ភ្នំពេញ ៖ បុរស២នាក់ កំពុងជិះម៉ូតូសុខៗ ស្រាប់តែបែកកង់ ទើបនាំគ្នាចុះបណ្តើរសំដៅរក កន្លែងប៉ះ ស្រាប់តែត្រូវក្មេងស្ទាវមួយក្រុម ស្ទាក់ ដេញកាប់ និងគប់ដុំថ្មដាក់ ធ្វើឱ្យជនរងគ្រោះ ទាំង២នាក់ភ័យរត់ចោលម៉ូតូ ទើបធ្វើឱ្យក្រុម ក្មេងស្ទាវឃើញឱកាសល្អ ក៏ប្លន់យកម៉ូតូជិះទាំង បែកកង់ គេចខ្លួនបាត់ដោយសុវត្ថិភាព។
ករណីចោរប្លន់ម៉ូតូបែកកង់នេះ បានកើត ឡើង កាលពីវេលាម៉ោង១និង៣០នាទីរំលង អធ្រាត្រ ឈានចូលថ្ងៃទី១១ ខែកុម្ភៈ ឆ្នាំ២០១៧ នៅតាមបណ្តោយផ្លូវលេខ២០១១ ចំណុចមុខ ក្លោងទ្វារចូលភូមិគោកឃ្លៀង សង្កាត់ភ្នំពេញថ្មី ខណ្ឌសែនសុខ។
ជនរងគ្រោះជាម្ចាស់ម៉ូតូ ដែលត្រូវចោរ ដេញវាយប្លន់យកទៅបាត់នោះ មានឈ្មោះទិន រតនា អាយុ៣២ឆ្នាំ មុខរបរបើករថយន្តស្ទូច ស្នាក់នៅម្តុំជិតអធិការដ្ឋាននគរបាលខណ្ឌសែនសុខ ស្ថិតក្នុងសង្កាត់ភ្នំពេញថ្មី ខណ្ឌសែនសុខ និងមានស្រុកកំណើត នៅភូមិព្រៃស្វាយ ឃុំ ពន្សាំង ស្រុកអង្គស្នួល ខេត្តកណ្តាល។ ចំណែក ម៉ូតូដែលបាត់បង់ ម៉ាកហុងដា ឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ 1CY-4318។
តាមសម្តីបុរសរងគ្រោះ បានរៀបរាប់ ប្រាប់ថា នៅមុនពេលកើតហេតុ គាត់ទើបនឹង ត្រឡប់មកពីយករថយន្តស្ទូច ទៅដាក់ជួសជុល នៅយានដ្ឋានមួយ ម្តុំរង្វង់មូលចោមចៅ រួចក៏ ជិះម៉ូតូបំណងត្រឡប់ទៅផ្ទះថៅកែរថយន្តស្ទូច នៅម្តុំអធិការដ្ឋាននគរបាលខណ្ឌសែនសុខ ដោយ មានអ្នករួមការងារជាមួយគាត់ម្នាក់ទៀត រួម ធ្វើដំណើរជាមួយផង។ លុះពេលជិះមកដល់ ចំណុចផ្លូវរទេះភ្លើង ស្រាប់តែម៉ូតូបែកកង់ក្រោយ ទើបពួកគាត់ទាំង២នាក់ បាននាំគ្នាចុះបណ្តើរ បំណងរកកន្លែងប៉ះកង់ម៉ូតូ។
ប្រភពដដែលបន្តថា លុះពេលពួកគាត់ បណ្តើរម៉ូតូ ទៅដល់ចំណុចកើតហេតុខាងលើ ស្រាប់តែលេចមុខក្មេងស្ទាវមួយក្រុម មានគ្នា ៤នាក់ ជិះម៉ូតូ២គ្រឿង ម៉ាកនិក ពណ៌ខៀវមួយ គ្រឿង និងម៉ាកហុងដា ឌ្រីម សេ១២៥ ពណ៌ខ្មៅ មួយគ្រឿង មិនចាំស្លាកលេខដូចគ្នា និងប្រដាប់ ដោយដុំថ្ម ព្រមទាំងកាំបិត បានព្រួតគ្នាដេញកាប់ និងគប់ដុំថ្មដាក់ពួកគាត់ ធ្វើឱ្យគាត់ជាម្ចាស់ម៉ូតូ រងរបួសរយះមុខខាងស្តាំ និងហើមថ្ពាល់។ ភ្លាម នោះ ដោយខ្លាចក្រុមជនសង្ស័យកាប់ស្លាប់ ពួកគាត់ក៏នាំគ្នារត់ចោលម៉ូតូ ស្រាប់តែក្រុមជនសង្ស័យឃើញឱកាសល្អ ក៏នាំគ្នាលើកម៉ូតូរបស់ គាត់ជិះទាំងបែកកង់ រត់គេចខ្លួនបាត់ស្រមោល អស់តែម្តង។
ក្រោយកើតហេតុ ជនរងគ្រោះបានទាក់ទង ប្រាប់សមត្ថកិច្ចឱ្យចុះមកជួយអន្តរាគមន៍ ប៉ុន្តែ ចាំអស់រយៈពេលជិត១ម៉ោង មិនឃើញមាន សមត្ថកិច្ចមកដល់កន្លែងកើតហេតុ ធ្វើឱ្យជន– រងគ្រោះអស់សង្ឃឹម ក៏ឡើងជិះម៉ូតូឌុបត្រឡប់ ទៅព្យាបាលរបួសសិន ចាំព្រឹកទើបទៅដាក់ពាក្យ បណ្តឹងនៅប៉ុស្តិ៍នគរបាលតែម្តង៕ សោល វណ្ណៈ