ភ្នំពេញ៖ផលិតកម្ម Two River International បានធ្វើពិធីសម្ពោធខ្សែភាពយន្ដខ្នាតធំរបស់ខ្លួនកាលពីរសៀលថ្ងៃទី៧ ធ្នូ រឿង«ទាយាទធ្មប់ »នៅរោងភាពយន្ដMajor Cinepex By Smart ផ្សារអ៊ីអន១ ដោយមានអ្នកជំ នាញសិល្បៈ តារាល្បីៗ រួមទាំងអ្នកសារព័តមានជាច្រើនបានចូលរួម ។
លោកJimmy Henderson ជាអ្នកដឹកនាំភាពយន្ដរឿង«ទាយាទធ្មប់ » បានឲ្យដឹងថារឿងបនេះនិយាយពីកូនក្មេងនិងម្ដាយ ផ្ដោតលើកុមារីមួយរូបក្លាយជាស្រ្ដីពេញរូបរាង។វាជាខ្សែភាពយន្ដបែបភ័យរន្ធត់ មានចំណុចជា ច្រើនដែលទាក់ទាញ តែចំណុចសំខាន់ គឺពីបញ្ហាគ្រួសារ។រឿង«ទាយាទធ្មប់ » ចំណាយពេលនិពន្ធ៤ខែ បន្ទាប់ ពីលោកបានដឹកនាំបញ្ចប់រឿង«Ktv »។រឿងនេះប្រើពេលថតរយៈពេល១ឆ្នាំគត់ ទើបឈានមកដាក់បញ្ចាំងនាពេលនេះ។Director ល្បីឈ្មោះរូបនេះថាលោកក៍មានគម្រោងនាំយកភាពយន្ដមួយនេះទៅ ចាក់បញ្ចាំងលើទីផ្សារអន្ដរជាតិ បន្ទាប់ពីចាក់បញ្ចាំងក្នុងស្រុកខ្មែររួចគឺដូចគ្នាទៅនិងរឿង«Jailbreak »ដែលលោកធ្លាប់ធ្វើដោយជោគជ័យ ។
លោកផង់ ជាផលិតករ និងជាតួអង្គមួយរូបក្នុងរឿង«ទាយាទធ្មប់ » បានឲ្យដឹងដែរថារឿងនេះលោកសម្ដែងជាតួអង្គអភិរក្សសត្វ និងការពារព្រៃឈើ។លោកថាភាពយន្ដនេះមានការច្របាច់បញ្ចូលគ្នាច្រើនឈុតដូចជាវ៉ៃតប់ និងបែបរន្ធត់ជាដើម។ហើយក៍ជាលើកទី១ដែលលោកលេងឈុតស្នេហា ហេតុនេះលោករាងអៀនច្រើន ពិបាកណាស់ ព្រោះធ្លាប់តែថតឈុតវ៉ៃ ប្ដូរមកលេងស្នេហាចឹង។លោកថារឿងនេះថ្ងៃសែនក្រុងពាលីថត លោកជួបទុក្ខធំព្រោះឪពុកលោកទទួលមរណភាពដោយជំងឺគាំងបេះដូង តែលោកបានតស៊ូថតរហូតដល់ចប់។
«ទាយាទធ្មប់ » មានតារាសម្ដែងល្បីៗជាច្រើនដូចជាអ្នកនាងសារ៉ាយ សក្ខណា ,ស្វែង សុជាតា និងកុមារីម៉ា នីកា ជាដើម ។
សារ៉ាយ សក្ខណា ជាតួឯក«ទាយាទធ្មប់ » បានឲ្យដឹងថាភាពយន្ដនេះថ្មីសម្រាប់រូបនាង បើទោះជានាងធ្លាប់ថតរឿងខ្មោច ជាច្រើនរឿងក្ដី តែម្ដងនេះជារឿងធ្មប់ អមនុស្ស ពិសេសនាងលេងជាគ្រូទាយ និងមើលឃើញវិញ្ញាណ អមនុស្ស។នាងថាឈុតត្រូវយកវិញ្ញាណចូលក្នុងខ្លួន គឺពិបាកបំផុតសម្រាប់នាង ព្រោះហត់ ស្ទើតែចង់សម្លប់ ។នាងនិយាយបែបលេងសើចថាមូលហេតុដែលគេចូលចិត្តហៅនាងលេងជាតួខ្មោច ដោយសារតែគេមិនពិបាកចំណាយលើការផាត់មុខ …(សើច)។នាងថាសូមឲ្យទស្សនិកជនមកទស្សនាភាពយន្ដខ្មែរឲ្យបានច្រើនទាំងអស់គ្នា ដើម្បីលើកទឹកចិត្តដល់ផលិតករ និងភាពយន្ដខ្មែរ ឲ្យរីកចម្រើនទៅមុខ។
ចំណែកអ្នកនាងស្វែង សុជាតា បានឲ្យដឹងដែរថារឿងនេះអ្នកនាងសម្ដែងជាតួអង្គម្ដាយតួប្រុសហើយជឿលើមន្ដអាគមខ្លាំងណាស់។រឿងនេះអ្នកនាងត្រូវប្ដូរអារម្មណ៍២ទៅដង ត្រឹមតែមួយភ្លែត ដែលនេះជាឈុតពិបាកសម្រាប់អ្នកនាង។អ្នកនាងសុជាតា បន្ថែមថារឿងនេះផលិតបែបស្ដង់ដាតែម្ដង ហើយក្រុមការងារប្រឹងជ្រោងទាំងអស់គ្នា ហេតុនេះនាងសង្ឃឹមថាភាពយន្ដមួយនេះ នឹងជោគជ័យ ហើយជាកាដូចុងឆ្នាំ២០២៤ ទៅទស្សនិកជនមុនដំណាច់ឆ្នាំ។
សម្រាប់កុមារីម៉ា នីកា ដែលជាតួអង្គសំខាន់ម្នាក់ក្នុងរឿង««ទាយាទធ្មប់ » បានឲ្យដឹងផងដែរថានាងសម្ដែងជាតួកូនរបស់អ្នកនាងសារ៉ាយ សក្ខណា ហើយនាងបញ្ចេញសម្ថភាពខ្លាំងជាងរឿងមុនៗ អីចឹនាងក៍មិនខុសពីតួអង្គផ្សេងៗទៀតដែរ គឺមានរំពឹងខ្ពស់ថាទស្សនិកជននឹងគាំទ្រភាពយន្ដខ្មែរ។
លោកផង់ ថារឿង«ទាយាទធ្មប់ » នឹងដាក់បញ្ចាំងជាផ្លូវការគ្រប់រោងភាពយន្ដទាំងអស់ចាប់ពីថ្ងៃទី១២ ខែធ្នូ ឆ្នាំ២០២៤ តទៅ ៕
