ខេត្តកណ្តាល ៖ បុរសម្នាក់ បាននាំប្រពន្ធ កូនជិះទូកចេញទៅសាមងយកត្រី សម្រាប់ យកមកធ្វើម្ហូបខ្លះទុកលក់ដូរខ្លះគ្រាន់បានប្រាក់ កម្រៃចិញ្ចឹមជីវិត ស្រាប់តែអសកុល ពេលកំពុង សាមងសុខៗបុរសជាប្តី ស្រាប់តែងងឹតមុខធ្លាក់ ចូលទឹកបឹង និងត្រូវបានប្រពន្ធកូនចុះជួយស្រង់ ឡើងមកលើគោក រួចប្រញាប់បញ្ជូនទៅកាន់ មន្ទីរពេទ្យដែរ តែអកុសល ជនរងគ្រោះបាន ដាច់ខ្យល់ស្លាប់តាមផ្លូវយ៉ាងអាណោចអាធ័ម។
ករណីខាងលើនេះ បានកើតឡើង កាល ពីវេលាម៉ោង១០ព្រឹក ថ្ងៃទី១១ ខែកុម្ភៈ ឆ្នាំ ២០១៧ នៅចំណុចបឹងធំ ស្ថិតក្នុងភូមិរកា ឃុំ ក្រាំងយ៉ូវ ស្រុកស្អាង។
បុរសរងគ្រោះ មានឈ្មោះទីត ចយ អាយុ ៤៥ឆ្នាំ មុខរបរកសិករ និងនេសាទ មានប្រពន្ធ ឈ្មោះមន សៀន និងមានលំនៅក្នុងភូមិអម្ពិល- លាស់ ឃុំក្រាំងយ៉ូវ ស្រុកស្អាង។
តាមសម្តីស្ត្រីជាប្រពន្ធជនរងគ្រោះ បាន រៀបរាប់ប្រាប់ថា នៅមុនពេលកើតហេតុ ប្តី របស់គាត់ បាននាំប្រពន្ធកូនចេញទៅសាមង ដោយជិះលើទូកមួយ លុះពេលកំពុងឈ្ងោក សាមងក្នុងបឹង ស្រាប់តែប្តីរបស់គាត់ មិនដឹង ជាយ៉ាងម៉េចក៏ដាំដូងធ្លាក់ចូលទឹកទាំងកំរោល តែម្តង។ ភ្លាមនោះ គាត់និងកូន បាននាំគ្នាស្ទុះ ចុះទៅជួយស្រង់ប្តីឡើងមកលើទូកវិញ រួចក៏អុំ ទូកត្រឡប់មកដីគោក បន្ទាប់មក ក៏ប្រញាប់ដឹក ប្តីតាមម៉ូតូឆ្ពោះទៅកាន់មណ្ឌលសុខភាពក្រាំង យ៉ូវ ដើម្បីឱ្យក្រុមគ្រួសារពេទ្យជួយសង្គ្រោះ ជីវិត តែអកុសល ពេលដឹកបញ្ជូនបានត្រឹមពាក់ កណ្តាលផ្លូវ ប្តីរបស់គាត់ ក៏ដាច់ខ្យល់ស្លាប់យ៉ាង អាណោចអាធ័មតែម្តង។
ក្រោយកើតហេតុ សមត្ថកិច្ចជំនាញ បាន ចុះពិនិត្យ និងធ្វើកោសល្យវិច័យសព រួចបញ្ជាក់ ថា ជនរងគ្រោះបានស្លាប់ដោយសារតែខ្យល់គរ ធ្លាក់ចូលទឹកបណ្តាលឱ្យលង់ស្លាប់តែម្តង ពោល គឺមិនពាក់ព័ន្ធទៅនឹងករណីអ្វីផ្សេងនោះទេ។
សពជនរងគ្រោះ ត្រូវបានសមត្ថកិច្ចប្រគល់ ឱ្យក្រុមគ្រួសារ ដើម្បីរៀបចំធ្វើបុណ្យ តាម ប្រពៃណី៕