ខេត្តព្រះសីហនុ ៖ លោកឡុង ឌីម៉ង់ អភិបាលរងខេត្តព្រះសីហនុ កាលពីថ្ងៃទី១៦ ខែតុលា ឆ្នាំ២០២៤ បានដឹកនាំក្រុមការងាររដ្ឋបាលខេត្ត និងមន្ទីរជំនាញ អាជ្ញាធរពាក់ ព័ន្ធចុះពិនិត្យ ដំណើរការស្ថានីយអាងប្រព្រឹត្តិកម្មទឹកកខ្វក់ ចំនួន ២ទីតាំង គឺនៅតំបន់សេដ្ឋកិច្ចពិសេសក្រុងព្រះសីហនុ និងរោងចក្រកែច្នៃផ្លែឈើ ជិន ហួយ (ខេមបូឌា) ឯ.ក ដែលមានទីតាំងជាប់នឹងព្រែកទឹកសាប ក្នុងភូមិសាស្ត្រស្រុកព្រៃនប់ នៅខេត្តព្រះសីហនុ។
លោកអភិបាលរង បានលើកឡើងថា ការចុះពិនិត្យនេះ បានធ្វើឡើងជាការឆ្លើយតបនឹងប្រសាសន៍ដឹកនាំលោកអភិបាលខេត្ត ក្នុងគោលបំណងដើម្បីពិនិត្យ ពិភាក្សា វាយតម្លៃភាពសមស្រប លក្ខណសម្បត្តិសុវត្ថិភាពបរិស្ថាន ដើម្បីអាចឈានទៅដល់ការរៀបចំបង្កើតតំបន់ អេកូទេសចរណ៍ តាមដងព្រែកទឹកសាប។
សូមជម្រាបថា ព្រែកទឹកសាប ជាតំបន់ជីវចម្រុះមានសក្តានុពលពីធម្មជាតិ ស្ថិតនៅក្នុងឧទ្យានជាតិសមុទ្រព្រះ សីហនុរាម ដែលមានរុក្ខជាតិលិចទឹក ដូចជា ដើមកោងកាង ដើមក្រញឹប ដើមស្មាច់ និងដើមចាក ជាដើម ហើយរុក្ខជាតិទាំងនោះ បានធ្វើជាជម្រករបស់មច្ឆជាតិ និងពពួក សត្វស្លាបតូចធំជាច្រើនប្រភេទ ដែលជាចំណុចទាក់ទាញភ្ញៀវទេសចរធម្មជាតិ និងជួយបង្កើនប្រាក់ចំណូលក្នុងស្រុក៕
