ភ្នំពេញ៖តារាមានសម្រស់ដ៍ស្រស់សោភាកញ្ញាសុគា គីមលាង ហៅKon Ant ត្រូវបានគេចាប់អារម្មណ៍ខ្លាំងថារូបរាង ទេពកោសល្យរបស់នាងសាកសមបំផុតក្នុងការប្រលងបវរកញ្ញា ព្រោះមិនត្រឹមតែស្អាតនោះទេ ប៉ុន្ដែអត្តចឬក ចំណេះដឹង និងការស្លៀកពាក់របស់នាងគឺជាអ្នកសិល្បករថ្លៃថ្នូរម្នាក់ អាចជាគំរូគេបាន ហើយកន្លងមកនាងធ្លាប់បានផ្សព្វផ្សាយអរិយធ័ម វប្បធ័មខ្មែរ ទៅកាន់ពិភពលោកទៀតផង។ប៉ុន្ដែរហូតមកដល់ពេលនេះគ្មានដំណឹងថាកញ្ញាគីមលាង ចូលរួមប្រកួតបវរកញ្ញាឲ្យកម្មវិធីណាមួយនោះទេ ទើបធ្វើឲ្យFan ស្ដាយសម្ថភាពរបស់នាងថាលាក់សម្រស់ដល់ណាទៀត ?
ក្នុងជំនួបតាមទូរស័ព្ទកាលពីថ្ងៃទី៥ មិថុនា ស្រីស្អាតសុគា គីមលាង បានឲ្យដឹងថានាងពិតជាគ្មានគម្រោងចូលរួមប្រលងបវរកញ្ញាតាមក្រុមហ៊ុន ឬវេទិការណាមួយនោះទេ ហើយជំហរនេះនាងថានឹងមិនមានការប្រែប្រួលឡើយ។កញ្ញាគីម លាង រហ្ស័សនាម Kon Ant ឬកូនស្រមោច ថាចំពោះមូលហេតុនោះគឺដោយសារតែបើចូលរួមប្រលងបវរកញ្ញាគេចមិនផុតពីការបង្ហាញភាពស៊ិចស៊ីនោះទេ ដូចជាគេតម្រូវឲ្យស្លៀកឈុតប៊ីគីនី ជាដើមតាមវគ្គខ្លះ ហេតុនេះនាងមិនអាចធ្វើបានឡើយព្រោះជាគោលការណ៍ផ្ទាល់ខ្លួនរបស់នាងមិនអាចបង្ហាញឬសម្ដែងស៊ិចស៊ីដាច់ខាត ដោយសារតែបច្ចុប្បន្ននាងជាគ្រូបង្រៀនកម្រិតមធ្យមនៅសាលាវិចិត្រសិល្បៈផ្នែករបាំបុរណា និងរបាំព្រះរាជទ្រព្យ ហេតុនេះចង់រក្សារអ្វីដែលជាជំនាញរបស់ខ្លួនឲ្យបាន បើទោះជាពេលនេះផ្នែកបុរាណរបស់នាងខ្លះបានវិវត្តន៍មកសម័យក៍ដោយ។
សុគា គីមលាង ថ្លែងថា”អ្នកគាំទ្រចេះតែជម្រុញឲ្យខ្ញុំចូលប្រលងបវរកញ្ញាដែរ ប៉ុន្ដែចិត្តខ្ញុំអត់មានចង់ចូលរួមផ្នែកនេះទេ ព្រោះខ្ញុំនឹងមិនធ្វើការងារណាដែលបង្ហាញភាពស៊ិចស៊ីទេ រួមទាំងការថតភាពយន្ដផងដែរ។ខ្ញុំជាគ្រូបង្រៀនម្នាក់ផ្នែករបាំបុរណនិងរបាំព្រះរាជទ្រព្យ អីចឹងមិនអាចទៅធ្វើអ្វីផ្ទុយពីអ្វីដែលយើងកំពុងតែមាននេះបានទេ “។
កញ្ញាសុគា គីមលាង អាយុ២៥ឆ្នាំ កម្ពស់១,៧០ ម៉ែត្រ ទម្ងន់៥០គ.ក្រ ក៍បានប្រាប់ដែរថារូបសម្រស់របស់នាងរក្សាររបស់ធម្មជាតិ១០០% តែម្ដងពោលគឺគ្មានការកែកុននៅត្រង់ផ្នែកណាមួយឡើយ។ការចេញមុខបំភ្លឺរឿងនេះក្រោយមានការសង្ស័យថាគីមលាង ធ្វើច្រមុះ និងចាក់ចង្កា តែពេលនេះនាដការីរូបនេះ នោះជាបច្ចេកទេសនៃការផាត់មុខ(Make Up )របស់នាងប៉ុណ្ណោះ តែជាក់ស្ដែងនាងមិនបានកែសម្រស់ត្រង់ចំណុចឬផ្នែកណាមួយនៅឡើយ ។
