ខេត្តបាត់ដំបង ៖ បុរសជាគ្រូបង្រៀនល្មោភកាមម្នាក់ បានធ្វើសកម្មភាពចាប់សិស្សស្រីរបស់ ខ្លួនរំលោភសេពសន្ថវៈ រហូតបានសម្រេចដល់ ទៅ២ដង និងព្យាយាមសម្លុតគំរាមក្មេងស្រីរងគ្រោះ កុំឱ្យនិយាយប្រាប់អ្នកណាដាច់ខាត ទីបំផុតរឿងរ៉ាវត្រូវបែកធ្លាយ ក៏ត្រូវឪពុកម្តាយ ក្មេងស្រីរងគ្រោះ ដាក់ពាក្យប្តឹងឱ្យសមត្ថកិច្ច ចាប់ឃាត់ខ្លួនយកទៅចាត់ការតាមច្បាប់។
ករណីគ្រូបង្រៀនរំលោភសេពសន្ថវៈលើ សិស្សស្រីខ្លួនឯងដល់ទៅ២ដងនេះ បានកើត មានឡើងតាំងពីអំឡុងខែមករា ឆ្នាំ២០១៧ មកម៉្លេះ នៅចំណុចផ្ទះជនសង្ស័យជាគ្រូបង្រៀន ស្ថិតក្នុងភូមិដូង ឃុំឈើទាល ស្រុកបាណន់ តែ រឿងរ៉ាវទើបនឹងបែកធ្លាយ និងត្រូវសមត្ថកិច្ច ចុះចាប់ខ្លួនគ្រូបង្រៀនល្មោភកាមខាងលើបាន កាលពីវេលាម៉ោង៩និង៣០នាទីព្រឹក ថ្ងៃទី១០ ខែកុម្ភៈ ឆ្នាំ២០១៧ នៅចំណុចផ្ទះរបស់ជនសង្ស័យតែម្តង។
ជនសង្ស័យដែលចាប់រំលោភសេពសន្ថវៈ ក្មេងស្រីរូបនេះ មានឈ្មោះព្រំ សុភាព ហៅភើ អាយុ៤៥ឆ្នាំ មុខរបរគ្រូបង្រៀននៅសាលាបឋមសិក្សាភូមិដូង មានលំនៅក្នុងភូមិកើតហេតុ ខាងលើ។ ចំណែកក្មេងស្រីរងគ្រោះ មានអាយុ ១៣ឆ្នាំ មុខរបរសិស្សសាលាបឋមសិក្សាភូមិដូង មានលំនៅក្នុងភូមិកើតហេតុខាងលើជាមួយគ្នា។
តាមសម្តីក្មេងស្រីរងគ្រោះ បានរៀបរាប់ ប្រាប់ថា នាងធ្លាប់ត្រូវជនសង្ស័យជាគ្រូបង្រៀន រូបនេះ ចាប់រំលោភរហូតដល់បានសម្រេចចំនួន ២ដងរួចមកហើយ កាលពីអំឡុងខែមករា ដើម ឆ្នាំ២០១៧។ ដោយលើកទី១ កាលពីវេលា ម៉ោង៩ព្រឹក ថ្ងៃទី១៩ ខែមករា ឆ្នាំ២០១៧ ខណៈដែលនាងទៅរៀនគួនៅផ្ទះជនសង្ស័យ ក៏ត្រូវជនសង្ស័យចាប់រំលោភសេពសន្ថវៈរហូត ដល់បានសម្រេចតែម្តង។ បន្ទាប់មក នៅវេលា ម៉ោង១១ព្រឹក ថ្ងៃទី៣០ ខែមករា ឆ្នាំ២០១៧ ជនសង្ស័យក៏ចាប់នាងរំលោភសេពសន្ថវៈរហូត ដល់បានសម្រេចជាលើកទី២ទៀត។
ក្មេងស្រីរងគ្រោះ បញ្ជាក់ថា ក្រោយពី ចាប់រំលោភសេពសន្ថវៈនាងរួចម្តងៗ ជនសង្ស័យ តែងសម្លុតគំរាមនាងសព្វបែបយ៉ាង តាំងពីគំរាម ថា នឹងឱ្យនាងរៀនធ្លាក់ ឬក៏សម្លាប់នាងចោល តែម្តង ប្រសិនបើនាងហ៊ានទម្លាយរឿងរ៉ាវនេះ ឱ្យអ្នកណាម្នាក់បានដឹង ពិសេសឪពុកម្តាយរបស់ នាង។ ចំណែកនាងដោយខ្លាចការគំរាមកំហែង របស់ជនសង្ស័យ ទើបចេះតែទ្រាំលាក់បាំងរឿង នេះតែម្នាក់ឯងរហូតមក។ ប៉ុន្តែមកដល់ថ្ងៃទី១០ ខែកុម្ភៈ ឆ្នាំ២០១៧ ដោយសារតែឪពុកម្តាយ នាងសង្ស័យ ក៏ហៅនាងឈ្លេចសួរនាំ រហូតដល់ នាងលាក់បាំងតទៅទៀតលែងបាន ក៏ទម្លាយ ប្រាប់ឪពុកម្តាយគ្មានសល់ថា នាងត្រូវគ្រូបង្រៀន ចាប់រំលោភបានសម្រេចដល់ទៅ២ដងឯណោះ។
ក្រោយពីដឹងថា កូនស្រីរបស់ខ្លួនត្រូវគ្រូ– បង្រៀនល្មោភកាមចាប់រំលោភសេពសន្ថវៈ ឪពុកម្តាយក្មេងស្រីរងគ្រោះ ក៏ប្រញាប់នាំកូន– ស្រីទៅដាក់ពាក្យបណ្តឹងនៅប៉ុស្តិ៍នគរបាលឈើទាល ដើម្បីឱ្យសមត្ថកិច្ចជួយអន្តរាគមន៍ រហូត ឈានដល់ការចាប់ឃាត់ខ្លួនជនសង្ស័យនាំយក ទៅសាកសួរ។
នៅចំពោះមុខសមត្ថកិច្ច ជនសង្ស័យបាន សារភាពថា ខ្លួនពិតជាបានចាប់រំលោភក្មេងស្រី រងគ្រោះរហូតដល់បានសម្រេចចំនួន២ដង ដូច អ្វីដែលនាងបានប្តឹងចោទប្រកាន់ប្រាកដមែន។
ជនសង្ស័យត្រូវបានសមត្ថកិច្ចរៀបចំកសាង សំណុំរឿង បញ្ជូនខ្លួនទៅកាន់សាលាដំបូងខេត្ត បាត់ដំបង ដើម្បីចាត់ការបន្តតាមនីតិវិធី៕