ភ្នំពេញ៖តាមរយៈបទកម្សត់ៗមួយចំនួនដែលនាងគង់ ស្រីពេជ្រ ហៅពេជ្រ សូលីកា បង្ហោះនៅលើតិកតុក គេឃើញនាងហាក់ដូចជានៅអាលោះអាល័យអតីតគូដណ្ដឹងលោកគឹម ហាន ក្រោយចែកផ្លូវគ្នាអស់រយៈពេល២ឆ្នាំមកនេះ ហើយពេលខ្លះនាងចូលតួទៅតាមអត្ថន័យបទចម្រៀងស្ទើតែស្រក់ទឹកភ្នែកទៀតផងតាមរយៈការច្រៀងLive Band ។ចំណែកFan របស់ស្រីពេជ្រ ភាគច្រើនចង់ឲ្យនាងនិងឪពុកកូនប្រុសនាងវិលទៅត្រូវរ៉ូវគ្នាវិញ ប៉ុន្ដែសូលីកា នៅរក្សារភាពស្ងៀមស្ងាត់អត់បានសន្យាអ្វីទាំងអស់ ព្រោះថារឿងនោះអាចកើតឡើងទៅបានដោយសារតែមានការព្រមព្រៀងគ្នាទាំងសងខាងទើបអាចទៅរួច មិនមែននាងចង់តែអតីតគូដណ្ដឹងថាNO អាចផ្សះផ្សាស្នេហ៍បានទេ។
គេកត់សម្គាល់ដែរថាអំឡុងពេលដែលពេជ្រ សូលីកា នៅបង្ហាញសញ្ញានឹកដល់អតីតប្ដីនេះដែរ ចំណងស្នេហានាងជាមួយបុរសថ្មីកូនកាត់ចិន ដែលនាងធ្លាប់បង្ហាញមួយប្រាវតាមIG កន្លងមកនោះក៍បានស្ងាត់ទៅវិញផងដែរ ពោលគឺគ្មានសញ្ញាស្អិតល្មូតថែមទៀតនោះទេ ទើបនាំឲ្យមានការសង្ស័យពួកគេមិនទាន់ច្បាស់លាស់ជាមួយគ្នានោះទេ ។ចំណែកអតីតប្ដីសូលីកា វិញតាមព័តមានថាលោកហាន មានគូស្នេហ៍ថ្មីតាំងពីក្រោយចែកផ្លូវជាមួយស្រីពេជ្រ ភ្លាមៗកាលពីឆ្នាំ២០២២ ម្លេះ ដែលពេលខ្លះអាណិកជនខ្មែរនៅអូស្រា្ដលីរូបនេះថែមទាំងបណ្ដើរសង្សារថ្មីទៅមើលការច្រៀងសម្ដែងរបស់ស្រីពេជ្រ នៅតាមPub ខ្លះទៀតផង។
ពេជ្រ សូលីកា បានភ្ជាប់ពាក្យជាមួយលោកគឹម ហាន ថ្ងៃទី២៥ ខែ១០ ឆ្នា២០១៩ នឹងគ្រោងរៀបការនៅឆ្នាំ២០២០ តែបានពន្យាពេលព្រោះពេលនោះកូវីដផ្ទុះខ្លាំងពេក។ប៉ុន្ដែនៅពាក់កណ្ដាលឆ្នាំ២០២២ សូលីកា និងលោកហាន បានចែកផ្លូវគ្នាដោយបន្សល់ចំណងដៃកូនប្រុសមួយហើយទោះជាពេលនេះអ្នកទាំងពីរមិនអាចរស់នៅជីវិតជាប្ដីប្រពន្ធគ្នាដូចមុនក្ដី តែពួកគេមិនយកគ្នាជាសត្រូវឡើយ និងថែមទាំងមិនដែលហែកហួរគ្នានៅលើបណ្ដាញសង្គមដូចគូស្នេហ៍ខ្លះដែលលែងគ្នាហើយតែងតែព្យាយាមរកត្រូវរៀងៗខ្លួន ។ប៉ុន្ដែសូលីកា