងរៀងពិតរបស់ខ្លួននៅពេលនេះ ដែលមានខ្លឹមសារថា «ស្រលាញ់គ្នា មិនចាំបាច់ទាមទារ ហាមប្រាមគ្រប់ពេលទេ បើគេស្រលាញ់យើង គេមិនចោលយើងទេ ហើយបើគេចង់ក្បត់ ទោះយើងខំថែយ៉ាងណា ក៏គេនៅតែក្បត់ ។ ញ៉ែនាងបានយកទៅ!។»
ទោះបីជាយ៉ាងណា ជុំវិញការបញ្ចេញសារព្រាត់ស្នេហាអតីតសង្សារ ដោយចោទថា ពូណុយបំបែកស្នេហ៍របស់ខ្លួន និងចោទកញ្ញា យ៉ែម ស្រីពេជ្រ សាវា លួចលាក់ក្បត់ខ្លួនទៅរៀបការជាមួយពូណុយ ខាងលើនេះ តារាចម្រៀង មីស្ទើរ វ៉ាយ បានបញ្ជាក់ប្រាប់ «នគរធំ» នៅរសៀលថ្ងៃទី៣០ ខែឧសភា ឆ្នាំ២០២៤ ថា អ្វីដែលលោកបានសរសេរតាមបណ្តាញសង្គមនោះ គឺជាការពិត តែលោកសុំមិនទាន់បកស្រាយទេ។
តារាចម្រៀង មីស្ទើរ វ៉ាយ បានបញ្ជាក់ខ្លីថា «អធ្យាស្រ័យបងប្រុស អាចចុះផ្សាយបានតាមអ្វីដែលបងបានឃើញការផុសរបស់ខ្ញុំបានណាបង តែខ្ញុំសុំអត់ទាន់បកស្រាយអ្វីទាំងអស់។ ខ្ញុំអត់ទាន់ចប់ការងារទេបង»។
ដោយឡែក កញ្ញា យ៉ែម ស្រីពេជ្រ និងលោកបាន សំណាង ហៅពូណុយ មិនអាចសុំការបកស្រាយបំភ្លឺបានទេ កាលពីល្ងាចម្សិលមិញ។
គួរបញ្ជាក់ថា យោងតាមធៀបការ ឬសំបុត្រអញ្ជើញភ្ញៀវ ដែលសិល្បករ សិល្បការិនីជាច្រើ បានបង្ហោះ ក្រោយទទួលបានការអញ្ជើញពីពូណុយ និងយ៉ែម ស្រីពេជ្រ បានបញ្ជាក់ថា លោកបាន សំណាង ហៅពូណុយ និងកញ្ញាយ៉ែម ស្រីពេជ្រ នឹងរៀបការនៅថ្ងៃទី០៧ ខែមិថុនា ឆ្នាំ២០២៤ នៅស្ថានីយទូរទស្សន៍ ភីអិនអិន (PNN) ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។
អ្នកសិល្បៈជាច្រើនរូប បន្ទាប់ពីបានទទួលធៀបការពីពូណុយ និងកញ្ញាយ៉ែម ស្រីពេជ្រ បាននាំគ្នាបង្ហោះព្រាត តាមបណ្តាញសង្គម ប៉ុន្តែក្នុងចំណោមនោះ មានអ្នកខ្លះហាក់មានការចម្លែកចំពោះទីតាំងប្រារព្ធពិធីមង្គលការរបស់តារាសម្តែងមួយគូនេះ ដែលធ្វើនៅស្ថានីយទូរទស្សន៍តែម្តង ដោយសារទទួលបានការឧបត្ថម្ភទីកន្លែងប្រារព្ធពិធី ពីលោកអ្នកឧកញ៉ា លី យ៉ុងផាត់ ព្រោះផ្ទះរបស់ស្រីពេជ្រ តូចចង្អៀតពេក ណាមួយអ្នកទាំង២ ជាបុគ្គលិកល្អរបស់ស្ថានីយទូរទស្សន៍នេះផងដែរ ។
តាមប្រភពអ្នកស្និទ្ធនឹងពូណុយ និងកញ្ញាស្រីពេជ្រ បានបង្ហើបថា ពិធីមង្គលការតារាប្រុស្រីទាំង២ដួងនេះ បានជួលសម្អាងការ «ដាវាត់ហ្គោល» ជាកញ្ចប់ VIP តែម្តង៕ ខៀវទុំ
