ភ្នំពេញ ៖ បុរសម្នាក់ស្រវឹងស្រាជោគជាំជិះម៉ូតូបុកម៉ូតូសិស្សសាលា២នាក់មិនទទួលខុស ត្រូវលើកម៉ូតូបើករត់ប៉ុន្តែស្រវឹងខ្លាំងពេកដួលម្តងទៀតរងរបួសធ្ងន់ កាលវេលាម៉ោង ៨យប់ថ្ងៃទី៩ ខែកុម្ភៈតាមបណ្តោយផ្លូវជាតិលេខ៤ទល់មុខវត្តកំបូល ស្ថិតនៅភូមិផ្សារ
កំបូល សង្កាត់កំបូលខណ្ឌពោធិ៍សែនជ័យ។
ម៉ូតូបង្កម៉ាកហុងដាឌ្រីម សេរ៊ី២០១៤ពណ៌ខ្មៅ ពាក់ស្លាកលេខ ភ្នំពេញ1CQ 2257បើកបរដោយបុរសម្នាក់ក្នុងស្ថានភាពស្រវឹងទិសដៅពីកើតទៅលិច។ចំណែកម៉ូតូរងគ្រោះម៉ាកហ្វីណូពណ៌ខ្មៅពាក់ស្លាកលេខ ភ្នំពេញ1AG 0270បើកបរដោយយុវសិស្សស្រី២នាក់ទិសដៅស្របគ្នា។
តាមប្រភពពត៌មានពីប្រជាពលរដ្ឋបាននិយាយប្រាប់ថាមុនពេលកើតហេតុគេឃើញយុវសិស្ស២នាក់ជិះម៉ូតូហ្វីណូបើកបរក្នុងទិសដៅពីកើតទៅលិចលុះបើកមកដល់ចំណុះកើតហេតុស្រាប់តែឃើញម៉ូតូបង្កម៉ាកហុងដាឌ្រីមមួយគ្រឿងទៀតបើកស្របគ្នាបើកបរដោយបុរសម្នាក់ក្នុងស្ថានភាពស្រវឹងបានបើកបុកម៉ូតូរងគ្រោះបណ្តាលអោយដួលរងរបួសស្រាលរៀងៗខ្លួនបន្ទាប់មកភាគីបង្កបានលើកម៉ូតូបើករត់ចេញបានបន្តិចតែសភាពស្រវឹងទោទន់ពេកបានរេចង្កូតដួលម្តងទៀតបណ្តាលអោយរងរបួសធ្ងន់បែកមុខបែកមាត់សន្លប់ស្តូកស្តឹង។
ក្រោយពេលកើតហេតុជនរងគ្រោះជាសិស្សខាងលើបានទៅសំរាកព្យាបាលនៅគ្លីនិកជិតកន្លែងកើតហេតុចំណែកបុរសស្រវឹងជិះបោកនឹងថ្នល់ខាងលើត្រូវរថយន្តសង្គ្រោះគ្លីនិកហុងហាក់ដឹកយកទៅព្យាបាលផងដែរ រីឯម៉ូតូទាំង២គ្រឿងត្រូវបានជំនាញចរាចរណ៍ខណ្ឌ ធ្វើការ វាស់វែងយកទៅរក្សាទុកដើម្បីរងចាំការដោះស្រាយ៕
ថោងធីម