ខេត្កណ្តាលៈ ពលរដ្ឋ១៦គ្រួសារ រស់នៅក្នុងភូមិក្តីកណ្តាល ឃុំសារិកាកែវ ស្រុកល្វាឯម បានផ្ទុះការតវ៉ាប្រឆាំងជាមួយគណៈកម្មការចម្រុះដឹកនាំដោយលោក ណុប សាវុធ អាជ្ញាសាលានៃសាលាដំបូងខេត្តកណ្តាល ដែលចុះអនុវត្តដីការក្សាការពារលើដីស្រែរបស់ពួកគាត់ លើដីស្រែប្រាំងចំនួនទំហំជាង៩ហិកតារ ស្ថិតនៅចំណុចឫស្សីជ្រោយ ក្នុងភូមិលើ ឃុំស្វាយជ្រុំ ស្រុកខ្សាច់កណ្តាល ដែលទើបនឹងកាត់ចេញពីក្នុងភូមិសាស្រ្តស្រុកល្វាឯម កាលពីថ្ងៃសុក្រ ទី១០ ខែកុម្ភៈ ឆ្នាំ២០១៧។
លោក ណុប សាវុធ អាជ្ញាសាលាដែលបានដឹកនាំកម្លាំងចម្រុះចុះអនុវត្តដីការក្សាការពារខាងលើនោះ បានឲ្យដឹងថា ការចុះអនុវត្តដីការនេះធ្វើឡើងតាមសេចក្តីជូនដំណឹង របស់លោក លឹម សុគន្ថា ព្រះរាជអាជ្ញាសាលាកណ្តាល ដែលបានបង្គាប់ឱ្យគណៈកម្មការចម្រុះ ចុះអនុវត្តដីការសម្រេចរក្សាការពារលេខ២៦ ដកសរ/ក ចុះថ្ងៃទី០៩ ខែកុម្ភៈ ឆ្នាំ២០១៧ តាមបណ្តឹងរបស់ម្ចាស់បំណុល(ដើមបណ្តឹង) ក្នុងគោលបំណងរក្សាការពារដីទំហំជាង៩ហិកតារ ស្ថិតនៅចំណុចខាងលើទុកបណ្តោះអាសន្ន ក្នុងបំណងហាមឃាត់ទៅដល់ភាគីកូនបំណុល(ចុងបណ្តឹង) ឈ្មោះ យឺ សាខន និងប្រជាពលរដ្ឋទាំង១៦គ្រួសារ មិនឱ្យផ្ទេរសិទ្ឋិដោះដូរ បញ្ចាំ លក់ ដោយត្រូវរង់ចាំបណ្តឹងតបទាមទារសិទ្ឋិកាន់កាប់ឡើងវិញ នៅពេលក្រោយ។
លោកស្រី យឺន សាខន ជាភាគីកូនបំណុលរួមទាំងពលរដ្ឋ១៦គ្រួសារ ដែលនាំគ្នាមកធ្វើការតវ៉ារារាំងការចុះអនុវត្តដីកានេះ បានឲ្យដឹងថា ពួកគាត់បានកាន់កាប់អាស្រ័យផលលើដីនេះ តាំងពីដូនតាមកម្ល៉េះ ដែលបានកាប់រានព្រៃប្រឈមនឹងគ្រាប់អាវុធយុទ្ឋភណ្ឌនៅសល់ពីសម័យសង្រ្គាម រួមនឹងសត្វសាហាវផ្សេងៗ ដែលមានគ្រោះថ្នាក់គ្រប់ពេលវេលា ដោយមិនដែលស្គាល់ភាគីម្ចាស់បំណុលពីមុនមកម្តងណាទេ ហេតុអ្វីបានជាមានដីការចុះមកអនុវត្តរក្សាការពារលើដីស្រែអាស្រ័យផលជាឆ្នាំងបាយតែមួយគត់របស់ពួកគាត់ទៅវិញ ទើបពួកគាត់នាំគ្នាធ្វើការតវ៉ាតែម្តង។
ប្រភពដដែលបន្តថា កន្លងមក ដីស្រែនេះ ធ្លាប់មានទំនាស់ជាមួយក្រុមហ៊ុន7NG ម្តងរួចមកហើយ ប៉ុន្តែដោយសារប្រជាពលរដ្ឋមានឯកសារកាន់កាប់ពីអាជ្ញាធរ ទើបមានការអន្តរគមន៏ពីអាជ្ញាធរ រហូតសម្តេចនាយករដ្ឋមន្រ្តី តាមរយៈទីស្តីការគណៈរដ្ឋមន្រ្តី ដែលបានចេញស.ជ.ណ កាត់ដីនេះមកឱ្យពួកគាត់ តាំងពីឆ្នាំ២០០៨ មកម្ល៉េះ មិនគួរណាមានជនទី៣មករំលោភ និងយកប្រព័ន្ឋតុលាការមកសម្លុតគំរាម យកដីស្រីពួកគាត់ទៀតសោះ តើឲ្យពួកគាត់រស់នៅពឹងផ្អែកលើអ្វីទៀតនោះ?
លោកជឹប ម៉ៅ តំណាងភាគីម្ចាស់បំណុល បានឱ្យដឹងថា ដីនេះមិនស្ថិតក្នុងដែនគ្រប់បណ្តប់ ដោយស.ជ.ណ របស់ទីស្តីការគណៈរដ្ឋមន្រ្តីនោះទេ ដោយសារស.ជ.ណ កាត់ដីជូនពលរដ្ឋនៅស្រុកល្វាឯមឯណោះ ប៉ុន្តែជាក់ស្តែងដីទំនាស់នេះ គឺស្ថិតនៅក្នុងស្រុកខ្សាច់កណ្តាល ហើយបងប្រុសរបស់លោក បានទិញពីពលរដ្ឋនៅក្នុងឃុំស្វាយជ្រំ ស្រុកខ្សាច់កណ្តាល កាលពីដើមឆ្នាំ២០១៥ និងចុងឆ្នាំ២០១៦ ដោយមានការទទួលស្គាល់ពីអាជ្ញាធរឃុំ និងស្រុកត្រឹមត្រូវទៀតផង។
ក្រោយពីមានផ្ទុះការតវ៉ាពីប្រជាពលរដ្ឋ ក្នុងឲ្យកម្លាំងចម្រុះចុះវាស់វែងលើដីស្រែខាងលើ និងមិនចង់ឈមមុខកម្លាំងសមត្ថកិច្ចជាមួយប្រជាពលរដ្ឋផង លោក ណុប សាវុធ ក៏បានធ្វើកំណត់ហេតុ និងអានឱ្យភាគីជម្លោះទាំងសងខាងស្តាប់រួចរាល់ ក៏ដឹកនាំគណៈកម្មការចម្រុះត្រឡប់មកវិញ ដោយមិនបានបញ្ជាឱ្យមន្រ្តីជំនាញនិងកម្លាំងសមត្ថកិច្ច ចុះវាស់វែងឡើយ ដើម្បីរក្សាទុកតាមដីការរក្សាការពារនោះទេ៕