ភ្នំពេញ៖ក្នុងជំនួបកាលពីថ្ងៃទី៧ ខែ១២ តារាសម្ដែងជើងចាស់អ្នកនាងស្វែង សុជាតា បានប្រាប់ថានាងត្រៀមរកស៊ីមុខរបរថ្មីមួយផ្ទាល់ខ្លួននាពេលដ៍ខ្លីៗខាងមុខនេះ នោះគឺទាក់ទងវិស័យកសិកម្ម។សុជាតា ថាមុខរបរនាងត្រៀមបង្កើតឡើងនោះមិនមែនលក់អង្ករទេ ប៉ុន្ដែគឺលក់ជីកសិកម្ម តែនាងមិនប្រាប់ថាជំនួញផ្នែកនេះខ្លួនត្រៀមប្រើទុនអស់ប៉ុន្មានឡើយ ។
ស្វែង សុជាតា ថ្លែងថា«មូលហេតុដែលខ្ញុំត្រៀមបង្កើតមុខរបរថ្មីទាក់ទងវិស័យកសិកម្មនេះ ដោយសារតែខ្ញុំយល់ថាសិល្បៈមិនទៀងទាត់ទេ មិនអាចសល់អ្វីធំដុំនាថ្ងៃអនាគត និងមានថវិការគ្រប់គ្រាន់ឡើយ គឺត្រូវតែមានមុខរបរមួយផ្ទាល់ខ្លួនទើបអាចទៅរួច ។ខ្ញុំមើលឃើញការរកស៊ីលក់ជីកសិកម្មនេះល្អ ហើយខ្ញុំនឹងធ្វើឲ្យចេញជារូបរាងក្នុងពេលឆាប់ៗនេះហើយ» ។
អ្នកនាងស្វែង សុជាតា បន្ថែមថាការត្រៀមចេញរកស៊ីអាជីវកម្មថ្មីដោយខ្លួនឯងនេះ ចំណុចសំខាន់នាងចង់មានលុយខ្លះសម្រាប់ព្យាបាលជំងឺដោយខ្លួនឯង ពេលចាស់ទៅ ព្រោះនាងមិនដែលលើកដៃសំពះសុំជំនួយពីមហាជននោះទេ បើទោះជាមុននេះនាងមានជំងឺដុះសាច់ក្នុងខួក្បាល ដែលមិនសង្ឃឹមថាបានរស់ក្ដី តែនាងគិតថាបើម៉េចៗឲ្យទៅដោយមិនបាច់សុំលុយពីគេទេ ។ប៉ុន្ដែជាភ័ព្វសំណាងនាងបានព្យាបាលជំងឺនេះបានធូរស្រាលរស់នៅបានដូចគេរហូតដល់សព្វថ្ងៃ ។នាងថាចាប់ពីពេលនេះតទៅនឹងមិនបណ្ដោយឲ្យសុខភាពខ្លួនទ្រុតទ្រោមទៀតឡើយ គឺត្រូវតែយកចិត្តទុកដាក់ខ្លួនឯងឲ្យបានច្រើនជាងមុន ជាមួយការប្រឹងរកស៊ីឲ្យមានថវិការគ្រប់គ្រាន់ពេលដែលខ្លួនត្រូវការព្យាបាលជំងឺ។
ថ្វីត្បិតតែអ្នកនាងស្វែង សុជាតា បានធូរស្បើយពីជំងឺដុះសាច់ក្នុងខួក្បាលក្ដី ប៉ុន្ដែនៅថ្ងៃឡើងផ្ទះថ្មីផ្ទាល់ខ្លួនកាលពីឆ្នាំមុននាងនិយាយថារួចពីជំងឺមួយចូលជំងឺមួយទៀត ហើយពេលនេះនាងមានជំងឺដ៍កាចសាហាវនិងបើមិនព្យាបាលឲ្យទាន់ពេលវេលាទេ ជំងឺនោះនឹងអាចវិវឌ្ឍន៍ទៅជាជំងឺមហារីកទៀតផង។ជំងឺថ្មីដែលកំពុងតែតាមយាយីអ្នកនាងសុជាតា នោះគឺជំងឺទឹកដក់ក្នុងពោះវៀន ដែលធ្វើឲ្យគេមើលទៅច្រឡំថានាងមានផ្ទៃពោះទៀតផង។ អ្នកនាងសុជាតា ធ្លាប់ប្រាប់ថាជំងឺថ្មីធ្វើទុក្ខដូចជាមានអាការៈមានខ្យល់ពេញពោះវៀន ធ្វើឲ្យនាងពិបាកហូបចុក បណ្ដាលឲ្យគេងមិនគ្រប់គ្រាន់។យ៉ាងណាទោះជាសុខភាពរបស់អ្នកនាងសុជាតា មិនអំណោយផលមែន តែនាងនៅតែបន្ដអាជីពសិល្បៈជាធម្មតាដោយថ្មីៗនេះនាងទើបថតបញ្ចប់រឿង«ទាយាទធ្មប់ » ទៀតផង។
អ្នកនាងស្វែង សុជាតា បន្ថែមថា«នៅពេលដែលខ្ញុំតំណើរការមុខរបរទាក់ទងកសិកម្មនោះ ពេលទំនេរក៍ខ្ញុំនៅតែឆ្លៀតថតភាពយន្ដដូចមុនដែរ ។ជាក់ស្ដែងថ្មីៗនេះដែរ ខ្ញុំទើបថតបញ្ចប់រឿង«ទាយាទ ធ្មប់ » ដែលរឿងនេះខ្ញុំពិបាកបំផុតគឺត្រូវសម្ដែងជាតួប្ដូរអារម្មណ៍ម៉ាភ្លែតដល់ទៅ២ទៅ៣ដង ។មានគេសួរខ្ញុំថាទៅណា បានជាស្ងាត់ម្លេះ? តែខ្ញុំប្រាប់វិញថាមានទៅណា មានរឿងថតដែរតើគ្រាន់តែរឿងខ្លះថតចប់ហើយ គេមិនទាន់ដាក់បញ្ចាំងតើ » ។
សូមបញ្ជាក់ថាអ្នកនាងស្វែង សុជាតា ត្រូវបានគេចាត់ទុកថាជាតារាជើងចាស់ម្នាក់ដែលជោគជ័យក្នុងអាជីពសម្ដែង ព្រោះនាងអាចលេងបានទាំងតួកាចឆ្នាសឆ្នើម និងតួកម្សត់ ទឹកភ្នែក។ប៉ុន្ដែក្រឡេកមើលរឿងស្នេហាវិញនាងមិនសមប្រកបនោះទេ ព្រោះបានចែកផ្លូវប្ដីជាបន្ដបន្ទាប់ ហើយកាលពីខែ៤ ឆ្នាំ២០២៤ នាងបានជួបកូនប្រុសដែលបានទៅរស់នៅជាមួយអតីតប្ដី ដោយយំអោបកូនទៀតផង ដែលជីវិតនាងធ្វើឲ្យតារារួមអាជីពទប់ទឹកភ្នែកមិនជាប់ ។តែក្នុងជំនួបថ្មីៗនេះអ្នកនាងសុជាតា ថាលែងចង់និយាយរឿងស្នេហា ព្រោះក្រៅពីថតភាពយន្ដ នាងផ្ដោតខ្ពស់ទៅលើតែការត្រៀមចេញរកស៊ីផ្នែកកសិកម្មនេះដើម្បីឲ្យបានតំណើរការទៅតាមគម្រោងសិន ៕
