ខេត្តបន្ទាយមានជ័យ ៖ កម្លាំងសមត្ថកិច្ចជំនាញប្រឆាំងគ្រឿងញៀន សហការជាមួយកម្លាំងសមត្ថកិច្ចមូលដ្ឋាន បានបើកប្រតិបត្តិការឆ្មក់បង្ក្រាបទីតាំងក្លឹបរាត្រី ១កន្លែង ដែលសង្ស័យ លួចលាក់បង្កប់ការជួញដូរនិងប្រើប្រាស់នូវសារធាតុញៀនដោយខុសច្បាប់ ដោយសមត្ថកិច្ចបានធ្វើការឃាត់ខ្លួនជនជាតិខ្មែរ និងបរទេសសរុបប្រមាណ១០០នាក់ ក្នុងនោះ នទាំងភ្ញៀវនិងអ្នកបម្រើនៅក្នុងក្លឹបផងដែរ។
ប្រតិបត្តិការឆ្មក់បង្ក្រាបក្លឹបរាត្រីនេះ បានធ្វើឡើង កាលពីព្រឹកថ្ងៃទី៣០ ខែតុលា ឆ្នាំ២០២៤ នៅចំណុចក្លឹបកម្សាន្ត ស្តាស៊ីធី មានទីតាំងស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត។
ប្រតិបត្តិការខាងលើ ដឹកនាំដោយលោកវរសេនីយ៍ទោ ព្រហ្ម ពិសិដ្ឋ អធិការនគរបាលក្រុងប៉ោយប៉ែត និងលោក វរសេនីយ៍ទោ កែវ ដូល អធិការរងទទួលផ្នែកប្រឆាំងគ្រឿងញៀនក្រុងប៉ោយប៉ែត មានកម្លាំងអធិការដ្ឋាននគរ បាលក្រុងប៉ោយប៉ែត និងប៉ុស្តិ៍នគរបាលសង្កាត់អូរជ្រៅ ជាច្រើននាក់ និងបានធ្វើការឃាត់ខ្លួនភ្ញៀវដែលទៅកម្សាន្ត និងអ្នកបម្រើក្នុងក្លឹបកម្សាន្តស្តាស៊ីធី សរុបប្រមាណ១០០នាក់។
ក្រោយឃាត់ខ្លួន កម្លាំងអធិការដ្ឋាននគរបាលក្រុងប៉ោយប៉ែត បានយករថយន្ត ១៦កៅអី របស់សាលាក្រុងប៉ោយប៉ែត ដឹកជញ្ជូនក្រុមជនសង្ស័យទាំង១០០នាក់ខាងលើ ទៅកាន់បញ្ជាការដ្ឋាននគរបាលវរការពារព្រំដែនគោកលេខ៨៩១។
លោកវរសេនីយ៍ទោ កែវ ដូល អធិការរងផ្នែកប្រឆាំងគ្រឿងញៀនក្រុងប៉ោយប៉ែត បានបញ្ជាក់ប្រាប់ថា ការចុះប្រតិបត្តិការបង្ក្រាបក្លឹបកម្សាន្ត ស្តាស៊ីធី ក្រុងប៉ោយប៉ែត ខាងលើនេះ គឺដឹកបញ្ជូនចេញទៅដាក់នៅទីបញ្ជាការ ដ្ឋាន នគរបាលវរការពារព្រំដែនគោកលេខ៨៩១ និងរង់ចាំបទបញ្ជាថ្នាក់លើ ដើម្បីធ្វើតេស្តរកសារធាតុញៀន។ ប្រសិនជាមានប្រើប្រាស់គ្រឿងញៀន នឹងបន្តអនុវត្តតាមទៅតាមផ្លូវច្បាប់។ រីឯអ្នកមិនប្រើប្រាស់គ្រឿងញៀន នឹងត្រូវដោះលែងត្រឡប់ទៅផ្ទះវិញ៕