កញ្ញាសុគា គីមលាង បានចូលហាត់របាំបុរាណ និងរបាំព្រះរាជទ្រព្យតាំងពីនាងមានអាយុ៩ឆ្នាំម្លេះ ហើយនាងបានចេញបង្រៀនគេវិញនៅឆ្នាំ២០១៨ ដែលឆ្នាំនេះហើយដែលនាងក៍ឈានមកបង្ហាញស្នាដៃក្នុងសិល្បៈជាបន្ដបន្ទាប់ផងដែរតាមរយៈការថតស្ពត,MV និងសំអាងការមួយចំនួន។វីដេអូដែលកញ្ញាគីមលាង ទទួលបានការចាប់អារម្មណ៍បំផុតគឺនាងតែងខ្លួនជាអប្សរា ហើយរាំរបាំអប្សរា នៅលើភ្នំទឹកកកមួយកម្ពស់៣គីឡូពីដីនៅប្រទេសនូវែលសេឡង់ កាលពីឆ្នាំ២០២៣ ដែលត្រូវបានសម្ដេចធិបតីហ៊ុន ម៉ាណែត យកទៅបង្ហោះនៅលើហ្វេសបុកលោកផងដែរ។ចំណែកអ្នកលេងបណ្ដាញសង្គមក៍ចាប់អារម្មណ៍ខ្លាំងផងដែរនៅពេលដែលនាដការីរូបនេះធ្លាប់ត្រូវបានជ្រើសសម្ដែងជាតួទេពធីតា ឆ្នាំថ្មី ក្នុងពិធីអង្គរសង្រ្កាន្ដឆ្នាំ២០២៣ នៅខេត្តសៀមរាប រួមទាំងនាងបង្ហាញធ្វើជាអ្នករាំក្បាលទូក ក្នុងពិធីបុណ្យអុំទូក នៅខេត្តសៀមរាប ឆ្នាំ២០២៣ ។គីមលាង ក៍ធ្លាប់ថតផ្សព្វផ្សាយពីការប្រកួត”អ្នកលេងគុន” ដែលនាងតែងខ្លួនជាអ្នកចម្បាំងសម័យបុរាណ ដើម្បីផ្សព្វផ្សាយពីក្បាច់គុនបុរាណខ្មែរ តាមឆន្ទៈរបស់ខ្លួន ។ចំណែកថ្មីៗនេះកញ្ញាគីមលាង ថាបានថតរឿងអប់រំបែបព្រះពុទ្ធសាសនា”ព្រះពិក្ខុពនេចរ” ក្រោមការផ្ដល់ឱវាទរបស់ព្រះអង្គគូ សុភាព ឧបត្ថម្ភដោយស្រីអូន ។ កាលពីថ្ងៃទី៥ មិថុនា នេះដែរស្រីស្អាតគីមលាង ក៍បានថតស្ពតធំ១បង្ហាញពីរថយន្ដទំនើបម៉ាកRange Rover 2024 ផងដែរ ខណៈដែលនាពេលដ៍ខ្លីខាងមុខនេះនាងក៍ត្រៀមថតភាពយន្ដដុំ១ឲ្យផលិតកម្មLD ទៀតផង បន្ទាប់ពីនាងមិនទទួលថតសម្ដែងរឿងជាច្រើនមកហើយ។
នាដការីរបាំសុគា គីមលាង បន្ថែមថា”មានផលិតកម្មនិងខាងទូរទស្សន៍ជាច្រើន ទាក់ទងចង់ឲ្យខ្ញុំថតរឿងគាគ ប៉ុន្ដែខ្ញុំអត់ទទួលព្រោះការលេងរឿងភាគចំណាយពេលច្រើន ហើយខ្ញុំគ្មានពេលវេលាគ្រប់គ្រាន់ឲ្យគាត់ ។ប៉ុន្ដែខ្ញុំអាចថតរឿងដុំ រឿងខ្លីៗបាន ដូចជាពេលនេះត្រៀមថតរឿង១ឲ្យLd ។តែភាពយន្ដទាំងនោះបើមានឈុតឆាកស៊ិចស៊ី ខ្ញុំអត់ទទួលសម្ដែងទេ ព្រោះនេះជាឆន្ទៈរបស់ខ្ញុំជាយូមកហើយ”។
សុគា គីមលាង ដែលមានសម្រស់គួរឲ្យគយគន់នេះថានាងនៅមិនទាន់មានគូស្នេហ៍ឡើយ គិតត្រឹមឆ្នាំ២០២៤ ។នាងមានបងប្អូន៥នាក់(ស្រី៣)ក្នុងនោះនាងជាកូនច្បង ហើយក៍មានប្អូនស្រីនាងម្នាក់ទៀតដែរជានាដការីរបាំ ដូចនាងដែរ ។គេចាំមើលថាបុរសរូបណាទៅមានសំណាងបានបេះដូងនាដការីរបាំដ៍ស្រស់សោភា រូបនេះ ?