បានបរាជ័យរឿងចង់ធ្វើកូនក្រមុំមែនទែន និងចង់ចេញទៅរស់នៅអូស្រា្ដលី ហើយរឿងដែលនាងរងវិបត្តិផ្លូវចិត្តធំបំផុតនោះគឺម្ដាយនាងអ្នកស្រីស៊ិន ស្រីនាង ត្រូវជាប់គុកដល់ទៅ១២ឆ្នាំ ពាក់ព័ន្ធរឿងធ្វើឃាតអតីតគូស្នេហ៍ភេទដូចគ្នាកាលពីដើមឆ្នាំ២០២០ ។សូលីកា ដែលជីវិតស្នេហាក៍មិនសមតាមបំណង ម្ដាយក៍ត្រូវជាប់គុកនោះពេលខ្លះនាងរីករាយតែនៅលើឆាកតន្រ្ដីប៉ុណ្ណោះ តែនៅក្រៅឆាកនាងយំម្នាក់ឯង។
ទោះជាយ៉ាងណាតាមរយៈរូបសម្រស់នៅតែគួរឲ្យបេតីនេះអ្នកមេម៉ាយគង់ ស្រីពេជ្រ នៅតែមានទីផ្សារចម្រៀង ថ្វីត្បិតតែនាងមិនស្ថិតក្នុងចំណោមតារាដែលអាចឈានទៅប្រជែងតំណែងតារាស្រីលំដាប់ជូរមុខរបស់ហង្សមាសក្ដី ។ចំណុចពិសេសរបស់តារាកូន១រូបនេះគឺនាងរក្សាររូបឆោមមិនឲ្យធ្លាក់ចុះខ្លាំងតាមរយៈរូបរាងនៅស្វែល មិនសូវបែកសាច់ ព្រមទាំងពេលខ្លះលេងខ្លួនកាន់តែឆើតឆាយលើសមុនថែមទៀតផង។
អ្នកជំនាញសិល្បៈបានលើកឡើងថាភាគច្រើនតារាល្បីៗក្រោយបែកបាក់ស្នេហាចាស់ពួកគេមិនទុកបេះដូងឲ្យនៅទំនេរយូរខែឆ្នាំដូចអ្នកខាងក្រៅសិល្បៈឡើយ គឺខ្លះបែកភ្លាម មានថ្មីភ្លែតក៍មានដែរ ។សម្រាប់នាងស្រីពេជ្រ វិញគេជឿរថាពេលនេះបេះដូងនាងក៍មិនមែនទំនេរដែរ ព្រោះមានបុរសទាំងក្នុងនិងក្រៅស្រុកចាំត្រងនាង ហេតុនេះមេម៉ាយកូន១ស្រួយដូចដូងដុតរូបនេះនៅតែមានហាងឆេងស្នេហ៍។
ក្រៅពីពេជ្រ សូលីកា តារាដែលធ្លាក់ខ្លួនមេម៉ាយហើយនៅយីអ៊ុនល្អក្នុងសិល្បៈមានដូចជាពេជ្រ សោភា ,សុខ សោម៉ាវត្តី និងកែវ និសា ជាដើម ។ចំពោះស្រីពេជ្រ វិញតាមព័តមានថាបើទោះជាថៅកែហង្សមាសគ្មានសញ្ញាផ្ដល់តំណែងធំឲ្យនាងធ្វើជាគណៈកម្មការ ឬគ្រូបង្វឹគការប្រលងចម្រៀងធំៗដូចតារាផ្សេងៗទៀតរបស់ខ្លួនក្ដី ប៉ុន្ដែនាងនៅតែមានឱកាសធ្វើជាតួឯកភាពយន្ដរបស់ផលិតកម្មនេះនៅឡើយ ។ប៉ុន្ដែស្រីពេជ្រ មិនទាន់មានដៃគូចម្រៀងពិតប្រាកដនោះទេទាំងចម្រៀងនិងភាពយន្ដ ព្រោះរយៈពេលចុងក្រោយនេះនាងកាន់តែរយាលៗពីនីកូ និងលោកភិទិ ៕
