ភ្នំពេញ៖និស្សិតឆ្នាំទី២ ផ្នែកគណនេយ្យ និងពន្ធដា នៅវិទ្យាស្ថានជាតិគ្រប់គ្រង កញ្ញាលីន សោម៉ា អាយុ២១ឆ្នាំ បានក្លាយទៅជាម្ចាស់ពានBeat The Best រដូវកាលទី២ កាលពីរាត្រីថ្ងៃទី១ មិថុនា ធ្វើឲ្យនាងទទួលប្រាក់រង្វាន់ចំនួន២៤០០០ដុល្លារ ពីហង្សមាស ។សោម៉ា ដែលមានស្រុកកំណើតនៅខេត្តត្បូងឃ្មុំ ថានាងប្រើរយៈពេល៦ខែ ទើបអាចសម្រេចក្ដីស្រម៉ៃមួយនេះបាន ហើយនាងសង្ឃឹមថាជ័យលាភីនេះនឹងអាចធ្វើឲ្យនាងមានការផ្លាស់ប្ដូរទាំងជីវភាពនិងកេរ្តិ៍ឈ្មោះនាពេលអានាគត។
ក្នុងជំនួបតាមទូរស័ព្ទកាលពីរសៀលថ្ងៃទី៣ មិថុនា ស្រីស្រស់សោម៉ា ថានាងទទួលបានបទពិសោធន៍ច្រើនពីការប្រលងកម្មវិធីមួយនេះហើយនាងបានជួបការពិបាកខ្លាំងក្នុងវិញ្ញាសារបទRock និងញាក់ ប៉ុន្ដែសម្រាប់បទមរតកដើមនាងគ្មានឧបស័គ្គនោះទេ ព្រោះចិត្តស្រលាញ់បទពីដើមៗនិងចូលចិត្តច្រៀងបទទាំងនោះជាងបទសម័យបច្ចុប្បន្ន។យ៉ាងណាសោម៉ា ថាសម្រាប់បទរៀមច្បងដូចជាអ្នកនាងម៉េង កែវពេជ្ជតា,មាស សុខសោភា ,ឱក សុគន្ធកញ្ញា ,ពេជ្រ សោភា និងសុគន្ធ និសា ជាដើមក៍នាងអាចច្រៀងបានដែរ ហើយអ្នកគាំទ្រនាងថាទោះជានាងច្រៀងបទតារាណាក៍ដោយ គឺសម្លេងរបស់នាងនៅតែជានាងដដែល មិនដូចសម្លេងតារាណាម្នាក់ទេ ។
លីន សោម៉ា ថានាងមិនទាន់ដឹងពីពេលវេលាដែលហង្សមាសទម្លាក់បទថ្មីឲ្យនាងច្រៀងនោះទេ ប៉ុន្ដែនាងសប្បាយចិត្តក្នុងការក្លាយទៅជាតារាចម្រៀងផលិតកម្មមួយនេះ និងគ្មានចេតនាចង់ប្រជែងជាមួយតារាណាម្នាក់ទេ គឺមានតែខិតខំប្រឹងប្រែងដោយខ្លួនឯងប៉ុណ្ណោះ ។ដោយឡែកទាក់ទងការសិក្សារវិញនាងថាទោះជាស្រលាញ់អាជីពចម្រៀង យ៉ាងណាក៍នាងនៅតែបន្ដការរៀនឲ្យដល់ចប់គោលដៅដែលខ្លួនបានកំណត់ដែរ ។
លីន សោម៉ា បានយកឈ្នះបេក្ខភាព៣រូបផ្សេងទៀតនៅវគ្គFinal កម្មវិធីBeat The Best រដូវកាលទី២ នោះគឺនាងយ៉ាង ចាន់រតនា ,លោកលីម ឧត្តម និងលោកភុន សុភ័ក្រ ។មុនក្លាយជាម្ចាស់លាភី នាងសោម៉ា ត្រូវបានអ្នកលេងបណ្ដាញសង្គមលើកឡើងថានាងនិងស្វិតស្វាញខ្លាំងជាមួយនាងយ៉ាង ចាន់រតនា ដែលមានសម្ថភាពមិនធម្មតាឡើយ ប៉ុន្ដែទីបំផុត សោម៉ា នៅតែអាចសម្រេចក្ដីសុបិនធំនេះបានតាមរយៈការលើកពានដែលប្រគល់ពីឯកឧត្តមនេត ភត្រា រដ្ឋមន្រ្ដីក្រសួងព័តមាន ។
លីន សោម៉ា ប្រាប់ដែរថានាងជាកូនពៅក្នុងជំណោមបងប្អូន៧នាក់(ស្រី៣)ហើយក្នុងនោះបងប្រុសទី៥របស់នាងម្នាក់ក៍ធ្លាប់ប្រលងចម្រៀងមួយនៅកម្មវិធីមួយរបស់ប៉ុស្ដិ៍បាយ័នផងដែរ ។នាងថាក្រុមគ្រួសារទាំងមូល និងមិត្តភ័ក្រ្ដ បានជម្រុញឲ្យនាងប្រលងកម្មវិធីប្រលងចម្រៀងមួយនេះ ទើបធ្វើឲ្យនាងកាន់តែមានភាពជឿរជាក់និងកំលាំងចិត្តហើយធ្វើបានល្អរហូតក្លាយជាម្ចាស់ពាន ។ដោយឡែកសម្រាប់រឿងស្នេហាវិញស្រីស្រស់សោម៉ា ថានាងនៅទំនេរ ពោលគឺគ្មានសង្សារឡើយ ។
គួររំលឹកថាមុនលើកពានBeat The Best រដូវកាលទី២ នាងលីន សោម៉ា ក៍ធ្លាប់ប្រលងកម្មវិធីCambodian Idol រដូវកាលទី៣ និងកម្មវិធី”ផ្ការីកក្នុងសួន “ និងMaster Singer Cambodia ជាដើម ។ប្រភពបានឲ្យដឹងថាជីវភាពគ្រួសារនាងសោម៉ា មានការលំបាកខ្លាំងហើយឪពុកម្ដាយចេញទៅរកស៊ីខេត្តឆ្ងាយៗដើម្បីយកលុយមកចិញ្ចឹមនិងផ្គត់ផ្គងការសិក្សារដល់កូនៗ ខណៈដែលពេលភ្លៀងខ្លាំងផ្ទះរបស់នាងនៅស្រុកកំណើតត្រូវប្រឈមលេចទឹកខ្លាំងតែម្ដង ។យ៉ាងណាក្រោយលើកពាននេះនាងសោម៉ា អាចនឹងយកប្រាក់រង្វាន់ទៅជួយផ្គត់ផ្គងគ្រួសារ និងការសិក្សាររបស់នាងបានល្អប្រសើរជាងមុនជាមិនខាន ។
សូមបញ្ជាក់ថាម្ចាស់ពានBeat The Best រដូវកាលទី១ គឺលោកសួរ វិចិត្រ ស្របពេលដែលហង្សមាសជ្រើសបានតារាចម្រៀងម្ចាស់ពានពីកម្មវិធីប្រលងចម្រៀងរបស់ខ្លួនសរុប១៣នាក់មកហើយចេញពីកម្មវិធីThe Voice Cambodia ,The Voice Kids Cambodia ,Cambodian Idol ,Cambodian Idol Junior និងBeat The Best ។ចាំមើលលីន សោម៉ា ទើបលើកពានក្ដៅៗអាចដណ្ដើមភាពលេចធ្លោនៅហង្សមាសបានដែរឬអត់?
